Uumissor­neqaraluarluta pilluarsin­naavugut

1. Jiisusi eqqumiip­palussin­naasumik qanoq oqarpa?

QAQQAMI oqalugiar­nermini Jiisusi oqarpoq: “Pilluarpusi … uumissor­neqarussi.” (Luk 6:22) Tusarnaartut tamanna eqqumiis­sorisimassavaat. Kialuunniimmi uumissor­neqarneq nuannarinngilaa. Taavami sooq Jiisusi taama oqarpa? Nalitsinni inuppas­suarnit uumissor­neqaratta tamanna paasissallugu pingaaruteqarpoq. Sooq uumissor­neqarnersugut aamma uumissor­neqarnitsinni pilluar­nissatsinnut pissutaasut sammissavagut.

SOOQ UUMISSOR­NEQARTUGUT

2-3. Malersugaanitsinnut pissutaasut ilaat suua, tamannalu paasigatsigu qanoq sunnerneqaatigaarput? (Johannesi 16:2, 3)

² Jehova guutisiorfigigatsigu uumissor­neqarpugut. Malinnitsiminik malersuisussat toqutsisussallu pillugit Jiisusi ima oqarpoq: “Ataataq uangalu ilisiman­nginnamisigut taama iliussapput.” (Johannesi 16:2, 3 atuakkit). Guutip innuttaanik malersuisitsisoq kinaava? Saatani, nalitsinni guutiusoq. (Kor 2. 4:3, 4) Saatanip inuit tappiil­lisippai Jehova pillugu ilumoortumik paasinnin­nginnias­sammata Jehovamillu ilisimannittut asannittullu uumissor­neqartilerlugit. (Joh 8:42-44) Tamanna paasigatsigu uagutsinnik akerlilersuisunut qanoq isiginnit­taaseqalerpugut? Saatanimit tappiil­lisinneqarnerat nalunngin­natsigu uumissor­navianngilagut.

³ Qatanngut angut Pavel,a nunami suliatsinnik inerteq­qutaaffiusumi najugaqarpoq. Jehovamut kiffartornini pissutigalugu tigusarineqarpoq persuttar­neqarlunilu, aamma immikkoor­titaalluni parnaarun­neqarpoq kisimiititaalluni. Pavel ima oqarpoq: “Paasilluarpara Saatani anersaapiluillu Jehovamik guutisior­nitsinnik unitsitsiniaasuusut. Parnaarus­sivimmimi sulisut amerlanersaasa inuttut uumissorpasin­ngikkaluarpaatigut. Suliassin­neqarnermis­sulliuna iliuinnartut.” Kroatiami qatanngut angut angajoq­qaaminit assut malersugaasimasoq ima oqarpoq: “Paasilerpara angajoqqaakka uannut akeraan­ngitsut Saatanili akeraasoq.” – Ef 6:12.

4. Jiisusi Steffaanusilu qanoq ilinniarfigisin­naavagut? (Aamma asseq takuuk).

⁴ Kajumis­saarneqarpugut uagutsinnik akerlilersuisut uumissornagit qinnuttas­sagigut. (Mat 5:44) Tamatumunnga tunngatillugu Jiisusi Steffaanusilu ilinniarfigisin­naavagut. Jiisusi qisummik naalliutsitsiviliamut kikiattugaanermini ima qinuvoq: “Ataata, … isumakkeerfigikkit.” (Luk 23:34) Jiisusip sakkutuut imminut toqutsisussatut suliassin­neqarsimasut isumakkeerfigeq­qullugit Jehova qinnuigaa. Jiisusip aamma eqqarsaatigisimasinnaavai inuppassuit siusinnerusukkut upperisarsiornikkut siuttunit sunnerneqarlutik imminik toqutas­sanngor­titseqqusillutik suaartarsimasut. Jiisusip nalunngilaa taakkua qanoq iliornertik nalugaat. Aamma Steffaanusip Guuti qinnuigaa imminik toqutsilersut isumakkeerfigeq­qullugit. (ApS 7:58-60) Jiisusip Steffaanusillu qinnutaat Jehovap akivai? Aap. Jiisusip toqunnissaanik kissaateqartut ilarpassui kingusin­nerusukkut peqqissimipput, Jiisusimut uppertun­ngorput imermullu morsutsitaallutik. (ApS 2:36-41) Steffaanusillu toqunneqar­neranik tapersersueqataasut ilaat minnerpaamik ataaseq – Saulusi Tarsusimiu – kingusin­nerusukkut kristumiun­ngorpoq ajortorujus­suarmillu iliuuserisimasani peqqissimis­sutigalugit. – Tim 1. 1:13.

