Aappariittut qanimut ataqatigiit­tuaritsi

1. Sooq ikinngutit Jehovamit tunissutaappat?

IKINNGUTIT ilumoortut Jehovamit tunissutaapput. (Jaak 1:17) Jehovamut uagutsinnullu asannit­tuupput. Nuannaaraangatta nuannaaqatigisarpaatigut, aliasuk­kaangatta tuppallersar­tarpaatigut pisariaqar­tikkaangatsigulu unneqqarillutik siunnersor­tarluta. Tatigalugillu tamatigut naatsorsuutigisin­naavagut. Ikinngutit taamaattut “uummammut nuannaarutaapput”! – Uss 27:9.

2. Sooq aappariit ikinngutigiinnertik nakussatsit­tuartariaqarpaat? (Matiusi 19:6)

² Aappariit ikinngutin­naariin­nissaat pingaarutilerujussuuvoq. Taamaattumik aappariit ikinngutigiinnertik nakussatsit­tuartariaqarpaat. Aappariittulli ungasil­ligunik kiserliulersin­naapput, nikallorsin­naapput allaallu kamassimaalerlutik. Aappariinnertik paarilluarunikku tamanit qanitariin­nerpaajusin­naapput. (Matiusi 19:6 atuaruk). Allaaserisami matumani sammissavarput aappariit ikinngutigiinnertik qanoq nakussatsis­sinnaagaat. Sammeqqaariartiguli kristumiu katikkusuttoq inuunini naallugu ikinngutin­naassaminik qanoq toqqaasinnaasoq.

AAPPASSAMIK QANOQ TOQQAASOQARSINNAAVA?

3-4. Aappassarsiornermi suut pingaaruteqarpat? (Ussatit 31:10, Testamentitoqaq 1990-imi naqitigaq)

³ Pingaarutilimmik aalajangiin­nginnitsinni kingunerisinnaasai ajortut ajunngitsullu eqqarsaatigeq­qissaar­tariaqarpagut. Tamanna pisariaqarpoq aalajangikkagut inuunitta sinneranut sunniuteqar­tussaammata.

⁴ Inuunermi aalajangigassat pingaar­nerpaat ilagaat aappassamik toqqaaneq. Jehova aappariinnermik pilersitsisuummat soorunami aappassatsinnik toqqaaniar­nitsinni taassumunnga siulersor­tikkusussaagut. Kissaatigaa angut nuliaal­luarsin­naasumik arnarlu uiulluarsin­naassumik nassaassasut. Uagutsinnut pitsaanerpaaq Jehovap nalunngin­nerpaavaa. (Ussatit 18:22, Testamentitoqaq 1990-imi naqitigaq atuaruk;a Es 48:17, 18) Kristumiup aappassaminik tulluartumik nassaar­niarnermini najoqqutassiat Guutip oqaasianiittut iluaqutigisinnaavai.

5. Sooq imermut morsutsitaasimasumik toqqaanissaq pingaaruteqarpa?

⁵ Imermut morsutsitaagatta Jehovamut ikinngutaalerpugut. (Tuss 25:14) Taamaattumik katikkusukkuit Jehovap ikinngutaasa akornanni aappassarsiussaatit. (Kor 1. 7:39) Taamaalioruit Jehovap najoqqutas­siaanik pingaar­titsinerit takutissavat aappartaallu Jehovamit tunissutitut isigalugu. (Uss 19:14) Uppertuun­ngitsumik ersoqateqalin­nginnikkut ajornar­torsiutit pinngitsoor­tissinnaavatit. (Kor 2. 6:14) Imermut morsutsitaasimasumik nassaas­saqanngik­kuilluunniit Jehovamut asannin­ngitsumik aappassarsiornissat eqqarsaatigilin­ngisaannaruk. Imaluunniit silatusaar­nerussanngilaq ima eqqarsas­salluni: “Peerariileraluarutta ajornavianngilaq, imaassin­naavormi piffissap ingerlanerani Nalunaajaasun­ngortoq.”

6-7. Peerariinnerup nalaani apeqqutit suut akissutis­sarsineqar­tariaqarpat?

