Misilin­neqarnermi qanoq aalajaat­tuarsin­naasugut

1-2. Jiisusip Kapernaami ilinniar­titsinerani qanoq pisoqarpa?

“EQQARTUGAI ingasangaaramik! Kia tusarumas­sammagit?” (Joh 6:60) Ilinniartitat ilarpassuisa Jiisusip Kapernaami ilinniar­titsinera taama qisuariarfigaat. Jiisusi ima oqarsimavoq: “Inuup Ernerata timaa nerinngik­kussiuk aavalu iminngik­kussiuk inuuneqas­sanngilasi.” Imalu nangippoq: “Timinnik nerisoq aannillu imertoq naassaan­ngitsumik inuuneqarpoq, ullormilu kingullermi taanna makitissavara.” – Joh 6:53, 54.

² Jiisusi taama oqarmat ilinniar­titarpassuisa qimappaat. Upperfigin­nginnamikku? Naamik, taamatut pisoqan­nginnerani Jiisusip iliuusai tupigusuutigalugit ilaat ima oqarsimapput: “Taanna ilumut tassaavoq pruffiiti nunarsuarmut tikiuttussaq.” (Joh 6:14) Jiisusili upperfigigaluarlugu uppernertik misilin­neqarmat ilumoorfigiun­naarpaat.

3. Apustilit qanoq iliorpat, aamma sooq? (Aamma asseq takuuk).

³ Apustilit allatut qisuariarput. Jiisusi aperimmat taakkuttaaq qimakkusun­neraanni Petrusi akivoq: “Naalagaq, kina ornissagatsigu? Illit oqaatsitit naassaan­ngitsumik inuussutaapput. Upperaarput paasisimallugulu illernar­tuusutit Guutimit aallartitaq.” (Joh 6:68, 69) Petrusip apustileqataasalu Jiisusip oqaasiisa isumaat paasilluan­ngikkaluarlugu aalajangerput ilumoorfiginiarlugu. Sooruna? Upperil­luinnaramikku Jiisusi tassaasoq “Kristusi Guutip toqqagaa”. – Luk 9:20, 35.

4. Qanoq misilin­neqarsin­naavugut?

⁴ Jehovamut ilumoorfigin­ninnerput arlalitsigut misilin­neqarsinnaavoq. Assersuutigalugu Biibilimi allassimaffimmik paasinnit­taatsitsinnik imaluunniit oqaluus­seriaatsitsinnik allannguisoqar­tillugu qanoq qisuariar­tarpugut? Aamma imaassinnaavoq arlaatigut naalliuuteqarnerput sooq Jehovap akuerineraa paasiuminaatsikkipput. Ikinngutigil­luakkattalu ajuallatsip­patigut misigigut­taluunniit ataqqil­luakkatta nuanniitsumik pisimagaatigut ilumoorfigin­ninnerput misilin­neqarsinnaavoq.

5. Sooq uppernerput nakussatsit­tariaqarparput? Assersuuteqarit. (Kolossimiut 1:23)

⁵ Ilungersunar­torsiorfitsinni Jehova ilumoorfigis­sagutsigu upperluar­tuusariaqarpugut. Assersuusioriarta: Illu anorersuarmi nunalluunniit sajunnerani napaannassaguni qajannaatsumik toqqaveqar­tariaqarpoq. Taamatuttaaq ilungersunar­torsius­sagutta aalajaat­tuarumalluta upperluar­tuunissarput pingaaruteqangaarpoq. Taamaattumik uppernerput nakussatsit­tuartariaqarparput, qanorluunniimmi pisoqas­sagaluarpat Jehova kiffartorfigiuarusupparput. – Kor 1. 15:58; Kolossimiut 1:23 atuaruk.