5. Césarip misigisaanit qanoq ilikkagaqarpit?

⁵ Aamma nalitsinni akerlilersuisut qinnukkaangatsigit Jehovap tusartarpaatigut. Assersuutigalugu Venezuelami Césarip ataataa akerlilersuisorujussuuvoq. César oqarpoq: “Anaanaga nuliaal­luartuullunilu anaanaal­luarpoq. Jehova salliut­tuarpaa ataatagalu isumagiuarlugu. Qatanngutikkalu ilinniar­tippaatigut ataatatsinnik ataqqin­nittuus­sasugut. Aamma ilinniar­tippaatigut naalattas­sagipput Jehovap piumasaanut akerliusumik ilioqqun­ngippatigut.” Ukiut ingerlanerini Césarip ataataa allanngoriar­tuaarpoq. César ima oqaluttuarpoq: “Ullut ilaanni qamannga pisumik qinoreerlunga ataataga aperaara Biibilimik misissueqatigisin­naanerlugu. Angermallu nuannaarneq misigisara nassuiarsin­naanngilaraluunniit.” Kingusin­nerusukkut Césarip ataataa imermut morsutsitaavoq. Akerlilersuisut ilaannaat Nalunaajaasun­ngortarput, ilarpassuilu ataqqin­nilluta oqaloriaaserput pissuserit­tuunerpullu maluginiareerlugit akuersaar­nerulertarput. Tamannalu nuannaarutigeqaarput! Aamma neriuppugut Jehovap, ‘nunarsuarmik tamarmik eqqartuus­sisuusup’ nallittuisup, inuit taamaattut suli amerlanerusut imminut qanillisissagai. – Mos 1. 18:25.

6. Makkorsi 13:13 naapertorlugu uumissor­neqarnitsinnut pissutaasoq alla suua?

⁶ Jiisusi tapersersoratsigu uumissor­neqarpugut. Jiisusi oqarpoq kristumiut ilumoortut ‘atini pissutigalugu inunnit tamanit uumissor­neqassasut’. (Makkorsi 13:13 atuaruk). Atiata taaneqarnerani pineqarput Jiisusip kinaanera Guutillu kunngeqarfiani kunngitut oqartus­saanera. Jehovap naalakkersuisussatut toqqagaanit, Jiisusimit Kristusimit, naalakkersor­neqarusunnatik inunnit naalakkersor­neqarusuttunit uumissor­neqarpugut. Pissutsilli ajortut atukkagut taamaat­tuaannas­sanngillat. Jiisusimmi 1914-imiilli kunngitut naalakkersuisup ungasin­ngitsukkut naalagaaffiit allat tamaasa suujunnaarsissavai.

7-8. Aamma sooq nikassar­neqartarpugut? (Johannesi 15:18-20) (Aamma assit takukkit).

