INUUSUTTUT APERIPPUT
Imermut morsutsitaareernerma kingorna iliuuserisassakka suuppat? – Immikkoortoq 2: Aalajaattuarit
Biibilimi allassimavoq Jehovap ‘assuarnaallutik inuusut sumik ajunngitsumik erliguutissanngikkai’. (Tussiaatit 84:12) ‘Assuarnaalluni inuuneq’ qanoq isumaqarami? Isumaqarpoq Jehovamut tunniulluinnaravit taassumunnga neriorsuutit malillugu aalajaallutit inuusutit. (Oqaluussisartup oqaasii 5:3, 4) Imermut morsutsitaareeruit qanoq aalajaassinnaavit?
Allaaserisami matumani
Ajornartorsiorninni pinertusaarit
Allassimaffik pingaarutilik: “Guutip kunngeqarfianut iserumalluta amerlasuunik annikilliuuteqaqqaartariaqarpugut.” – Apustilit Suliaat 14:22.
Qanoq isumaqartoq: Tassa kristumiut tamarmik inuunerminni ajornartorsiorumaarput. Ajornartorsiutivit ilaat, soorlu mitaatigineqarneq malersorneqarnerluunniit, kristumiuunerit pissutigalugu nalaassinnaavatit. Allalli, soorlu aningaasaqarniarnikkut ajornartorsiornerit napparsimanerluunniit, inunnik tamanik eqquisarput.
Suna ilimagisinnaagit: Ilaannikkut inuuninni pissutsit atukkatit, immaqa nuanniilliutigilikkannik, allanngortarumaarput. Biibilimi allassimavoq inuit tamarmik – kristumiuugunik kristumiuunngikkunilluunniit – nuanninngitsunik nalaataqarsinnaasut. – Jaaku 4:13, 14.
Iliuuserisinnaasatit: Ajornartorsiuteqarumaarnerit nalunnginnakku piareersarsinnaavutit. Ajornartorsiutit uppernerulernissannut Jehovamillu tatiginninnerulernissannut periarfissatut isigisakkit. (Jaaku 1:2, 3) Piffissap ingerlanerani apustilitut Paulusitut nammineq oqarsinnaalissaatit: “Guutip pissatsittarmanga suulluunniit nukissaqarfigaakka.” – Filippimiut 4:13.
OQALUTTUAQ PIVIUSOQ. “Imermut morsutsitaaqqammersunga anikka Jehovamut kiffartorunnaarput, angajoqqaakka napparsimalerput, uangalu napparsimalerpunga. Guutimut tunniulluinnarnera – taassumunnga kiffartornermik inuuninni pingaarnerpaatitsinissannik neriorsuinera – puiorlugu nammineq misigissutsikka maliinnarsinnaagaluarpakka. Tunniulluinnarnerali ajornartorsiorninni pinertusaarnissannut iluaqutigaara.” – Karen.
Siunnersuut: Juuserfi ilisarisimaleruk. Taassuma inuunera pillugu atuarsinnaavatit Mosesimik allakkani siullerni kapitali 37, 39-41. Qanoq ajornartorsiorpa, qanorlu aniguiva? Jehovap Juuserfi qanoq ikiorpaa?
Iluaqutissatit allat
Atuakkit:
Aajuk:
Usserneqarninni akiuuttuarit
Allassimaffik pingaarutilik: ‘Kinaluunniit pilerissutsiminit kajungilersinneqarnikkut usserneqarnikkullu misilinneqartarpoq.’ – Jaaku 1:14.
Qanoq isumaqartoq: Tamatta ilaannikkut pilerissusipilunnit usserneqarsinnaasarpugut, mianersunngikkutta ajortuliussutigisinnaasatsinnik.
Suna ilimagisinnaagit: Imermut morsutsitaareeruit suli “pilerissusipiluit” misigisarumaarpatit. (Petrusimit 2. 2:18) Allaat katinnginninni atoqateqarnissannut ussernartorsiorsinnaavutit.
Iliuuserisinnaasatit: Maanna – ussernartorsiunnginninni – aalajangeruk pilerissusipiluit malillugit iliuuseqarumanak. Eqqaamajuk Jiisusi oqarmat: “Kialuunniit naalakkat marluk inussiaataaffigisinnaanngilai.” (Matiusi 6:24) Kina naalakkumanerlugu nammineq aalajangersinnaavat. Jehova naalakkattut toqqaruk. Pilerissusipiluk qanorluunniit sakkortutigigaluarpat maliinnannginnissaa aalajangiusimasinnaavat. – Galaatiamiut 5:16.
Siunnersuut: Nukittuffitit sanngiiffitillu paasiniakkit. Ilinnut ajunngitsumik sunniuteqartut ikinngutigisakkit. Inuit, sumiiffiit pissutsillu eqqortuliornissannik sapernarnerulersitsisut ingalassimasakkit. – Tussiaat 26:4, 5.
Iluaqutissatit allat
Atuakkit:
“Hvordan kan jeg modstå fristelser?”
“Hvordan kan jeg holde op med at tænke så meget på sex?”
Aallussilluartuarit
Allassimaffik pingaarutilik: “Aallaqqaammulli tamaviaarsimanissitut tamassi tamaviaarnissarsi kissaatigaarput. Kissaatiginngilarput eqiasuttunngussasusi.” – Hebræerit 6:11, 12.
Qanoq isumaqartoq: Suliaminik pingaartitsinngitsoq eqiasuttunngoriaannaavoq.
Suna ilimagisinnaagit: Imermut morsutsitaaqqammerninni Jehovamut kiffartorninni nuannaarlutit iliuuseqangaarsimassaatit. Jehova asangaarpat. Piffissalli ingerlanerani sutigut tamatigut Jehovamut naalannissat sapernartilersinnaavat, tamannalu nikallussutigisinnaallugulu aallusserpiarunnaassutigisinnaavat. – Galaatiamiut 5:7.
Iliuuserisinnaasatit: Eqqortuliortuarit, aamma piumassuseqanngikkaluaraangavilluunniit. (Korintimiunut 1. 9:27) Taamaaliorninni Ataatannut qilammiusumut qanilligit ilisarisimallualerneratigut qinukulanikkullu. Aamma nuannaarlutik Jehovamut kiffartortut qanimut ikinngutigilikkit.
Siunnersuut: Eqqaamajuk Jehovap asangaaraatit ikiorusungaarlutillu. Ilaannikkut kajumissuseqarpallaanngikkaangavit eqqarsaqinak nuannariunnaaraatit. Biibilimi allassimavoq: “Qasusoq nakussatsittarpaa, nukillaangasoq pissatsittarpaa.” (Esaja 40:29) Piffissap ingerlanerani kajumissuseqarnerujumallutit ilungersornitit pilluaqqujumaarpai.
Iluaqutissatit allat
Atuakkit:
“Inuusuttuususi – ‘Annaanneqarnissarsi noqqaassutigisiuk’”
Isiginnaaruk:
Inerniliineq: Aalajaattuaruit Jehovap uummataa nuannaartissavat! (Ussatit 27:11) Aalajaakkumallutit aalajangernerit nuannaarutigissavaa, Saatanillu saassussineri akiorsinnaaniassagakkit pisariaqartitannik tuniuassavaatit.