Tusagassamik nuannersumik saqqummiussineq — ikioqatigiilluta Bibelimik atuaqqissaaqatitaarniarnitsigut
1 Jehovamik asannittut tamarmik kissaatigaat naammassisaqarluartumik kiffartornissartik. Jesusip ima inappaatigut: „Taamaattumik aallaritsi inunnillu inuiannit tamaneersunik ajoqersuganngortitsigitsi, . . . ajoqersorsigillu ilissinnut peqqusakka tamaasa maleruaqqullugit.“ (Mat. 28:19, 20, NV) Bibelimik atuaqqissaaqatitaarnissat kissaatigigukku tamatumunngalu piffissap pisariaqartup atornissaanut piumassuseqaruit, taava Jehovamit ikiorneqarnissat siulersorneqarnissallu qinnutigisaruk ilagiillu aqqutigalugit siunnersuutit atoriaannaasut maleruarlugit. Taava atuaqqissaaqatiginninnissat sukkulluunniit nakimanak neqeroorutigisinnaassavat. — Mat. 7:7, 8.
2 Ilagiit atuakkamik atuaqqissaarneranni aqutsisorisartakkassi Bibelimik atuaqqissaaqateqartarneq soqutigisaraa immikkullu akisussaaffeqaatigalugu. Bibelimik atuaqqissaaqatitaarnissamik kissaateqarninnik taanna oqaloqatigiuk. Taava taassuma isumagissavaa oqaluussisartumik misilittagalimmik piffissami aalajangersimasumi suleqateqarnissat. Anguniakkat tassaavoq (1) Bibelimik atuaqqissaaqatitaarnissat siuariartortumillu ingerlannissaata ilikkarnissaa kiisalu (2) qanoq ililluni Bibelimik atuaqqissaaqatitaarsinnaanermik misilittagaqalernissat.
ALLAT MALIGASSIAAT ILINNIARFIGIKKIT
3 Suli Bibelimik atuaqqissaaqatitaarsimannginninnut pissutaasinnaavoq inunnut atuakkanik atuagassianilluunniit pisisimasunut allatigulluunniit soqutiginninnermik ersersitsisimasunut atuaqqissaaqatitaarinissaat siunertaralugu pulaaqqiaartannginnerit. Sapinngisannik pulaaqqiaartarnissaat aalajangiuguk. Tamatumani allattueqqissarnissaq soorunami pisariaqarpoq. Oqaluussisartup suleqatigisavit qanoq ilillutit taamaaliornissannik ilitsersuussinnaavaatit. Atuaqqissaaqatitaarnissaq siunertaralugu pulaaqqiinissassinnut marluullusi sungiusarsinnaavusi. Inuit orneqqitavit pitsaanerusumik periaaseqarlutit soqutiginnilerseqqinniarnissaannut tamanna iluaqutigissavat.
4 Suleqativit pulaarnerminik aallarneeriaasia maluginiartaruk. Qanoq ililluni pulaakkaminik oqaloqatigiinnermut ilanngutsitsisarnera maluginiartaruk. Eqqarsaatigiullu qanoq ilillutit illit tamanna malissinnaanerlugu. Pulaakkani paasinninnissaanut ikiuutaasunik aperineratigut oqaloqatigiinnermut ilanngutsinniartarpaa imaluunniit allassimaffimmi oqaloqatigiissutaasumi eqqarsaammut qanoq isumaqarneranik aperineratigut taamaaliortarpa? Pulaarnermi ilikkakkavit pulaareernerup kingornagut uteqqinnissaat iluaqutaassaaq. Taava tulliani angalaaleruit tamakkua malinnissaat ilungersuutiginiariuk.
5 Arlarsi atuaqqissaaqatitaarpat qanoq ilillusi tamassi suleqataaffigisinnaanerlugu suleqatillu oqaloqatigiissutigissagussiuk iluaqutaassaaq. Immaqa allassimaffiit pingaarutilinnut paasissutaasut atuakkami ilanngunneqarsimasut paarlakaallusi atuartarsinnaavasi tamakkuninngalu paasinninnissaanik pulaagarsi ikiorlugu. Atuaqqissaareernerup kingorna oqaloqatigiissutigisinnaavarsi qanoq pitsaanerpaamik atuaqqissaarneq aqunneqarsinnaanersoq, atuaqqissaaqatigisap paasinninnissaanut ikiuutaasunik qanoq aperisarsinnaanerlusi, qanoq ilillusi sapaatip-akunnerata tulliani atuaqqissaaqqinnissamut soqutiginnilersissinnaanerlugu aammalu qanoq ilillugit nutaat peqatigiiffimmut siulersorneqarsinnaanersut.
ILLOQARFIUP IMMIKKOORTORTAI OQALUUSSIFFIGISASSAT ALLANNGORTITERNEQARAANGATA
6 Ilagiit nutaat pilersinneqaraangata imaluunniit illoqarfiup immikkoortortai ilagiit oqaluussiffigisassaat aaqqissoqqinneqaraangata atuaqqissaaqatigisalersimasavit oqaluussisartumut allamut isumagisassanngortinnissaa pisariaqalersinnaavoq. Taava oqaluussisartoq piukkunnartoq ilagiinnut allanut ilaasortaasoq atuaqqissaaqatigiinnermut ilagisinnaavat. Sapaatip-akunnialunngui qaangiuppata oqaluussisartup taassuma atuaqqissaaqatigiinneq aquttalersinnaassavaa. Atuaqqissaaqatigisartakkamik allamut isumagisassanngortitsineq ajoqersuganngortitsiniarnerup ilaannaraa, soorunamilu soqutiginnittumut iluaqutaanerpaamik iliornissarput kissaatigaarput. — Fil. 2:4.
7 ’Inuiannik tamanik aalangaartitsinissaminik’ Jehovap neriorsuunni ilumut eqquutissimavaa, maannalu illuni erlinnangaartunik immerpaa. (Hagg. 2:7, NV) Inunnik allanik Jehovamik ilisarsilersitsiniaalluni asannilersitsiniaallunilu ikiuineq pisinnaatitaaffiuvoq immikkut ittoq. Atuakkamik atuaqqissaaqatigiittarnermik aaqqissuussaanerup iluani suleqatigiikkutta ilavut amerlanerusut nuannaarutigisaminnik Bibelimik atuaqqissaaqatiginnittalersinnaassapput taamaalillutillu inuit naapertuilluarnermik nuannarisaqartut Guutimit iluarisaalernissaannik inuunermillu naassaanngitsumik angusinissaannik ikiorsinnaassallugit. — Juán. 17:3.