⁷ Allaanerunerput pissutigalugu uumissor­neqartarpugut. Jiisusi oqarpoq malinnitsini inunnit allanit allaanerunertik pillugu uumissor­neqassasut. (Johannesi 15:18-20 atuakkit). Kristumiut siulliit assigalugit isiginnit­taatsit, iliuutsit oqaloriaatsillu Guutip iluarinngisai ingalas­simasarpagut. Taamaat­tumillu uppeqaterpassuagut suliffimminni atuarfinnilu nikassar­neqartarput. (Pet 1. 4:3, 4) Akerlilersuisulli ilaasa uagutsinnut isiginnit­taasertik allanngor­tittarpaat ataqqin­ninnerulerlutillu.

⁸ Ignaciop, Amerikami Qiterlermi najugallip, tamanna misigaa. Jehovap iluarisaatut inooriaaseqarnini pillugu ilinniar­titsisuminit mitaatigineqartarpoq. Soraarum­miileramili ilinniar­titsisuminit aperineqarpoq nikassar­neqartaraluarluni qanoq najoqqutassiat Biibilimiittut maleruar­tuarsin­naanerai. Ignacio nassuiaavoq Guutip inatsisai illersuutitut isigalugit. Taava ilinniar­titsisoq ataatsimiinnermut qaaqquaa. Takkummallu Ignacio tupigusuppoq. Ilagiin­niittut asannit­tuunerat killitsis­sutigigamiuk ilinniar­titsisoq ataatsimiigiar­talerpoq. Kingusin­nerusukkut Biibilimik misissuisarnini pissutigalugu nammineq akerlilersor­neqalerpoq. Anersaakkulli siumukar­tuarpoq Nalunaajaasun­ngorlunilu.

9-10. (a) Suna aamma allaanerus­sutigaarput? (b) Paulusi qanoq ilinniarfigisin­naavarput?

⁹ Politikkimut sorsunnernullu tunngasunut akuliut­tannginnerput allanit allaanerus­sutigaarput. (Joh 18:36) Romamiut 13:1-imi allassimasunut naapertuuttumik inatsisinik maleruaavugut. Kisianni politikkimut tunngatillugu arlaannaan­nilluunniit illersugaqan­ngilagut. Aamma politik­kerinngorneq qinerseqataanerluunniit ajorpugut. Sooq? Kristumiuugatta aamma Jehova Kunngeqarfialu Jiisusimik kunngilik ilumoorfigigatsigit. Uppeqaterpassuagut Nalunaajaasuunertik pissutigalugu parnaarus­saagaluarlutik oqaluus­siuarput. Taamaalillutik Paulusi, ukiuni arlalinni parnaarus­saasimasoq, ilaarpaat. (ApS 24:27; 28:16, 30) Taannami tusarnaarusuttunut kikkunnul­luunniit – ilaatigut parnaarussanik paarsisunut, eqqartuus­sivinni sulisunut, kaasarip sinniisuinut, kunnginut immaqalu allaat Romamiut kaasariata Nerop kaasarik­kormiuinut – nutaarsiassat nuannersut pillugit oqaluus­sisimavoq. – ApS 9:15.

¹⁰ Aamma nalitsinni uppeqatigut parnaarus­saaqqasut tusarnaarusuttunut kikkunnul­luunniit – ilaatigut eqqartuus­sisunut, oqartus­saasunut paarsisunullu – oqaluus­sisarput. Qatanngut angut politikkimut akuliuk­kumannginnini pissutigalugu ukiut arfinillit sinnerlugit parnaarus­saasimasoq oqarpoq parnaarus­saanini pillaatitut isiginagu Jehovap suliassiis­sutigisaatut isigalugu. Parnaarus­sivimmimi eqqortuliorusuttunik nanisisin­naaniassagami. Jehovap inuit taamaattut oqaluus­siffiginis­saannut atorsin­naassap­patigut nuannaarutigis­savarput! (Kol 4:3) Maanna Jehovamut kiffartornerput pissutigalugu uumissor­neqarnitsinni pilluar­nissamut pissutaasut allat sammeriartigit.

