Pinngortitami ajunaar­nersuit pillugit Biibilimi qanoq allassimasoqarpa?

Akissut Biibilimeersoq

Pinngortitami ajunaar­nersuarnut Guuti pisuuneq ajorpoq, inuilli tamakkunannga eqqugaasut ikiorusuppai. Guutip kunngeqarfiata naalliuutinut pissutaasut tamaasa – ilaatigut pinngortitami ajunaar­nersuit – peerumaarpai. Taamaalior­nissamili tungaanut maanna pinngortitami ajunaar­nersuarnit eqqugaasut tuppallersar­neqarnissaat isumagisarpaa. – Korintimiunut 2. 1:3.

• Sooq qularis­sanngilarput pinngortitami ajunaar­nersuit Guutimit pillaataan­ngitsut?

• Pinngortitami ajunaar­nersuaqar­tarnera “ulluni kingullerni” inuunitsinnut ersiutaava?

• Pinngortitami ajunaar­nersuarnit eqqugaasut Guutip qanoq ikiortarpai?

• Pinngortitami ajunaar­nersuaqar­nissaanut piareersimanissamut Biibili iluaqutaasinnaava?

• Biibilimi allassimaffiit pinngortitami ajunaar­nersuarmik eqqugaasunut tuppallersaataasut

Sooq qularis­sanngilarput pinngortitami ajunaar­nersuit Guutimit pillaataan­ngitsut?

Biibilimi oqaluttuarineqarpoq Guuti pinngortitap nukii atorlugit ilaannikkut inunnik pillaasarsimasoq. Kisianni pisimasut taakku pinngortitami ajunaar­nersuarnit allaanerupput.

• Inuit ajunngitsut ajortullu pinngortitami ajunaar­nersuarnit eqqugaasarput. Biibilimili oqaluttuarineqartuni Guutip eqqartuus­sigaangami inuit ajortut kisiisa eqqugaatittarpai. Assersuutigalugu Guutip illoqarfiit Soodoma Gomooralu suujunnaarsik­kamigit angut ajunngitsoq Lotsi paniilu marluk annaappai. (Mosesimik 1. 19:29, 30) Guutip inuit uummataat isigisin­naagamigit inuit ajortut kisiisa pillarpai. – Mosesimik 1. 18:23-32; Samuelimik 1. 16:7.

• Pinngortitami ajunaar­nersuit tassanngaannaq pisarput. Tamatumunnga akerliusumik Guuti pinngortitami nukiit atorlugit inunnik ajortunik eqqartuus­sinngin­nermini mianersoq­quseqqaartarpoq. Guutip mianersoq­qussutaanik tusarnaartut annannissamut periarfis­saqartarput. – Mosesimik 1. 7:1-5; Matiusi 24:38, 39.

• Pinngortitami ajunaar­nersuaqar­tarneranut inuit pisooqataapput. Qanoq? Mingutsitsisoqar­neranut pisuummata aamma ilaat aalajanger­tarmata aalajangersimasumi najugaqar­niarlutik sanaartor­niarlutil­luunniit nalunngik­kaluarlugu tassani nuna sajuttartoq, ulersuaqartartoq silarlorujus­suartar­torluunniit. (Saqqummersitat 11:18) Inuit aalajanger­tagaannut Guuti pisuunngilaq. – Ussatit 19:3.

Pinngortitami ajunaar­nersuaqar­tarnera “ulluni kingullerni” inuunitsinnut ersiutaava?

Aap, Biibilimi siulittuutigineqarpoq ‘naggatissap nalaani’ imaluunniit “ulluni kingullerni” pinngortitami ajunaar­nersuaqar­tarumaartoq. (Matiusi 24:3; Timuutiusimut 2. 3:1) Assersuutigalugu piffissaq inuuffigisarput pillugu Jiisusi ima oqarpoq: “Sumiiffinni assigiin­ngitsuni nerisas­saaleqisoqar­tassaaq nunalu sajuttas­salluni.” (Matiusi 24:7) Qanittukkut Guutip naalliuutinut pissutaasut tamaasa, pinngortitami ajunaar­nersuit ilanngullugit, peerumaarpai. – Saqqummersitat 21:3, 4.

Pinngortitami ajunaar­nersuarnit eqqugaasut Guutip qanoq ikiortarpai?

• Guutip eqqugaasut Biibili aqqutigalugu tuppallersartarpai. Biibilimi paasitin­neqarpugut naalliuuteqaraangatta Guutip isumassorlutalu misigin­neqatigisaraatigut. (Mosesimik 2. 3:7; Petrusimit 1. 5:6, 7) Aamma Biibilimi neriorsor­neqarpugut siunissami pinngortitami ajunaar­nersuaqar­tarunnaassasoq. – Takuuk ungalusaq “Biibilimi allassimaffiit pinngortitami ajunaar­nersuarmik eqqugaasunut tuppallersaataasinnaasut”.

• Guutip inuit aqqutigalugit eqqugaasut tuppallersartarpai. Guutip kiffai nunarsuarmiittut Jiisusimik ilaarsisarmata Guuti taakku aqqutigalugit tuppallersaasarpoq. Siulittuutigineqarpoq Jiisusip ‘aserorsimasumik uummatillit’ aamma “aliasuttut tamaasa” tuppallersassagai. (Esaja 61:1, 2) Guutip kiffai aamma taamaalior­niartarput. – Johannesi 13:15.

  Aamma pinngortitami ajunaar­nersuarnit eqqugaasut timikkut aningaasatigullu pisariaqartitaat matussuser­neqarnias­sammata Guutip kiffai ikiuisarput. – Apustilit Suliaat 11:28-30; Galaatiamiut 6:10.

Pinngortitami ajunaar­nersuaqar­nissaanut piareersimanissamut Biibili iluaqutaasinnaava?

Aap. Biibili pinngortitami ajunaar­nersuaqar­nissaanut piareersimanissamut ilitsersuutitut allataan­ngikkaluarluni iluaqutigisin­naasatsinnik najoqqutas­siaqarpoq. Assersuuteqariarta:

• Pinngortitami ajunaar­nersuaqas­sagaluarpat qanoq iliorsin­naanerlusi pilersaarusiorsiuk. Biibilimi ima allassimavoq: “Silatuup perlussaq takusin­naasarpaa qimarnguf­fissarsior­tarlunilu”. (Ussatit 22:3) Ajortoqan­nginnerani iliuuserisinnaasat pilersaarusioreeraanni silatusaar­nerussaaq. Soorlu nammattagaq ajornar­toornermi atortunik immeriarlugu tigoriaannarmut ilineqarsinnaavoq, aamma ilaqutariittut isumaqatigiis­sinnaavusi ajunaar­nersuaqassappat sumi naapissanerlusi.

• Inuuneq pigisanit pingaar­nerutiguk. Biibilimi ima eqqaasin­neqarpugut: ‘Suuteqarnata inunngoratta toqugutta nassataqarsin­naanngilagut.’ (Timuutiusimut 1. 6:7, 8) Ajunaar­nersuaqar­tillugu inuugin­narumalluta angerlarsimaffipput pigisagullu qimariaan­naasariaqarpagut. Eqqaamasariaqarparput inuunerput pigisanit tamanit pingaaruteqar­nerusoq. – Matiusi 6:25.