Hannah El Puhruhe Ke Sie Tuhlihk Mukul

Oasr mukul Israel se suc inel pa Elkanah. Oasr muhtwacn luo kiyacl, ineltahl pa Hannah ac Peninah. El luhngse Hannah yohk liki muhtwacn se kiyacl sahyac ah. Oasr tuhlihk puhkantwen nahtuhl Peninnah, ac el ahnglol Hannah pacl nuhkewa mweyen wacngihn tuhlihk nahtuhl Hannah. Ke kais sie yac, Elkanah el us sucu lal nuhke lohm nuknuk muhtahl in Shiloh in alu nuh sin God. Sie pacl ma eltahl oasr we, el liye lah muhtwacn se kiyacl inge Hannah el arlacna ahsor. El fahk: ‘Nikmet tuhng, Hannah. Nga ma lom. Nga luhngse kom na pwacye.’

Tok, Hannah el sifacna som ac puhruhe. El tiac kuh in tui in tuhng ke el siyuck sin Jeova in kahsrel. El wuhlelah ohinge: ‘Jeova, kom fin ac use sie wen nuhtihk, nga ac fah kihsackuhnuhlot nuh sum, ac el ac fah kuhlwacnsuhpwe kom ke lusen moul lal nohfohn.’

Eli, mwet tol fuhlwact el liyacl Hannah, ngoasrol muhkwena mukwikwi ac wacngihn puhsra, ac nuhnkuh muh el sruhi. Hannah el topuk: ‘Leum luhk, nga tiac sruhi. Oasr ma upac yohk luhk, ac nga sramsram nuh sin Jeova kac.’ Eli el akihlen lah el tahfonglac ac fahk nuh sel: ‘Lwelah tuh God elan usot mwe siyuck lom an.’ Hannah el puhla engan ac el som. Ke soenna sun yac se, el oswelah sie wen ac el pahnglol Samuel. Yac kom petsacelah ke nuhnak lom luhpan engan lal Hannah?

Hannah el tiacna muhlkuhnlah ma el wuhlelah nuh sin Jeova. Ke Samuel el liktitlac, el usacllah nuhke lohm nuknuk muhtahl in kuhlwacnsap we. El fahk nuh sel Eli: ‘Pa inge tuhlihk mukul se nga puhruhe kac. Ke moul lal nohfohn, el tuhfah ituckyang nuh sin Jeova.’ Elkanah ac Hannah muhtwacta nuh yohrohl Samuel kais sie yac ac uslah nuh yohrohl nuknuk sasuc. Jeova el oacyacpac sang nuh sel Hannah tuhlihk mukul tolu ac tuhlihk muhtwacn luo nahtuhl.