Mwenmwen Ma Orek ke Meoa Sruhsrah

Ke pacl se na ma Pharaoh el lohngack lah mwet Israel inge som liki acn Egypt, el sifwil pacna ekuhllah nuhnak lal. Pwacnacng, el sapkihn nuh sin mwet mweun lal uh: ‘Ahkolah chariot in mweun nuhkewa okuhk an ac kuht ukwactahl! Pwacyeiyac uh kuht ac tiacna fuhlweltahllah.’ Eltahl ukwe mwet Israel uh.

Jeova el orekmakihn puhkuhnyeng sac ke lwen ac e ke fong in kol mwet lal uh. El pwacnuhltahllah nuhke Meoa Sruhsrah, ac el fahk nuh seltahl in tulohkuhnwack lohm nuknuk.

Na mwet Israel inge liyacack lah Pharaoh ac mwet mweun lal uh ukwactahl. Wacngihn acn eltahl in kahing nuh we mweyen eltahl sremlah inmahsrlon meoa sac ac solse luhn mwet Egypt. Eltahl tuhng ac fahk nuh sel Moses: ‘Kuht ac misac! Wo na kom in fihlihkuhti na Egypt.’ Tuhsruhktuh, Moses el fahk: ‘Nikmet sahngweng. Soano ac liye lah Jeova el ac molikuhtlac fuhkah.’ Arlacna yohk luhlahlfongi lal Moses nuh sin Jeova!

Jeova el fahk nuh sin mwet Israel inge in ahkolah in fahsr nuh meet. Ke fong sac, Jeova el moklwelah puhkuhnyeng sac ac likiyac inmahsrlon mwet Egypt ac mwet Israel. Ke lacyen luhn mwet Egypt ah, arlacna lohsr. Tuhsruhktuh ke lacyen luhn mwet Israel ah, kahlwem na.

Jeova el fahk nuh sel Moses elan ahsroelah pahol nuh fin meoa. Tukun ma inge, Jeova el oraclah eng na upac se in tuhyak ke fong fohn se. Meoa sac maelihk ac oraclah inkacnek soko infulwac. Na, million sin mwet Israel inge fahsr sahslah fin acn paho, ac ke siskacltahl kewa kof uh tuyak oacna sinkac nwe eltahl sahslah nuhke lacyen se sahyac ah.

Mwet mweun lal Pharaoh uh ukwe mwet Israel inge fin acn paho. Na, Jeova el oraclah un mwet mweun inge in fohsack. Wheel uh pihsrlac liki chariot okoacltahl inge. Eltahl fahk: ‘Kuht kahinglac! Jeova el mweun ke mwet Israel in lain kuht.’

Jeova el fahk nuh sel Moses: ‘Ahsroelah poum nuh fin meoa.’ Ke kihtin pacl ah na, sinkac in kof sac fohlohkeni ac afuhnlah mwet mweun luhn acn Egypt inge. Pharaoh ac mwet nuhkewa lal inge misac. Wacngihn sie seltahl moullac.

Ke lacyen se ma mwet Israel inge oasr we uh, un mwet na luhlahp se kaksakihn God ke soko on: ‘On nuh sin Jeova God mweyen El kuhtanglah ke sie kuhtanglah wolacna. El sislah horse uh ac mwet kahsruhsr fac nuh in meoa.’ Ke mwet inge on, muhtwacn ah tacn ac sritaclkihn tambourine nahtuhltahl uh. Mwet nuhkewa arlacna engan lah ingena eltahl sukohsohklah.