Ke Pacl Inge Meac Orekma luhn Un Mwet Suc Liyacacng Orekma luhn Mwet Loh luhn Jeova Fin Facluh Nohfohn?

In pacl luhn mwet Christian meet ah, u srihsrihk se ke “mwet sap ac mwet kol” fin acn Jerusalem pa oruh sulaclah yohk srihpac pucspucs ma ac wo nuh sin mwet Christian akmuhsralah nuhkewa. (Orekma 15:2) Ke pacl nuhkewa ma eltahl oruh sulaclah uh, eltahl enenuh in sramsramkihn meet ma Bible uh fahk kac uh ac ukwe kolyuck luhn God ke nguhn muhtahl lal. (Orekma 15:25) Oakwuck se inge ukweyuck pac mihsenge.

God el orekmakihn u se inge in oruh ma luhngse lal. Yohk luhngse luhn mukul akmuhsralah ma wi ke Un Mwet Suc Liyacacng Orekma Lasr Fin Facluh Nohfohn ke Kahs luhn God ac yohk pac etwacack laltahl ke ma pucspucs ma eltahl kuh in oruh in karihngihn orekma ac ma nuhkewa ma enenweyuck nuh ke fototo lasr nuh sin God. Eltahl tuhkweni nuh sie ke kais sie wik in sramsramkihn mwe enenuh luhn mwet lili nuhkewa fin facluh nohfohn. In oacna pacl luhn mwet Christian in pacl meet ah, oasr kahs in luti ma tuhkuh ke Bible ma sihmlac ke lwacta ac ituckyang nuh sin congregation. Ke kuhtuh pac pacl, ma inge utuck sin mwet fuhfahsryucsr ac kuhtuh pac sahyac in som nuh yurin congregation pucspucs. Ma inge sang kahsruh nuh ke inse sefanna ke nuhnak ac orekma inmahsrlon mwet luhn God uh. (Orekma 16:4, 5) U se inge pa karihngihn ahkolah luhn mongo in nguhn, ahkkweye mwet nuhkewa in moniyuck ke orekma in luti ac srihsrngiyac mukul suc fal in oruh kain in kunohkohn pucspucs ma enenweyuck uh.

Nguhn luhn God pa kol orekma laltahl uh. Un Mwet Suc Liyacacng Orekma Lasr Fin Facluh Nohfohn uh eis mwe kahsruh ke kolyuck luhn Jeova, suc Mwet Kol Fuhlwactlacna ac Jesus, suc Sifen congregation. (Sie Corinth 11:3; Ephesus 5:23) Mwet kac inge tiac sifacna oraclah muh eltahl pa mwet in kol mwet luhn God uh. Eltahl ac mwet Christian akmuhsralah nuhkewa, “elos fahsr tukun Lamb [Jesus] yen nuhkewa el fahsr we.” (Fwackyuk 14:4) U se inge arlacna sang kuloh ac ahkkahlwemye srui laltahl ke pacl se kuht puhruhe kacltahl ac ke orekma laltahl uh.

• Suc liyacacng congregation nuhkewa ke pacl luhn mwet sap ah?

• Un Mwet Suc Liyacacng Orekma Lasr Fin Facluh Nohfohn ke pacl inge eltahl eis fuhkah mwe kahsruh ke kolyuck luhn God?