Qinnutinik tusartoqartarpa?

“Guuteqarnera qularigaluarlugu ilaannikkut qinusarpunga. Tusarnaartoqarnera qularikujukkaluarlugu nassuerutigissavara neriuttarlunga tappavaniittoqartoq. Pilluanngilanga inuuneralu siunertaqanngilaq. Guutimut uppertuunissara nangaassutigaara isumaqaraluaramami sanngiitsut kisimik Guutimut uppertuusut.” — PATRICIA,a IRLANDI.

PATRICIAP misigissusii ilisarnarpat? Ilaannikkut Guutip piunera qulariitigalugu qinusarpit? Taamaattaruit kisimiinngilluinnarputit. Tamanna ukunannga erserpoq:

◼ Tuluit Nunaanni inuit 2200-t apersorneqarnerannit erserpoq 22 procentiinnaat silarsuarmik pinngortitsisumik qinnutinillu tusarnaartartumik kinaassusilimmik Guuteqarnera upperigaat. Taamaakkaluartoq 55 procentit ilaannikkut Guutimut qinusarput.

◼ Nunavissuarni sisamani inuit 10.000-t apersorneqarnerannit erserpoq guuteqannginneraasut 30 procentingajaat qinusartut.

Sooq qularpat?

Tuluk Allanimik atilik ima oqarpoq: “Guuti upperinagu oqartarnikuuvunga isumaqarama inunnik aqutsinissaq aningaasarsiornissarlu siunertaralugu upperisarsiorneq pilersitaasoq. Eqqarsartarnikuuvungalu Guuteqarpat naapertuilluanngitsuliornerit taama amerlatiginavianngitsut. Ilaannikkulli kisimiillunga ‘kimuugaluarnersumut’ oqaluttarpunga. Aamma imminut ima aperisarpunga: ‘Qanoq ilillunga maanga pivunga?’”

Kinaluunniit taamaattunik eqqarsaateqartartoq qinnutimi Guutimit tusaaneqartarnerannik qulassutigisaminik pissuteqartarpoq. Immaqa apeqqutit uku qularnerulersitsisarput:

◼ Inuuneq pinngortitsinikkut pilerpa?

◼ Sooq upperisarsiorneq ajoqusiigajuppa?

◼ Sooq Guutip naalliunnartoqarnera akueraa?

Apeqqutit taakku akissutissarsisinnaagukkit Guutimut qinukulanerulissagaluarpit?

[Quppernerup ataani ilanngussaq]