Tusaamasatut inuunermit pitsaanerusumik inuuler­punga

Aap­paaguani filmiliaritit­tar­tun­ngorama arlaleriarlunga filmimi pingaar­ner­tut inut­taavunga. Tusagas­sior­tut apersorusut­tar­paan­nga, as­siliisar­tut as­silerusut­tar­paan­nga inuil­lu filminik aal­lakaatitseq­qaar­ner­nut, atoq­qaarfis­sior­titsiner­nut, ul­loqeq­qasioqatigiin­ner­nut nereqatigiin­ner­nul­lu ilaatik­kusut­tar­paan­nga. Kik­kut tamarmik alutorivaan­nga.

Paasiler­para taamatut inuuneq takorloor­tak­kat­tut nuan­ner­tigin­ngitsoq. Filmini pis­sanganar­tuliani inut­taanerusar­punga, taman­nalu ulorianar­poq. Hollywoodimut sanil­liul­lugu Hongkongimi filmiliaritit­tar­tut sapiiser­tar­tunik atuer­piar­neq ajormata nam­mineq, soorlu biili qulaal­lugu motorcykelinik tin­ngal­lal­lunga, sapiiser­tar­punga. Filmit inut­taaf­figisak­ka amerlasuut kinguaas­siuutitigut inuunerlun­ner­taqarlutil­lu nakuuser­ner­taqar­put. Ilaat anersaarsior­ner­taqar­put.

1995-imi filmilior­titsisar­tumut katip­punga. Suut tamaasa pigigaluarlugit – tusaamasaa­galuarlunga, atugaris­saaraluarlunga asan­nit­tumil­lu ueqaraluarlunga – isumatsaq­qangaar­lungalu nikal­lungavunga. Filmiliaritit­tarun­naar­niarlunga aalajanger­punga.

MEERAALLUNGA UPPERISARA EQQAAVARA

Niviarsiaraal­lunga up­perisara nuan­nersumik eq­qarsaatigisaler­para. Taamani arfinin­ngor­nerit tamaasa qatan­ngutigalu ilaqutariit Jehovamik Nalunaajaasuusut pulaar­tar­pavut. Ataataasup, Joe McGrathip, panini pingasut Biibilimik atuaq­qis­saaqatigigaangagit peqataasar­pugut. Ilaqutariit isumas­suisuul­lutil­lu asan­nit­tuup­put, “ak­kal­lu Joep” nuliani meeq­qanilu ataq­qin­nit­tumik pisar­pai. Taak­ku ilagalugit kristumiut ataatsimiin­nerinut najuut­tar­neq nuan­narisar­para. Ilaan­nik­kut ataatsimeersuar­ner­nut najuut­tar­pugut. Taamani inuuneq nuan­neqisoq. Nalunaajaasut ilagigaangak­kit toq­qis­sisimasar­punga.

Angerlarsimaf­fitsin­nili pis­sutsit ajor­put. Ataatama inooriaasia anaanama aliasuutigigamiuk isumatsas­sutigingaaler­paa. Qulinik ukioqar­tunga anaanaga Jehovap Nalunaajaasuinik peqateqar­tarun­naar­poq. Soqutigin­nip­pian­ngik­kaluarlunga 17-inik ukioqarlunga kuisip­punga. Sivitsun­ngitsorli kristumiutut pis­suseqarun­naarlungalu ataatsimiigiar­tarun­naar­punga.

UTER­NIARLUNGA AALAJANGER­PUNGA

Katin­nerma kingunitsian­ngua il­loqarfigisan­ni Jehovap Nalunaajaasuisa utoq­qaaner­taasa marluk pulaar­paan­nga. Qanoq Jehovamut Guutimut utersin­naanin­nik nas­suiaap­paan­nga ajoqersuiar­tor­titamil­lu Cindymik atilim­mit ikior­neqar­nis­sara isumagalugu. Taamani up­persuseqar­pian­ngin­nama Cindy qin­nuigaara up­per­narsaq­qul­lugu Biibili Guutip oqaaserigaa. Biibilimi siulit­tuutit eq­quutereersut ilaat takutip­pai. Ikin­ngutigiil­lualerat­ta Biibilimi ilin­niar­titsis­sutigineqar­tut tun­ngaviusut pil­lugit atuaq­qis­saarusun­nersunga aperim­manga akuersivunga. Aatsaavis­suaq Jehovap, Guutiusup asan­nit­tup, pil­luar­nis­san­nik kis­saateqar­nera paasiler­para.