6. Sooq apustilit Jiisusi ilumoorfigiuarpaat?

⁶ Inuppassuit Jiisusi qimammassuk apustilit ilumoorfigiuarpaat. Qularin­ngilluin­narpaammi Jehova sunik tamanik Pinngor­titsisuugami guutisiorfigineqar­tariaqartoq. Upperivaat Jiisusi Guutip ernerigaa taassumalu ‘oqaasii naassaan­ngitsumik inuussutaasut’. Aamma nalunngilaat Jehovap Jiisusi tapersersorlugulu iluarigaa. Maanna misilin­neqaatigisin­naasagut nikallornartut pivallaarnagit ilumoortut pingasut uppernikkut nakussatsis­sutigisin­naasagut sammeriartigit: (1) Jehova sunik tamanik Pinngor­titsisuusoq. (2) Biibili Jehovamit isumassarsiarititaasoq. (3) Nalitsinni Jehovap innuttani tapersersorai. Ilumoortut taakku upperil­luinnarutsigit qanorluunniit misilin­neqassagaluarutta aalajaat­tuarnis­satsinnut iluaqutigisin­naavagut.

JEHOVA PINNGOR­TITSISUUVOQ

7. Saqqummersitat 4:11-mi sumik eqqaasin­neqarpugut, misilin­neqarnitsinnili qanoq pisoqarsinnaava?

⁷ Saqqummersitat 4:11 atuaruk. Allassimaffimmi tassani Jehovap sunik tamanik Pinngor­titsisuuneranik eqqaasin­neqarpugut. Tamanna guutisiorfiginissaanut pissutaavoq pingaarutilik. Pinngor­titsisittalu pissaaneqangaarnera eqqarsaatigeq­qissaaraangatsigu qulariun­naartarparput qanorluunniit ajornar­torsioraluarutta ikiorsin­naagaatigut. Kisianni Saatani Guuteqar­neranik qulalersitsiniaalluni paasissutissanik eqqunngitsunik siaruar­terisimavoq. Allaat ilisimatuut ilaat oqartarput inuuneq nalaatsor­nerinnakkut pinngorsimasoq. Jehovap Pinngor­titsisuunerata uagutsinnillu asanninnerata upperil­luinnarnissaa pingaaruteqarpoq. Tamannami upperil­luinnan­ngikkutsigu uppernikkut misilin­neqarnitsinni ikiuisin­naanera qularilersin­naavarput. – Hebr 11:6.

8-9. Jehovap Pinngor­titsisuunera qularilerukku sussavit? (Aamma asseq takuuk).

⁸ Jehovap Pinngor­titsisuunera qularilerukku ingerlaannaq iliuuseqarit. Jehovap sunik tamanik pinngor­titsisimaneranik upperin­ninnerit nakussatsik­kumallugu Biibililersaarutigut misissoq­qissaakkit. Assersuutigalugu quppersakkat Er livet en Skabers værk? aamma Fem gode spørgsmål om livets oprindelse paasissutissanik ulikkaarput. Aamma jw.org-imi “Ilusilersugaava?” iserfigalugu allaaserisat videullu tassaniittut iluaqutigisin­naavatit. Jessica, qatanngut inuusuttoq USA-mi najugalik, ima oqaluttuarpoq: “Quppersagaq Er livet en Skabers værk? atuarakku uppernarsaatillu misissoq­qissaarakkit nalunngeriigara uppernarseq­qippara, tassa Pinngor­titsisoqartoq silatuumik.” Atuakkamilu Naassaan­ngitsumik pilluarsin­naavutit!-mi ilinniagassat 6-7 aamma Iteritsi! nr. 3 2021-moortoq “Pinngor­titsisoqarpa? – Qanoq isumaqarpit?” iluaqutigineqarsimaqaat. Taakkua ilaat atuareerpigit? Soormi atuaqqikkukkit?

⁹ Assersuutigalugu Guuteqar­neranik uppernarsaatit misissoq­qissaarsin­naavatit. Misissuininni Jehovap piuneranik upperin­ninnerit nakussatsin­neqassaaq, aammali Jehova ilisarisimanerulersinnaavat. (Rom 1:20) Tamatuma saniatigut ilikkakkatit Guuteqar­neranik qularinnittut ikiornis­saannut atorluarsin­naavatit. Una pingaar­nersaavoq: Jehovap Pinngor­titsisuunerminut uppernarsaatis­sarpassuarnik tunisimavaatigut.

