’Oqaaseq oqaluussissutiguuk’ — nukinginnarpoq
1 Nukinginnartumik suliakkerneqaruit qanoq qisuariassavit? Apustilip Paulusip suliassaq nukinginnartoq eqqartorpaa, oqarami: ’Oqaaseq oqaluussissutiguuk, . . . suliuarit.’ (2 Tim. 4:2) Suliuartoq uummarissuuvoq. Illit kiffartornerit pillugu taama oqartoqarsinnaava?
2 Paulusip tusarsimagunarpaa kristumiut ilaat kiffartortillutik ’piniaqqissaagassatik eqiagisimagaat’. (Rûm. 12:11) Suliamik inernerinik allanillu ikiuinikkut nuannaarnissaagaluamik killiliisimapput.
3 Kiffartornermut Jesusip isiginnittaasia: Jesusip kiffartornini nuannaarutissarsivigisimavaa. Oqarpoq: ’Neqissara tassa aallartitsisima peqqusaa malillugu suliareqqusaalu naammassillugu.’ Jesusip maligassiaa oqaasiilu ’narsat qaqortittunik katersugassaqalereersut’ pillugit ajoqersugaanut kajumissinarlunilu iliuuseqarusussuseqalersitsivoq. (Juá. 4:34, 35) Suliassaq nukinginnartutut isigaa kiffartorneranilu tamanna ersarippoq. Ajoqersukkaminut oqaasiitigut tamanna aamma erserpoq oqarmat ’katersugassat inuat qinnuvigisaqqullugu sulisussanik katersuiffimminut aallartitseqqullugu.’ (Mat. 9:38) Jesusip nalunngilaa suliassani tassaasoq oqaluussineq, sulianilu naammassiniarlugu sumilluunniit akornuserneqarumanani aalajangersimavoq.
4 Uagummi? Ullumikkut oqaluussinissaq aatsaat taama nukinginnartigaaq. Nunarsuarmi nunat ilarpassuinit narsat katersugassat qaqortipput. Allaat nunani oqaluussiffigineqareersimasuni ukiut tamaasa tusindilippassuit kuisittarput. Ulluni makkunani aaqissuussaanerup matuma naggatissaa qanillilluinnartillugu ’Naalakkap suliaanik naammassisaqangaartuinnarpugut.’ (1 Kor. 15:58) Naalagaaffik pillugu oqaluusinissamut nukivut tamaasa atornissaat aatsaat taama pingaaruteqartigaaq.
5 Taamaattumik nutaarsiassamik nuannersumik inuit anguniarlugit illumiit illumut aamma sumiluunniit naapitatsinnut oqaluussilluta ilungersorniarta. Sapinngisarput tamaat oqaluusseqataagutta takutissavarput Naalagaaffiup soqutigisai inuunitsinni salliutikkivut. (Mat. 6:33) Aalajaalluta qanoq ilisukkulluunniit oqaluusseqataajuarutta nuannaalissutigissavarput.