⁶ Soorunami imaanngilaq imermut morsutsitaasimasoq kinaluunniit ilinnut aappassatut tulluartuusoq. Aappassatut soqutigisaqaruit pitsaassaaq apeqqutit uku eqqarsaatigis­sallugit: “Ilaquttani qanoq pissusilersorfigisarpai? Allanik isumassuiniartuua ataqqin­nittuullunilu? Kikkut ikinngutigai? Isumaqatigin­ngisaminut qanoq qisuariartarpa? Nammineq iluarisani kisiisa malinniartarpai? Imaluunniit Biibilimi allassimasunut akerliun­ngitsumik siunnersuuteqar­toqaraangat tusarnaarumasarpa? Aningaasanut qanoq isiginnit­taaseqarpa?”

⁷ Aamma imminut ima aperisin­naavutit: “Aappassatut soqutigisama Jehova asangaarlugu ersersippaa? Sapinngisaminik ‘kinaassuseq nutaaq’ sulissutigaa? Jehovamut kiffartornermi ineriar­tortuarninni tapersersor­tigilluassavara? Anersaakkut assigiimmik anguniagaqarpugut? Ikinngutigiigin­narnata ikinngutin­naariilersin­naavugut?” (Kol 3:9, 10) Qatanngutaaguit arnaq imminut aperigit: “Qatanngut angut aappassatut soqutigisara ilaqutariinguatsinni ittuulluarsinnaava?” (Kor 1. 11:3) Qatanngutaaguit angut imminut aperigit: “Qatanngutip arnap aappassatut soqutigisama kukkusaraluartunga ittutut akisussaasuunera ataqqissavaa?” Apeqqutit ingerlaannaq akissutis­sarsineqarsin­naanngillat. Taamaattumik peerariin­nissinni peeqqat ilisarisimal­lualeruk.

8-9. Silatusaartumik aalajangiinissamut suut eqqarsaatigisas­saappat? (Aamma asseq takuuk).

⁸ Peeqqat ilisarisimal­lualerukku silatusaartumik aalajangiinissat ilimanar­nerussaaq. Allat peeqqat qanoq isumaqarfigineraat paasiniaruk. Inuttut qanoq ittuunersoq ilagiin­niittullu qanoq isumaqarfigineraat aperisin­naavatit. Assersuutigalugu maniguuttuua? Asannittuua? Ingasaas­siniartuunngila? Sarah, qatanngut arnaq Fransk Guyanami najugalik Danielimik atilimmut katissimasoq, ima oqaluttuarpoq: “Taamani Danielip qanoq ittuuneranik paasisaqarusullunga assigiin­ngitsut apersorpakka. Assersuutigalugu qatanngut angut pionereqatigalugulu ineqataa aamma ilagiinni utoqqaanertaq ikinngutigullu uagutsinnik ilisarisiman­nilluartut kiisalu ilagiinni qatanngutit arnat apersorpakka.” Aamma peeqqat saamasumik aperissavat inuunerani arlaannik pingaarutilimmik paasisariaqakkannik pisoqarsimanersoq. Tamakku maannakkut paasissallugit pingaaruteqarpoq, kingusin­nerusukkummi aappariin­nissinni ajornar­torsior­titsilersin­naapput.

⁹ Aappariil­lualersin­naanerlusi qularuteqaruit imaluunniit ikinngutitit inersimal­luartut nuannin­ngitsunik maluginiagaqarsimappata tamakku soqutaan­ngitsutut isiginngitsuusaaqinagit. Tamanna eqqumaf­figigukku peerariigin­narsinnaanerlusi imaluunniit qimassanerlusi naliliil­luarnerusin­naassaatit.b Maanna aappariit katereersimasut allaaserisap sinnerani sammeriartigit.

IMMISSINNUT PIFFISSAQARFIGISARITSI

10. Sooq aappariit imminnut piffissaqarfigisassappat?

¹⁰ Uiusoq nuliaasorlu qanorluunniit ulapitsigigaluarlutik imminnut piffissaqarfigisarunik aappariin­nerminnik nukittorsaasin­naapput. Taamaalior­tarnermikkut ullormut pisimasut, qanoq eqqarsaateqar­nerlutik qanorlu misigisimanerlutik oqaloqatigiis­sutigisarsin­naavaat, asaqatigiinnertik ersersit­tarsinnaavaat nuannarisaminnillu sammisaqaqatigiit­tarlutik.