Kristumiut ataatsimiin­nerinut najuut­taleq­qik­kama filmilior­nermik inuus­sutis­sarsiutilin­nut sanil­liul­lugu Nalunaajaasut ilagis­sal­lugit nuan­narinerujus­suul­lugu paasiler­para. Meeraal­lungali misigisak­ka pis­sutigalugit al­lanik tatigisaqan­ngilanga, tamatumalu saniatigut im­minut nuan­narin­ngilanga. Ilagiin­nut ilaasor­taasup ar­nap Biibili tun­ngavigalugu paasitip­paanga misigis­sutsik­kut ajor­nar­torsiutit qanoq qaanger­neqarsin­naasut. Aam­ma qanoq ilumoor­tunik ikin­ngutitaarsin­naanerlunga paasivara.

TUSAAMASAANERMIT PITSAANERUSOQ

1997-imi uigalu Hol­lywoodimut, Califor­niamiit­tumut, nuup­pugut. Hol­lywoodimi inuit ilisimas­susermik Guutip oqaasianiit­tumik iluaqutigin­nin­nis­samut ikior­niarlugit iliuuseqar­neruler­punga. Biibilimik ilin­niar­titsineq filmiliaritit­tar­tutut tusaamasatut inuunermit nalerisimaar­nar­nerungaar­poq. As­sersuutigalugu 2002-mi Cheri, Hongkongimi nalun­ngisara, naapip­para. Misilit­tak­kavut as­singusorujus­suup­put. 1983-imi Mis­s Hongkongitut toq­qagaavoq. Aap­paaguani pin­ner­ner­paatut toq­qar­neqarama taas­suma niaqoruser­paanga. Aam­ma filmiliaritit­tar­tun­ngor­poq kingusin­nerusuk­kul­lu ilitsersuisar­tut tusaamasat suleqatigalugit filmilior­titsisar­tun­ngorluni. Aam­ma taan­na Hol­lywoodimut nuup­poq.

Cheri misigin­neqatigingaar­para tusarak­ku aap­pas­siaa uum­mam­minik unit­toorluni toqusimasoq. Buddhistitut up­perisaminit tup­pal­lersaatis­sarsin­ngilaq. Cheri uat­tul­li inup­pas­suit anguniagarisar­tagaat­tut tusaamasan­ngoraluarluni aliasul­lunilu al­lanik tatigisaqan­ngilaq. Biibilimit ilin­niak­kan­nik oqalut­tuut­taler­para, buddhistitul­li tunuliaqutaqarami eq­qar­tuk­kak­ka paasiuminaatsip­pai.

Taamaal­luni 2003-imi Vancouverimi, Canadamiit­tumi, filmilior­til­luni sianerfigaanga. Nuan­naar­palul­luni oqar­poq biiler­til­luni pin­ngor­titarsuaq isigin­naarut­torlugu oqariasaarsimal­luni: “Guuti ilumoor­toq kinaava? Qanoq ateqar­pit?” Taamaalisorlu naalagaaf­filersaarfik saneq­quk­kamiuk ateq Jehova takuaa. Misigigami Guutimit akineqarluni piaar­ner­paamik Jehovap Nalunaajaasuinik oqaloqateqarusuler­poq. At­tavigineqar­nis­saa isumagaara ul­lualuil­lu qaangium­mata Vancouverimi ilagiit Kiinamiutut oqaasil­lit ataatsimiin­neran­nut najuup­poq.

Cherip kingusin­nerusuk­kut oqarfigaanga: “Inuit taak­ku uan­nik soqutigin­ningaar­put. Misigis­sutsin­nik oqalut­tuus­sin­naavak­ka.” Taman­na tusarlugu nuan­naarutigaara, Cherimi filmilior­nermik suliaqaral­larami ikin­nguteqan­ngilaq. Cheri ataatsimiin­ner­nut najuut­tuar­poq. 2005-imili Kinami marlun­nik akisuunik filmilior­nis­samik isumaqatigiis­sut atsioramiuk Hongkongimut uter­tariaqar­poq. Nuan­naarutigeqisan­nik 2006-imi Cheri Jehovamut tun­niul­luin­nar­poq Hongkongimilu ataatsimeersuar­nermi Nalunaajaasutut kuisil­luni. Jehovamut tamak­kiisumik kif­far­torusuk­kaluarluni filmilior­nermik suliaqar­nini aporfigisar­paa, taman­nalu aliasuutigingaar­paa.

