Sie Mwet Kuhlwacnsap Suc Ahkos God

Joseph el sie sin tuhlihk mukul nahtuhl Jacob. Mukul mahtuh wiyacl uh liye lah pahpah tuhmwacltahl ah kuloh el. Meac kom nuhnkuh muh eltahl puhla? Eltahl sok sel Joseph ac koasel. Tok, oasr mwemwe na usrnguck lal Joseph, ac el sruhmuhnacng mwemwe lal inge nuh sin tamuhlwel wiyacl uh. Eltahl nuhnkuh muh kalmen mwemwe lal inge pa sie lwen eltahl ac muh epahsr nuh sel. Ingena, yohkwelihk sruhnga laltahl nuh sel liki na meet!

Sie lwen ah, tamuhlwel wiyacl Joseph uh liyacacng sheep apkuhran nuhke acn Shechem. Jacob el suhpwacllah Joseph elan liye lah eltahl fuhkah. Eltahl liyaclack Joseph ke el srackna fahsr loes nuh yohrohltahl ac fahk nuh sin sie sin sie: ‘Mukul mwemwe ah pa fahsruh ingo. Ahkolah kuht in unilyac!’ Eltahl sruokilyac ac sisuhlacng nuh in luhf na loal se. Tuhsruhktuh Judah, sie sin mukul wiyacl inge el fahk: ‘Nimet unilyac! Kuht kuhkwackuhnuhllah oacna sie mwet kuhlwacnsap.’ Pwacnacng, eltahl kuhkwackuhnuhllah Joseph ke ipin silver 20 nuh sin mwet kuhka Midian suc som nuh Egypt.

Tukun ma inge, tamuhlwel wiyacl Joseph uh twenyac nuknuk lal ah ke srahn nacni soko, uslah nuh yurin pahpah tuhmwacltahl ah ac fahk: ‘Yac tiac pa inge nuknuk luhn wen nuhtum?’ Na, Jacob el nuhnkuh muh kosro suhlallacl ah unilyac Joseph. El arlacna ahsor.

Fin acn Egypt, kuhkwackihnyucklac Joseph oacna sie mwet kuhlwacnsap nuh sin mwet kol fuhlwact se inge suc pahngpahng Potiphar. Tuhsruhktuh, Jeova el weluhl Joseph. Potiphar el liye lah Joseph el wo ke orekma uh ac kuh in luhlahlfongiyuck el. Tiac paht, Potiphar el likilyac elan leum fin ma nuhkewa lal.

Muhtwacn kiyacl Potiphar ah liyacack lah Joseph el oaskuh ac fokoko. Ke lwen nuhkewa, el siyuck sel Joseph elan oan yohrohl. Meac Joseph el ac oruh? El srahngesr ac el fahk: ‘Moh! Ma koluk se pa ngacn. Leum luhk uh luhlahlfongiyuc ac kom pa muhtwacn kiyacl uh. Nga fin oan yurum, nga ac orekma koluk lain God!’

Sie lwen ah, muhtwacn kiyacl Potiphar uh srihke in pahtkol Joseph elan oan yohrohl. El sruokyac nuknuk lal, tuhsruhktuh Joseph el kahinglac. Ke pacl se ma Potiphar el tuhkuh nuh lohm seltahl uh, muhtwacn kiyacl uh tiac fahk ma pwacye uh, a el fahk muh Joseph el ahkkulukyacl. Potiphar el arlacna foloyak, ac el sisuhlacng Joseph nuh in presin. Tuhsruhktuh, Jeova el tiacna muhlkuhnuhllah Joseph.