11. Aappariit ataqatigiinnerat qanoq ulorianar­torsior­tinneqarsinnaava?

¹¹ Aappariit ataqatigiil­luartut avissaaq­qarusut­tanngillat. Soorunami ilaannikkut avissaarsimasariaqartarput. Sivisunerusumilli avissaaqqaneq ulorianaateqarsinnaavoq. Assersuutigalugu inuit ilaasa qaammaterpassuarni ilaquttatik qimallugit nunami allami sulinissartik ajoqutis­saqartinneq ajorpaat. Imaassinnaavoq aningaasarsiorluarfiunerusartoq, aappariinnulli ajoqutaal­luinnarsinnaavoq.

12-13. (a) Aappariit imminnut piffissaqarfigiumallutik qanoq iliortarsimappat? (Aamma asseq takuuk). (b) Aappariittut ataqatigiinnersi ilinnut qanoq pingaaruteqar­tigisariaqarpa? (Ungalusaq “Aappara uannut qanoq pingaaruteqar­tigissava?” takuuk).

¹² Aappariit imminnut qanillis­sutigisaminnik qanoq iliortarnersut maluginiaruk. Leah, Guamimeersoq, ima oqarpoq: “Uigalu assigiin­ngitsorpas­suarnik sammisaqaqatigiit­tarpugut. Aappaannaa qaaqqusaagaangat qaqutikkut akuersisarpugut.” Roxanne, USA-meersoq, ima oqaluttuarpoq: “Uagut ulapittuaan­nartuugatta qaqugukkut marlooqatigiis­sanerluta pilersaarusior­tariaqar­tarpugut, soorlu pingaarutilinnut allanut taamaalior­tartugut.” (Aamma takuuk Amosi 3:3). Damien, Frankrigimeersoq, ima oqarpoq: “Uagut aappaasup nuannarisaanik soqutigin­ninnermik ersersitsinissaq pingaaruteqartuusoq ilikkarparput. Piffissallu ingerlanerani aappap nuannarisaa nammineq nuannariler­tarparput.” (Mat 7:12) Katie, USA-meersoq, ima oqarpoq: “Uagut akornuser­neqanngin­niassagatta ilaannikkut mobiiligut allamut ilisarpagut.”

¹³ Aappariit anersaakkut ittunik sammisaqaqatigiit­tarnerat tamanit pingaar­nerpaavoq. Myriam, Frankrigimeersoq, ima oqarpoq: “Uagut Biibilimik atuarnermik ulloq aallarner­tarparput, taava suna nuannarinerlugu inuunitsinnilu qanoq atorsin­naanerlugu eqqartuisarpugut. Taamatut ataatsimooqatigiinnerput nuannarisaqaara.” Imalu nangippoq: “Aamma qinoqatigiik­kaangatta uima qamannga qinnutaanit tusaasin­naasarpara Jehovamut qanoq asannitsigisoq.” Katie, siuliani eqqaaneqareersoq, ima oqarpoq: “Oqaluus­seqatigiinnerput uagutsinnut nuanner­nerpaajusarpoq. Aappaasoq upperisani pillugu oqaluussisoq tusaallugu qiimmaal­lannartaqaaq, taamaalillutalu immitsinnut nutaanik ilikkagaqarfigisarpugut.” – Uss 27:17.

AJORNAR­TORSIUTEQALERUSSI ATAQATIGIIN­NIARTUARITSI

14-15. Sooq aappariit ajornar­torsiutitik ilungersorlutik aaqqinniar­tariaqarpaat? Assersuuteqarit.

¹⁴ Inuit tamarmik naammal­luinnan­ngitsuugamik aappariittut ajornar­torsiortarput. Biibilimi piviusorsiortumik allassimasoqarpoq aappariit ‘ajornar­torsiuteqar­tassasut’. (Kor 1. 7:28) Aappariit sooq ajornar­torsiutiminnik ilungersorlutik aaqqiiniar­tariaqarpat qanimullu ataqatigiit­tuarlutik?

