Uppeqatitit avissimasut tapersersukkit — Qanoq?

Arnap uppeqatini avissimasoq tuppallersaraa

Avittarneq nalinginnaammat avissimasunik nalunngisaqassagunarputit. Inuit avissimasut misigissutsikkut anniaatit naammagalugit atortariaqartarpaat. Imaassinnaavoq kamattut, peqqissimisut, isumatsassimasut kanngusuttullu. Qatanngut angut ima oqaluttuarpoq: “Avikkatta nuliakuma niviarsiaraatitsinnik marlunnik peqateqaqqujunnaarpaanga. Tamanna kikkunnit tamanit soqutigineqanngitsutut allaallu Jehovamit imminiiginnarneqarsimasutut misigilissutigaara. Inoorusukkunnaarpunga. Piffissalli ingerlanerani eqqunngilluinnartumik eqqarsartaaseqarsimallunga paasivara.”

Imaassinnaavoq aveqqammersut ilaat qatanngutinit ilagiinniittunit soqutigineqanngitsutut imaluunniit qanoq misiginerminnik paasineqanngitsutut misigisut. Immaqa eqqartuunneqartutut ingalassimaneqartutulluunniit misigissapput. Piffissalli ingerlanerani avissimasut atukkaminnik sungiussiartuaalernerminni immaqa allanit asanninnermik paasinninnermillu ersersitsivigineqangaarsimanertik paasissavaat.

KISERLIORTUTUT AJATTORNEQARTUTULLU MISIGINEQ

Imaassinnaavoq qatanngut avissimasoq pitsaanerpaamik ikiorniagaraluarput ilaannikkooriarluni kiserliortutut ajattorneqartutullu misigisassasoq. Qatanngut arnaq oqaluttuarpoq ukiuni arfineq-pingasuni avissimareeraluarluni ilaannikkut asaneqanngitsutut misigisarlunilu nikallungasarluni. Taamatut misigileraangami kisimiilluni qiarusuinnalertarpoq.

Avissimasut allanit immikkoornialinnginnissaat pingaaruteqarpoq. (Uss 18:1) Tamatumali saniatigut angutaagunik arnamit arnaagunillu angummit tuppallersarneqarusuttarneq mianersuutigisariaqarpaat. Tamanna naleqqutinngitsumik misigissuseqalersitsisinnaavoq.

Qatanngutivut avissimasut kiserliortutut, ajattorneqartutut siunissarluunniit pillugu annilaangasutut misigileraangata Jehova ilaarlugu misigissusii paaserusuttarlugillu sapinngisatsinnik tapersersorniartarpavut. (Tuss 55:23; 1 Petr 5:6, 7) Ikinngutitut ilumoortutut ikiuinitsinnik qujamasuutiginninnissaat qularinngissinnaavarput. — Uss 17:17; 18:24.

QANOQ TAPERSERSUISINNAAVIT?

Pisariaqartitsisunut iluaqutaangaarsinnaavit? Allaaserisap aallaqqaataani allaatigineqartutut misigisut qanoq ikiorsinnaavigit? Biibilimi qanoq allassimasoqartoq kristumiullu ilumoortut qanoq tapersersuisarnerat eqqarsaatigikkit.

Tusarnaaqqissaartarit. (Uss 16:20, 23)

Aveqqammersut ilaasa susoqarsimanera oqaloqatigiissutigerusuttarpaat allalli oqaloqatigiissutigerusunneq ajorpaat. Taamaattumik misigissutsiminnik aniatitsineranni tusarnaarusunnerit susassarinngisannilli tusarnaarusunnginnerit erseqqissumik oqaatigiuk. Oqaloqatigiinnermi isumatsassimangaarnertik pissutigalugu immaqa kingusinnerusukkut peqqissimissutigisassaminnik oqaaseqartassapput. Erloqinartorsiornerannik paasinninnerit ikiuinissannullu piareersimanerit pillugit qularunnaarsikkit. — Uss 12:25; Rom 12:15.

Soqutiginninnermik ersersitsisarit. (Fil 2:4)

Ulluinnarni ikiuinissannut periarfissarsiortarit. Piffissap ilaani qatanngut allaat annikitsualunnut tunngatillugu ikiorneqarnissaminik pisariaqartitsisinnaavoq. Pisassaqarpat biiliukkumasinnaallugulu angerlarsimaffiani iluarsaatassanik ikiorumasinnaavat. Taamatut ikiuinerit avissimasut atukkaminnik allanngorsimasunik iluatsittumik naammaginnillutik atuinissaminnut iluaqutigisinnaavaat.

Jehovap atugarineqartunik paasinnissinnaaneranik avissimasoq qularunnaarsiguk.

Naleqanngitsutut misigigaluartoq Jehovamit naleqartinneqangaarnera pillugu qularunnaarsiguk. Jehovap kiffai tamarmik asseqanngilluinnarlutillu ‘qupaloraarsuppassuarnit pingaarnerupput’. (Matt 10:29-31) Jehova uummatinik misissueqqissaartarami avissimasut paasisinnaavai. