Moses El Sulaclah Elan Alu nuh sin Jeova

Fin acn Egypt, etweyuck lah sucu lal Jacob uh mwet Israel. Tukun Jacob ac Joseph misac, Pharaoh sasuc se muhtwacwacack in kol. El sahngweng muh mwet Israel inge ac fah kuhi liki na mwet Egypt. Pwacnacng, Pharaoh el oraclah mwet Israel in eklac mwet kohs. El sapkihn eltahl in oraclah brick ac in orekma upac ke imac. Tuhsruhktuh, ke yohkwelihk mwe ahkkweok luhn mwet Egypt inge, pihsen mwet Israel inge puhseni. Ke srihpen Pharaoh el sruhnga ma sikyak inge, el sapkihn tuh ahwowo mukul nuhkewa ma isuslac nuhtin mwet Israel inge in acnwucki. Kom kuh in petsacelah luhpan sahngweng luhn mwet Israel inge?

Oasr muhtwacn Israel se suc pahngpahng Jochebed ac el oswelah tuhlihk mukul na kahto se. In karuhnguhnuhl, el likilyac luun fohtoh se ac okanuhllah ke acn ma mah na loes kapwack we ke Infacl Nile. Miriam, suc tuhlihk muhtwacn se wiyacn ahwowo se inge el tu fototo nuh we in liye lah meac ac sikyak nuh sel.

Ke tuhlihk muhtwacn se nahtuhl Pharaoh ac tuhkuh in yihyih ke infacl soko ah, el liyacack fohtoh sac. Luun fohtoh sac, el liyacack ahwowo se ma oan tuhng loac ac el pahkomuhtahl. Miriam el siyuck sel: ‘Kom luhngse nga in som konwacack sie muhtwacn ah in karuhnguhnuhl lom?’ Ke acn se nahtuhl Pharaoh inge fahk ahok, Miriam el usacl Jochebed, ninac kiyacl sifacna nuh yurin muhtwacn sac. Tuhlihk muhtwacn se nahtuhl Pharaoh inge fahk nuh sel: ‘Eis ahwowo se inge ac liyaclwacng, ac nga fah moli nuh sum.’

Ke tuhlihk sac mahtuhlah, Jochebed el usacllah nuh yurin acn se nahtuhl Pharaoh inge, suc pa sang inel Moses ac el tuhfahllah in oacna ma nahtuhl sifacna. Ke Moses el mahtuhlah ah, el sie fihsrack ac el kuh in eis kuhtwena ma el luhngse. Tuhsruhktuh, Moses el tiacna muhlkuhnuhllah Jeova. El etuh lah el mwet Israel se ac el tiac mwet Egypt. El sulaclah elan kuhlwacnsuhpuh Jeova.

Ke Moses el sun yac 40 matwac, el sulaclah in kahsruh mwet lal uh. Ke el liye lah mwet Egypt se uni sie mwet Israel, Moses el lihksreni na puokyac mwet Egypt sac na el misac. Moses el pihkihnyac mahnol in puhk uh. Ke pacl se ma Pharaoh el lohngack ma inge, el suk in unilyac Moses. Tuhsruhktuh, Moses el kahinglac nuh Midian. Jeova el karuhnguhnuhl we.