UUMISSOR­NEQARNITSINNI SOOQ PILLUARSIN­NAASUGUT

11. Sooq malersor­neqarneq uppernikkut nakussatsis­sutigisin­naavarput?

¹¹ Nalunngilarput uumissor­neqarnerput siulittuutit eqquunnerigaat. Biibilimi siulittuummi siullermi Jehova oqarpoq Saatani malinnittaalu Jehovamut kiffartortunik uumissuissasut. (Mos 1. 3:15) Jiisusip aamma tamanna oqaatigisarpaa, soorlu iivangkiiliuni sisamani tamani atuarsin­naagipput. (Mat 10:22; Mak 13:9-12; Luk 6:22, 23; Joh 15:20) Jehovap kiffaasa ajortumik pineqar­tarnissaat aamma Biibilimik allattut allat allaatigisarpaat. (Tim 2. 3:12; Jaak 1:2; Pet 1. 4:12-14; Juud 3, 17-19) Taamaattumik malersor­neqarnerput tupaallaatigineq ajorparput. Siulittuutit eqquunnerigaat nalunngin­natsigu qamannga pilluarneq misigisarparput. Ilumoortumik guutisior­nitsinnut uppernarsaataavoq. Qatanngut arnaq nunami suliatsinnik killilersugaaf­fiusumi najugalik ima oqarpoq: “Taamani Jehovamut tunniul­luinnarama nalunngereerpara arlaanni malersugaas­sallunga. Taamaattumik misilin­neqalerama annilaangalin­ngilanga tupaallaatiginagulu.” Inunnit arlalinnit, ilaatigut uiminit, akerlilersor­neqarpoq. Uiata ajortumik pisarpaa aamma Biibilia Biibililersaarutaalu ikuallallugit. Qatannguterpulli qunulernani uppernikkut nakussatsin­neqarpoq. (Hebr 10:39) Ima oqarpoq: “Malersor­neqarnissarput siulittuutigineqarmat misigis­sallugu nalunngilara. Taamatullu pisoqarmat qularun­naarsin­neqarpunga upperisaq ilumoortoq nanisimallugu.”

12. Qatanngut angut malersor­neqarnermini qanoq pinertusaarsin­naasimava?

¹² Malersor­neqarnerput tupigusuutigin­ngikkaluarlugu imaannaan­ngitsuusinnaavoq. Parnaarus­saasimanini pillugu qatanngut angut ima allappoq: “Ilaannikkut nikallorlungalu isumakuluttarama qullikka kuuinnalertarput.” Qanoq iliorpa? Allappoq: “Qinujuaan­narpunga. Ullut tamaasa qinunermik aallartit­tarpakka. Ullullu ingerlanerani ilungersunartunik nalaataqaraangama qinusarpunga. Ajortumillu pineqar­tarnera kamassutigileraangakku WC-mut mattuttarpunga Guutimullu qinusarlunga.” Qatanngutitta angutip aamma itsaq nalitsinnilu pinertusaarlutik maligas­saalluartut qanoq ilinniarfigisin­naanerlugit eqqarsaatigeq­qissaartarpaa. Taamaattumik tunniutiin­nanngilaq eqqissinerlu Jiisusip neriorsuutigisaa misigisarlugu. – Joh 14:27; 16:33.

13. Uumissor­neqarnitsinni pinertusaar­nissamut suna iluaqutigis­savarput?

¹³ Jehovamut uppeqatitsinnullu asanninnerput uumissor­neqarnermi pinertusaar­nissamut iluaqutigis­savarput. Jiisusip Ataatani toqussi tikillugu uummatini tamakkerlugu asangaarpaa. Aamma ikinngutini asajuarpai. (Joh 13:1; 15:13) Taassumatulli Jehovamik uppeqatitsinnillu asannikkutta pinertusaarsin­naassaagut. Qanoq? Tamanna paasiumallugu Paulusip misigisaa sammilaariartigu.

