Takuneqarsinnaasut kisimik upperineqarsinnaapput

“Upperisarsiortuni kristumiuni upperisanilu allani sammineqartaraluartut, agnostikerip upperinngilai Guuti siunissamilu inuuneq pillugit sallusuissutit paasineqarsinnaasut. Imaluunniit qaqugumulluunniit paasineqarsinnaanngippata taava ullumikkut paasineqarsinnaanavianngitsut.” — ISUMALIUTERSORTARTOQ BERTRAND RUSSELL, 1953.

UUMASORSIUUP, Thomas Huxleymik atillip, oqaaseq agnostikeri isumassarsiaraa. Huxley, Charles Darwinip nalaani 1825-mi inuuvoq pinngoriartuaarnermillu ajoqersuummik tapersersuisuulluni. 1863-imi Huxley allappoq, “kristumiussutsimik ajoqersuutigineqartutut uagutsinnik asannittumik isumassuisumillu” Guuteqarneranut uppernarsaatinik takusaqarsinnaanani.

Angutit sunniuteqarluartut taakku isumaat ullumikkut inuppassuit isumaqataaffigissavaat oqarlutik takusinnaasatik kisiisa upperiniarlugit. Immaqa oqartarput kimilluunniit sumilluunniit uppernarsaatitaqanngitsunik upperinnittut uppertikkuminartuusut.

Biibilimi piumasarineqarpa Guuti uppernarsaateqanngitsumik upperiinnassagipput? Naamerluinnaq. Biibili naapertorlugu uppernarsaateqanngitsumik upperinnittut uppertikkuminartuupput, aap, allaat sianiitsuupput. “Misilittagaqanngitsup tatigisarpai oqaaserineqartut suut tamaasa,” Biibilimi allassimavoq, “silatuup alloriarnini sianigeqqissaartarpai.” — Ussatit 14:15.

Guutimummi upperinninneq? Ilumut Guuteqarneranik uppernarsaatissaqarnerpa, aap, allaat asallutalu isumassuisumik?

Guutip pissusii takuneqarsinnaapput

Biibilimi allattup, Paulusip, Athenimiut silassorissortaanut oqalugiarnermini oqaatigaa “Guuti silarsuarmik taassumaniittunillu tamanik pinngortitsisuusoq”. Paulusip tusarnaartini qulartut oqaluttuuppai, Guutip inuiaat soqutigigai aammalu ‘ilatsinnit kimilluunniit ungasinngitsuusoq’. — Apustilit Suliaat 17:24-27.

Sooq Paulusip qularutiginngilaa Guuti piusuusoq pinngortitaminullu inunnut soqutiginnittuusoq? Paulusi kristumioqatiminut Romamiittunut allakkami pissutaasoq ataaseq oqaatigaa. Guuti pillugu oqarpoq: ‘Takussaanngitsuunera . . . silarsuup pinngortitaaneraniilli takussaagaluarput suliaasigullu ilisimaneqarlutik.’ — Romamiut 1:20.

Quppernerit tulliuttut Guutip pissusiisa ilaat pingasut pinngortitaani takuneqarsinnaasut sammineqassapput. Taakku misissorukkit imminut aperigit: Guutip pissusiinik ilinniarnera uannut qanoq sunniuteqarpa?

[Qupp. 3-mi issuagaq]

Biibilimi piumasarineqanngilaq Guuti uppernarsaateqanngitsumik upperiinnassallugu