¹⁵ Assersuut una eqqarsaatigiuk: Illorsuaq imaluunniit eqqumiitsuliaq tusaamasaq ajoqusersimappat piginnittut iluarseq­qinnissaa sulissutigissavaat. Iluarsar­tuunneqar­nissaanut ukiut arlaqas­sagaluarpataluunniit aningaasarpassuit atortoris­saarutillu allat atorlugit iluarsar­tuukkumassavaat. Soormitaavaana? Illorsuaq imaluunniit eqqumiitsuliaq taakkununnga naleqarmat. Tamatumunnga assingusumik aappariinnerit tamarmik naleqarput. Allaat aappariil­luarnerpaat ajornar­torsiulertarput. Soorlu illorsuaq imaluunniit eqqumiitsuliaq iluarsar­tuunneqaq­qissinnaasoq, taamatuttaaq aappariit ajornar­torsiortut siornatigutut qanimut ataqatigeeq­qilersin­naapput. Qangatut ataqatigeeq­qilerniarneq sivisusinnaavoq piffissar­tornarlunilu, aappariilli tamaviaarnerat Jehovap nuannaarutigissavaa. (Mal 2:16) Taamaaliorunik asaqatigiinnertik ataqqeqatigiin­nertillu ersersissavaat, aammali takutissavaat Jehova, aappariinnermik pilersitsisoq, asallugulu ataqqillugu.

16. Aappariin­nerminni ajornar­torsiuteqartut Korintimiunut allakkat siulliit 13:4-8a qanoq iluaqutigisin­naavaat? (Asseq aamma ungalusaq “Ikinngutigiinnissi nakussatsin­nissaanut iluaqutissat” takuuk).

¹⁶ Aappariittut ajornar­torsiuteqalerussi averuser­niapallaqinasi. (Kor 1. 7:10, 11) Immikkulli imminut ima aperigitsi: “Aappariinnerput nukittunerulersin­niarlugu iliuuseqar­nerusin­naavunga?” Asanninneq pillugu Biibilip oqariartuutaa misissoruk eqqarsaatigalugulu Korintimiunut allakkat siulliit kapitali 13-imi eqqaaneqartut ilaat pikkorif­figinerulersin­naanerlugit. (Korintimiunut 1. 13:4-8a atuakkit). Aapparpit qimannissaa eqqarsaatigiin­narnagu qanilleq­qinnissaanut periarfis­sarsiortuarit. Aapparpit allanngornissaa eqqarsaatigiin­narnagu illit aappariinnissi nukittorsar­nissaanut iliuuserisin­naasatit eqqarsaatigikkit. Jehovamut siulersoq­qullutit qinugit. Biibililersaarutaatitsinni videunilu atorfis­saqartitannik ujaasigit. Aamma utoqqaanertat qatanngutil­luunniit inersimal­luartut allat siunnersor­tissarsiorfigisin­naavatit. Biibilimi allassimavoq aappariinnerup assigigaa ‘allunaasaq pingasulik kittorajaatsoq’, Jehovalu aappariin­nissinni pingajuuvoq nukittunerpaaq. Kissaatigisai naapertorlugit iliuuseqarussi aappariinnersi nukittuujussaaq. – Oqal 4:12.

17. Katinnissamik eqqarsaateqartut aamma katereersimasut qanoq pillualersin­naappat?

¹⁷ Jehovap kissaatigaa kiffani tamarmik, aamma katinniarlutik eqqarsaateqartut katereersimasullu, pilluassasut. Taamaattumik kisimiit­tuuguit katikkusul­lutillu inuunerpit sinnerani inooqatissannik toqqaaniarninni eqqarsarluarit. Katereersimaguit aappallu ikinngutigiinnersi nukittorsar­tuarsiuk. Aappariin­nissinni ajornar­torsiutit nalaassin­naasasi suleqatigiillusi Jehovap ikiuineratigut aaqqinniar­tarsigit. Taava asaqatigiillusi aappariittut pilluassaasi! – Oqal 9:9.