Suna illit ‘usorsisimaarutigaajuk’?
1. Qaammatit naaneri tamaasa suna usorsisimaarutigisinnaavarput?
1 Qaammatit naaneri tamaasa angalaarsimanermut nalunaarusiaq tunniutileraangakku suna illit ‘usorsisimaarutigisarpiuk’? (Gal 6:4) Specialpioneritut oqaluussinermut akunnerit 130-t nalunaarutigisimagukkit imaluunniit akuerineqarlutit oqaluussisartutut minutsit 15-it oqaluussinermut nalunaarutigisimagukkit, tamatta sapinngisarput tamaat Jehovamut kiffartorsimanerput nuannaarutigisariaqarparput. — Tuss 100:2.
2. Sooq Jehovamut kiffartornitsinni ilungersuussissaagut?
2 Jehovap, nunami qilammilu Kisimi Oqartussatut pigisatta pitsaanersaat pisassaraa. (Mal 1:6) Taassumunnga asanninnerput pissutigalugu piumasaata naammassinissaanut inuunerput tunniulluinnarsimavarput. Taamaattumik ullup naanerani imaluunniit qaammatip naanerani piffissatta, piginnaasatta Jehovamullu kiffartornitsinni nukitta ‘inereqqaataat’ tunniukkutsigit usorsisimaaruteqassalluta pissutissaqarluarpugut. (Uss 3:9) Nalunngeqatiginnissuterpulli allatut malunniuppat qanoq pitsaanerusumik suliniuteqarsinnaanerluta eqqarsaatigisariaqassavarput. — Rom 2:15.
3. Sooq silatusaarnerussanngila allanut naleqqiutissagutta?
3 ‘Allanut naleqqiussinata’: Silatusaarnerussanngilaq allanut imaluunniit qanga nukissaqarluarnerunitsinnut naleqqiutissagutta. Pissutsit allanngortarput. Piginnaasavut allanngortarput. Allanut naleqqiussineq unammillernermik imaluunniit imminut naammagisimaarinnginnermik kinguneqarsinnaavoq. (Gal 5:26; 6:4) Jiisusi naleqqiussineq ajorpoq. Akerlianilli inuup sapinngisai naapertorlugit nersualaarisarpoq. — Mark 14:6-9.
4. Jiisusip talentit pillugit assersuusiaa pingaarutilimmik qanoq ilinniarfigaarput?
4 Jiisusip talentinik paarititanik assersuusiaani ‘sulisut immikkut piginnaasai’ naapertorlugit talentinik tunivai. (Matt 25:15) Naalagaq uteqqimmat suliaallu paasiniarlugit, piginnaasaat pisinnaasaallu naapertorlugit eqiasuillutik suliniutaannik nersualaarpai naalakkallu tipaatsuffianut iseqqullugit. (Matt 25:21, 23) Uaguttaaq Naalagaaffik pillugu oqaluussilluta ulapputeqaratta ilimagisinnaavarput Guutimik iluarissaallutalu usorsisimaarutigineqarumaartugut.