Oqaluussisartut misilittagartuut ilinniarfigikkit

Ilagiinni oqaluussisartut misilittagartuut pingaartippavut. Taakkua ilaat ukiorpassuarni Jehova kiffartorfigisimavaat. Ilaallu qanittukkut oqaluussillaqqinnerulersimapput. Ullussani makkunani kingullerni Jiisusip oqaluussinerup ajoqersuganngortitsiortornerullu annertusisinnerisigut ilagiinnik siulersuinera oqaluussisartut taakkua misigisimavaat. (Matt 28:19, 20) Oqaluussinermi tamatumani peqataaniarlutik unamminiarnartunik misilinneqaatinillu nalaataqaraangamik “pissaaneq asseqanngitsoq” pisarsimavaat. (2 Kor 4:7) Oqaluussisartut misilittagartuut ilinniarfigilluarsinnaavavut. Periarfissaqaraangamik ilikkarsimasaminnik allanik avitseqateqartarnertik nuannaarutigisarpaat. (Tuss 71:18) Taamaattumik taakkua ilinniarfiginissaannut periarfissarsiortarpugut. Qanoq taamaaliorsinnaavugut?

Oqaluussinermi. Oqaluussinerput sunniuteqarluassappat oqaluussisartut misilittagartuut misilittagakitsullu ilinniartinneqartariaqarput. Oqaluussisartut misilittagartuut oqaluusseriaasiat maluginiarneratigut ilikkagaqarluarsinnaavugut. (Takuuk allaaserisaq “Oqaluussininni aallussilluartuarit” Napasuliaq Alapernaarsuiffik februaarip 15-iat 2015-imoortumi qulequtaaqqap “oqaluussisartunngorlaat ikiukkit”-mi immikkoortup pingajuat). Taakkua oqaluusseqatiginerat qanoq iluaqutigisimaviuk?

Oqaluussisartoq piukkunnaatilik oqaluusseqaterisinnaaviuk? Oqaluussisartoq peqqiilliuteqarpat immaqa ilaanneeriarlusi taassuma angerlarsimaffiani illit atuaqqissaaqatigisartakkat Biibilimik atuaqqissaaqatigisinnaavarsi. Atuaqqissaareerussi oqaluussisartoq aperisinnaavat atuaqqissaaqatigiinneq qanoq isumaqarfigineraa aamma siunnersuutissaqarnersoq.

Ilagisakkit. Oqaluussisartut misilittagartuut ilisarisimalerumallugit ilagisakkit. Taakkua arlaat apersorniassagakku ilaqutariittut atuaqqissaaqatigiinnissinnut peqataanissaanik kajumissaarsinnaavat. Oqaluussisartoq peqqiilliuteqarpat angerlarsimaffiani ilaqutariittut atuaqqissaaqatigiinnissamik pilersaarusiortoqarsinnaava? Qanoq Jehovamik Nalunaajaasunngorsimanersoq aperisinnaavat. Qanoq pilluaqquneqarpa? Ilagiinni qanoq siuariartoqartigisimava? Jehovamut kiffartornini qanoq iluaqutigaa?

Ilimasuppallaarniaqinak. Uagutsitut oqaluussisartut misilittagartuut oqaluussinermi ‘tunissutinik assigiinngitsunik pigisaqarput’. (Rom 12:6-8) Ilaat ukioqqortusigamik immaqa uagutsinnik sivikinnerusumik peqateqarsinnaapput. Aalajaallutilli Jehovamut kiffartornermi misilittagaqarluarmata ilinniarfigilluarsinnaavavut.