Ilissi inuusuttut — anersaakkut ittunik sunik anguniagaqarpisi?
1 Jehovap nalunngilaa pilluarneq anguniassagaanni siunertaqarluartumik sulisarneq aammalu piviusorsiortumik anguniagaqarneq qanoq pingaaruteqartigisut. (Takuuk Mosesimik allakkat siulliit 1:28; 2:15, 19.) Oqaluussinissamik ajoqersuinissamillu suliassaqartinneqarpugut. Paratiisimi naassaanngitsumik inuunissamik anguniagaqarpugut. Tamatumali tungaanut anersaakkut siumukariartornartunik anguniagaqartariaqarpugut nukitta atukkattalu kukkusumik atunnginnissaat pinngitsoortikkumallugu. — 1 Kor. 9:26.
2 Meeqqanut inuusuttunullu piviusorsiortumik anguniagaqarneq: Meeqqat inuusuttullu teokratiimik anguneqarsinnaasunik imminnut naleqquttunik anguniagaqartariaqarput. (1 Tim. 4:15) Meeqqat minnerusut ilaasa angusimavaat Biibilip atuagartaasa aqqisa alanngaarlugit ilikkarnissaat naak atuarsinnaalinngikkaluarlutik. Ilaqutariittut atuaqqissaaqatigiinnermi meeqqat ataatsimiinnernut piareersarnissaq ilinniartarpaat taamaalillutik namminneq oqaatsitik atorlugit akisarnissartik Teokratiimillu Atuarfimmut peqataanissartik anguniarsinnaallugit. Angajoqqaatik oqaluussiartornermut ilagigaangamikkik nalunaajaateqarnissartik ilinniartarpaat taamaalillutillu kuisimanngitsutut oqaluussisartunngornissartik anguniarsinnaallugu. Angajoqqaat qitornatik oqaloqatigisariaqarpaattaaq Jehovamut tunniulluinnarnissamik kuisinissamillu anguniagaqaqqullugit.
3 Inuusuttuaraaguit anersaakkut ittunik sunik anguniagalersimavit? „Pinngortitsisit eqqarsaatiginiaruk“ anguniagassanik inuunermi pingaaruteqarnerusunik aallussilluarnikkut. (Nal. oq. 12:1; Tuss. 71:17) Soormi atuanngiffinni qaammatit ilaanni ikiorti-pioneeriunissaq misilikkukku? Piffissaq tamaat oqaluussisartunngornissaq nalinginnaasumik pioneerinngorlutit eqqarsaatigisimaviuk? Imaluunniit oqaatsinik allanik ilinniaruit taamaalillutit siunissami gruppimi ilagiinniluunniit allamiutut oqaasilinni imaluunniit najukkanni allamiluunniit ikiuuteqataasinnaallutit? Ullumikkut Betelini kiffartortut, ilagiinnut nakkutilliisut imaluunniit ajoqersuiartortitat piffissaq tamaat atorlugu immikkut kiffartuutillit amerlasuut suli atuarfimmiitillutik kiffartuusseriaatsinik tamakkuninnga anguniagaqareersimapput. Sooq taamatulli iliornissat misilikkukku?
4 Meeraagaluaqalutit Jesusip maligassiaa malinniarsinnaavat. Taanna 12-inik ukioqarluni nakimaalluni anersaakkut tunngassunik oqalussimavoq. (Lúk. 2:42-49, 52) Peqqinnartumik anguniagalernikkut, assersuutigalugu nammineq atuaqqissaartarnissamik, ullut tamaasa Biibilimik atuartarnissamik aalajangersimasumillu ataatsimiinnerni kristumiut inersimalluartut ilagisarnerannik aammalu oqaluussiartornermik, Jesusitut allat Guutip naalagaaffianik ajoqersorneratigut pikkorissisinnaavutit.