Nebula: IAC/RGO/David Malin Images; aalisagaq aamma biilit: Mercedes-Benz USA; timmisartoq: Kristen Bartlett/University of Florida

BIIBILI JEHOVAMIT ISUMASSARSIARITITAAVOQ

10. Sooq Biibili pingaar­tipparput? (Timuutiusimut 2. 3:16, 17)

¹⁰ Timuutiusimut 2. 3:16, 17 atuakkit. Biibili tassaavoq Jehovap inunnut oqariartuutaa. Apeqqutit pingaarutillit – soorlu inuuneq qanoq aallartis­simanersoq, inuunerup suna siunertarineraa Jehovallu qanoq ilioqquneraatigut – Biibilimi akissutis­sarsineqarsin­naapput. Jehova Biibilimik atuakkior­tuummat Biibili atuakkanit tamanit pingaar­nerpaatipparput. Atuakkagut paasilluarusut­tarpagut ilikkak­kagullu sapinngisatsinnik maleruarlugit.

11. Sooq upperiviuk Biibili Guutimit isumassarsiarititaasoq?

¹¹ Sooq upperivarput Biibili Jehovamit isumassarsiarititaasoq? Upperinissaanut pissutis­sarpassuaqarpugut. Assersuutigalugu oqaluttuarisaanikkut eqqorpoq. (Luk 3:1, 2) Aamma pinngortitaq pillugu Biibilimi allassimasut eqqorluinnarput. (Job 26:7) Saatanip ilungersorluni Biibili nungutin­niarsimagaluarpaa, taamaak­kaluartorli atuagaavoq siaruarsimanerpaaq. Ukiut 1.600-t missaasa ingerlaneranni angutinit 40-t missaan­niittunit allanneqarpoq. Taamaak­kaluartoq Biibilimi allassimasut tamarmik imminnut naapertuul­luinnarput. Siunnersuutit qangarsuarli allataagaluarlutik inuppas­suarnit iluaqutigineqartarput. (Uss 13:20; 15:21; Mat 7:12) Biibilimilu siulittuutit ilarpassui eqquutereermata allassimasut tutsuigisin­naavagut. (Jos 23:14) Ilumut, upperil­luinnarparput Biibili Guutimeersuusoq!

12. Biibilip Guutimeersuunera qularilerutsigu sussaagut?

¹² Biibilip Guutimit isumassarsiarititaanera qularilerutsigu sussaagut? Jehovamut qinunikkut ikioqqussaagut misissueq­qissaarlutalu. Maluginiaruk qatanngut inuusuttoq Jordanimik atilik Nalunaajaasunik angajoqqaalik qanoq oqarnersoq: “Uppiasuun­nginnama sunaluunniit ilumoornersoq paaseqqaarlugu aatsaat upperiler­tarpara. Ilaannikkut tusakkakka atuakkak­kaluunniit ilumoornersut nalornis­sutigiler­tarpara. Taavali akissutis­sarsiumallunga Biibililersaarutigut misissor­tarpakka.” Biibilip Jehovamit isumassarsiarititaanera sooq upperineripput imminut eqqaasit­tarutta uppernikkut nakussatsissaagut. – Kor 1. 3:12, 13.

JEHOVAP INNUTTANI TAPERSERSORPAI

13. Guutip innuttai ullumikkut kikkuunersut qularilerutsigu sussaagut?

¹³ Jehovap Nalunaajaasui Guutip ullumikkut innuttarigai qularilerutsigu ingerlaannaq iliuuseqar­tariaqarpugut. Assersuutigalugu apeqqutit uku eqqarsaatigisin­naavagut: ‘Kikkut sapinngisartik tamaat Biibili najoqqutaralugu inooriaaseqarpat? Kikkut Biibilimi allassimasut tunngavigalugit aalajangiisarlutillu upperisaqarpat?’ (Tim 2. 4:3, 4) ‘Ullumikkut kikkut Jehovap piumasaatut iliorpat?’ – Mat 7:20, 21.

