God El Oraclah Mukul ac Muhtwacn Se Meet

Jeova el oraclah imac se ke sie acn pahngpahng Eden. Imac se inge nwacnwaclah ke ros, sahk, ac ma orahkrahk. Tohkohyang na, God el oracllah Adam, mukul se emeet, liki infohk uh ac mongyang nuh infwacl. Kuh kom etuh lah meac sikyak nuh sel? Mwet se inge oasri moul la! Jeova el sang kunohkohn nuh sel in karihngihn imac se inge, ac el fahk nuh sel elan sang pac inen ma orahkrahk nuhkewa.

Jeova el sang masap na yohk srihpac se nuh sel Adam. El fahk nuh sel Adam: ‘Kom kuh in mongo ke fukunsahk ke kuhtwena sahk nuhkewa inge, sahyen sahk sacohk soko inge. Kom fin kang fukun sahk ke sahk soko inge, kom ac fah misac.’

Tok, Jeova el fahk: ‘Nga ac oruh sie mwet in weluhlacng Adam in kahsrel.’ God el oruh Adam elan mutul fulosuwohslac, ac el orekmakihn soko sri in pahp kacl uh in oraclah muhtwacn se kiyacl. Inel pa Eve. Adam ac Eve pa sucu se emeet uh. Meac Adam el puhla ke el liye muhtwacn se kiyacl inge? Adam el arlacna engan kacl pwacnacng el fahk: ‘Liye ma Jeova el oraclah ke sri in pahp keik inge! Arlac wo! Pa inge sie mwet suc oacna nga.’

Jeova el fahk nuh sel Adam ac Eve eltahl in orek tuhlihk ac nwacklah facluh. El luhngse tuh elos in engan in tuhkweni orekma ac oraclah facluh nohfohn nuhke sie pacruhtais kuh sie imac kahto, in oacna imac Eden. Tuhsruhktuh, tiac pa inge ma sikyak uh. Efuh? Kuht ac fah lotwelah lah meac sikyak ke sapta se tok uh.