Jeova El Ahkkweyacl Elijah

Jezebel el lohng ke ma sikyak nuh sin mwet pahluh lal Baal, ac el arlacna kasrkuhsrak. El suhpwaclah kahs nuh sel Elijah: ‘Lutu, kom ac tuhfah misac oacna ke mwet pahluh lal Baal ah.’ Elijah el arlac sahngweng ac el kahinglac nuh yen mwesis uh. El puhruhe: ‘Jeova, arlacna upaclah. Eislah moul luhk. Fal na ngan misac.’ Elijah el tohtohlah ac mutullac ye lulin sahk soko.

Lipufacn se kahlilyac ac fahk: ‘Tuhkahkwek mongo.’ Elijah el liye srukwacl in flao se ma manman fin eot fol se ac suhfah in kof soko. El mongoi ac nihm kofi ac sifwilpac ona. Lipufacn sac sifwilpac oaksalwack ac fahk: ‘Mongoi. Kom enenuh in kuh nuhke fuhfahsryucsr lom.’ Pwacnacng, Elijah el sifwilpac mongoi. Na el oruh fuhfahsryucsr lal ke lusen lwen 40 ac fong 40, ne ke el sun Finohl Horeb. Fin acn we, Elijah el utyak nuh in sie luhf in mutullac we. Tuhsruhktuh, Jeova el sramsram nuh sel. El fahk: ‘Elijah, meac kom oruh inge uh?’ Elijah el topuk: ‘Mwet Israel elos pihlesraclah wuhlelah lalos yurum. Elos kuhnahoslah loang ac uniyac mwet pahluh lom. Ingena elos suk in uniyucwi pac.’

Jeova el fahk nuh sel: ‘Illac ac tu finohl uh.’ Ma se meet, oasr eng na upac se tuhkuh ahluhkwelah luhf sac. Tohkohyang, oasr kusrusr se ac na oasr e se. Ke sahflahiyac ah, Elijah el lohng sie puhsra na srihsrihk ac fihsracsr. El afihnyac muhtahl ke nuknuk lihk lal ah ac el tu lihkihn luhf sac. Na Jeova el siyuck sel lah efuh el kahinglac. Elijah el fahk: ‘Nga muhkwena pa luhlah uh.’ Tuhsruhktuh, Jeova el fahk nuh sel: ‘Kom tiac muhkwena. Oasr mwet 7,000 fin acn Israel pa srackna alu nuh sihk. Som ac mosrwellah Elisha in el pa mwet pahluh se ma ahol kom uh.’ Elijah el sa na som tuh elan oruh ma Jeova el fahk nuh sel uh. Yac kom nuhnkuh muh Jeova el ac oacyacpac kahsre kom ke pacl se kom oruh ma el fahk nuh sum kom in oruh uh? Ahok, el ac kahsre kom. Lwelah kuht in konwacack lah meac sikyak ke puhlan pacl in wacngihn af sac.