14. Paulusip toqutaanissani nalunngik­kaluarlugu qanoq ililluni Jehovamut aalajaat­tuarsinnaava?

¹⁴ Paulusip toqussi qanillisoq ikinngutini Timuutiusi ima allaffigaa: ‘Guutip anersaamik uagutsinnik qunutuun­ngortitsisumik tuninata pissatsitsisumik asannilersitsisumillu tunivaatigut.’ (Tim 2. 1:7) Tassa asanninneq sapiillis­sutigisin­naavarput. Assersuutigalugu kristumiu Jehovamik asanningaarnini nakussatsis­sutigalugu misilin­neqarnermini pinertusaarsinnaavoq. (Tim 2. 1:8) Paulusip nalunngik­kaluarlugu toqutaasus­saalluni Jehovamik asanningaarnini aalajaat­tuarnis­saminut iluaqutigaa. – ApS 20:22-24.

15. Nalitsinni uppeqatitta asanninnertik qanoq takutis­simavaat? (Aamma asseq takuuk).

¹⁵ Uppeqatigut malersor­neqarnermi aalajaat­tuartut asangaarpagut! Uppeqatitik asanninnermik ersersitsiviginiarlugit qatannguterpassuagut iliuuseqangaartarput. Taamaalillutik Akviila Priskiilalu Paulusi pillugu inuunerminnik navianar­torsior­titsisut ilaartarpaat. (Rom 16:3, 4) Assersuutigalugu Ruslandimi Nalunaajaasoqatitik tigusaasut qiimmas­sarniarlugit eqqartuus­sivinnukartut amerlasarput. Qatanngutip arnap tigusaasimasup eqqartuus­sivimmi uppeqaterpassuani takkussimasut takugamigit assut killitsippoq allaallu oqaasis­saarulluni. Pisariaqar­titsiffimmini asanninnerat nakussatsis­sutigaa. Aap, asaqatigiinnerput uumissor­neqarnitsinniit kimittuneruvoq!

16. Sooq Petrusi allappa Guutimut kiffartornertik pissutigalugu ajortumik pineqartut pilluarsinnaasut? (Petrusimit 1. 4:14)

¹⁶ Nalunngilarput uumissor­neqarnitsinni pinertusaarnerput Jehovamut nuannaarutaasoq. (Petrusimit 1. 4:14 atuaruk). Apustili Petrusi allappoq Guutimut kiffartornertik pissutigalugu ajortumik pineqar­nerminni pinertusaartut pilluarsinnaasut. Sooq? Taamatut ajortumik pineqarneq ‘Guutip anersaavanit najorneqar­nitsinnut takussutis­saammat’. Petrusip tamanna nammineq misiginikuuaa. Ukiumi 33-mi ullup piinsip kinguninngua Petrusi apustileqataalu oqaluus­sinertik pissutigalugu tigusaapput. Petrusilli qununani uppernini illersorpaa. (ApS 5:24-29) Allaat iperartor­neqaraluarlutik apustileqatinilu oqaluus­sisarun­naanngillat. Nuannaaqaalli Jiisusip “atia pissutigalugu naalliutsitaanertik ataqqinaatitut isigigamikku”. Uagut aamma pinertusaar­nitsinni nuannaarsin­naavugut. – ApS 5:40-42.

17. Toqussi aqaguttoq Jiisusip ilinniartitani qanoq oqarfigai?

¹⁷ Toqussi aqaguttoq Jiisusip ilinniartitani ima oqarfigai: ‘Uannik asannittoq Ataatama asassavaa, uangalu asassavara.’ (Joh 14:21) Jehovamut kiffartornerput pillugu uumissor­neqarun­naarluta kikkunnit tamanit asaneqar­nissarput qilanaarutigeqaarput! (Tes 2. 1:6-8) Tamannalu utaqqitillugu uumissor­neqarnitsinni pilluar­nissatsinnut pissutis­sarpassuagut nakussatsis­sutigiuartigit!