ALLANIK IKIUINERUP NUANNERSUA

2009-mi Cherip inuunera al­lan­ngorluin­nar­poq. Jehova tamak­kiisumik kif­far­torfigisin­naajumal­lugu filmilior­nermik suliaqarun­naar­niarluni aalajanger­poq. Kristumiut ilagiivineersunik arlalin­nik ikin­ngutitaar­poq. Naalagaaf­fik pil­lugu nutaarsias­samik nuan­nersumik pif­fis­saq tamaat oqaluus­sisar­tun­ngorami inuit al­lat pitsaanerusumik inooriaaseqaler­nis­saan­nik ikius­sal­lugit nuan­naringaar­paa. – Mat­thæusi 24:14.

Taava Cheri aalajanger­poq Hongkongimi Nalunaajaasut oqaluus­sisar­toqatigiit Nepalimiutut oqalut­tut ikiorsin­naajumal­lugit Nepalimiut oqaasii ilin­niar­niarlugit. Eq­qaalaas­savara Nepalimiut Hongkongimi najugal­lit amerlanerit tulut­tut Kiinamiutul­luun­niit oqalup­piarsin­naan­ngin­ner­tik al­laanerusunil­lu ileq­qoqar­ner­tik pis­sutigalugu soqutigin­ngitsuusaar­neqar­tarlutil­lu nikanarsar­neqar­tarmata. Cherip oqarfigaanga inuit taak­ku Biibilimik paasin­nin­nis­saan­nut ikius­sal­lugit as­sut nuan­naralugu. As­sersuutigalugu il­lumiit il­lumut oqaluus­sitil­luni ar­naq Nepalimiu Jiisusi pil­lugu ilisimasaqar­pian­ngitsoq Guutilu ilumoor­toq, Jehova, pil­lugu ilisimasaqan­ngil­luin­nar­toq naapip­paa. Jiisusip Ataataminut qilam­miusumut qinusar­nera Cherip Biibilimit takutip­paa. Ar­nap Guutimut ilumoor­tumut, Jehovamik atilim­mut, qinusin­naanini paasigamiuk nutaarsias­sat nuan­nersut akuerai. Sivitsun­ngitsoq uia panialu aam­ma Biibilimik atuaq­qis­saar­taler­put. – Tus­siaat 83:19; Lukasi 22:41, 42.

Takugak­ku Cherip pif­fis­saq tamaat oqaluus­sisar­nini nuan­naarutigingaaraa im­minut ima aperivunga: ‘Taas­sumatut iliuuseqar­nis­san­nut suna akor­nutigaara?’ Taamani aam­ma uanga Hongkongimi najugaqar­punga. Sal­lusuis­sutit Biibilimeersut pil­lugit ilin­niar­titsinermi iliuuseqar­nerujumal­lunga inooriaasera al­lan­ngor­tip­para. Paasivara inuit tusar­naaraangak­kit Guutil­lu oqaasianik paasin­nin­nis­saan­nut ikioraangak­kit pil­luar­nerungaaler­tarlunga.

As­sersuutigalugu ar­naq Vietnamimiu aliasut­tuar­toq qiakulasar­torlu Biibilimik atuaq­qis­saaqatigisar­para. Maan­na nuan­naar­pasin­nerulerlunilu ilagiin­neersunik peqateqar­tar­nini nuan­naarutigaa.

Cherilu tusaamasaal­luni inuunermit pitsaanerusumik inooriaaseqaler­pugut. Filmiliaritit­tar­tutut inuuneq pis­sanganaraluarlunilu uagutsin­nik tusaamasan­ngor­titsigaluar­toq Jehova Guuti pil­lugu inun­nik ilin­niar­titsineq taas­sumin­nga ataq­qinarsisitsisarmat nalerisimaar­nar­nerungaar­poq. Jiisusip oqaasiisa uku ilumoor­nerat misigaara: “Tunisineq pil­luar­nar­neruvoq tigusinermit.” – Apustilit Suliaat 20:35.