14. Jehovap Nalunaajaasui Matiusi 24:14-imik qanoq eqquutititseqataappat?

¹⁴ Guutip piumasaatut iliornermut tunngatillugu aperisin­naavugut: ‘Kikkut ullumikkut nutaarsiassat nuannersut oqaluus­sissutigisarpaat?’ (Mat 24:14) Akissutaa ersaril­luinnarpoq. Guutip innuttani atorpai. Jehovap Nalunaajaasuisa kisimik Guutip kunngeqarfianik nutaarsiassat nuannersut nunani 240-nit amerlanerusuni oqaluus­sissutigaat. Ukiullu 100-t sinnerlugit taamatut suliaqarsimavugut. Aallussil­luarluta oqaluus­sillutalu ilinniar­titsisarpugut. – Mat 28:19, 20.

15. Jehovap Nalunaajaasui Guutip aqqanik qanoq illernarsisitseqataappat? (Matiusi 6:9; Esaja 43:10)

¹⁵ Matiusi 6:9 aamma Esaja 43:10 atuakkit. Jehovap Nalunaajaasuinik taaguuteqarnerput ataqqinaatitut isigaarput. Inuit amerlanerit naluaat Guuti Jehovamik ateqartoq. Uagulli atiata Biibilimi atorneqaq­qilernissaa ilungersorluta sulissutigisimavarput. Guutimmi atia Biibilip allassimaq­qaarfiini 7.000-nit amerlanerusumik allassimavoq.

16. Sooq oqarsin­naavugut Jehovap Nalunaajaasuisa Johannesi 13:34, 35-milu inassut malikkaat? (Aamma asseq takuuk).

¹⁶ Johannesi 13:34, 35 atuakkit. Nunarsuarmi akerleriinnernik uumissuinermillu ulikkaartumi qatanngutigiittut asaqatigiinnerput ataasius­suseqar­nerpullu tupinnaqaaq. Nunanit assigiin­ngitsorpas­suarneersuuvugut assigiin­ngitsunillu tunuliaqutaqarluta. Taamaak­kaluartoq eqqisseqatigiillutalu asaqatigiippugut. Immaqa angalatillutit ataatsimiigiar­nikuuvutit. Taamaappat sumiikkaluarut­taluunniit uppeqatigiilluta asaqatigiinnerput maluginiarsimassavat. Ersaril­luinnarpoq Jehovap piumasani naammas­siniarlugu Nalunaajaasuni atortarai. Jehovap innuttaminik tapersersuinera eqqaamajuarutsigu misilin­neqassagutta aalajaat­tuarsin­naavugut.

JEHOVA QIMANNGISAANNARUK

17-18. Qanoq ajornar­torsiorsin­naavugut, sunali qularin­ngilarput?

¹⁷ Ulluni kingullerni pissutsit anigoruminaatsuummata tamatta ajornar­torsior­tarumaarpugut. (Tim 2. 3:1, 13) Aamma imaassinnaavoq ernumas­sutigilik­katsinnik nalaataqas­sasugut. Guutip peqatigiissortai paasilluan­ngisatsinnik aalajangiisin­naapput. Imaassin­naavorlu qatanngutitsinnit paatsoor­neqartutut ajuallatsin­neqartutul­luunniit misigisugut. Immaqa ajornar­torsiuterput imaalial­laannaq aaqqinneqarsin­naanngilaq, paasiuminaatsis­sinnaavarpul­luunniit allannguinermut aalajangiinermul­luunniit suna tunngaviunersoq.

¹⁸ Nikallorlutalu ernumalersin­naagaluarluta Jehovamut aalajaat­tuarsin­naavugut. Nalunngilarpummi Jehova Pinngor­titsisuusoq, Biibili oqaaserigaa kiisalu Jehovap Nalunaajaasui innuttarigai. Petrusip Jiisusimut oqarneratut uaguttaaq Jehovamut ima oqarsin­naavugut: “Naalagaq, kina ornissagatsigu? Illit oqaatsitit naassaan­ngitsumik inuussutaapput.”