Meac Se inge Pweng Wo?

1. Meac pweng tuhkuh sin God me?

God el luhngse mwet nuhkewa in engankihn moul laltahl fin facluh. El oraclah facluh ac ma nuhkewa loac ke srihpen el luhngse mwet uh. Ke pacl na sa el ac fah ahkwoye ma nuhkewa in sang moul wowo nuh sin mwet ke acn nuhkewa ke pacl fahsruh uh. El ac ahkwacngihnyelah ma nuhkewa suc ahkkweokye mwet uh.​—Riti Jeremiah 29:11.

Soenna oasr government se sun finsrak laltahl in ahkwacngihnyelah orekma suhlallacl, mas, kuh misac. Tuhsruhktuh, oasr pweng na wowo! Ke pacl na sa, God el ac fah orekmakihn government lal sifacna in ahollah kolyuck luhn mwet uh. Mwet suc muhta ye kolyuck inge ac fah engankihn mislac ac mahno fokoko.​—Riti Isaiah 25:8; 33:24; Daniel 2:44.

2. Efuh pweng wo inge yohk srihpac?

Mwe kweok nuhkewa ac fah wacngihnlac ke pacl se na God el kuhnauslah mwet kuluk fin facluh uh. (Zephaniah 2:3) Ma inge ac tuh fah sikyak ngac? Kahs luhn God uh palye kain in ohiyac suc mwe sensen nuh sin mwet ke pacl inge. Ma kuluk suc sikyak fin facluh uh ahkkahlwemye lah pacl luhn God in oruh ma inge apkuhran me.​—Riti Luo Timothy 3:1-5.

3. Meac kuht enenuh in oruh?

Kuht enenuh in lutlut ke God ke Bible. Bible uh oacna sie lwacta sin pahpah tuhmacsr suc luhngse kuht. Ma inge ahkkahlwemye nuh sesr lah kuht ac engankihn fuhkah moul lasr ke pacl inge ac oacyacpac in engankihn moul ma pahtpaht fin facluh ke pacl fahsruh uh. Tuhsruhktuh ke srihpen God el wuhlelah nuh sesr sie moul wowo ke pacl fahsruh, kuht enenuh in tiacna lwelah mwet sahyac in ahkmuhnahsye kuht ke lutlut lasr ke Bible.​—Riti Soakas 29:25; Fwackyuk 14:6, 7.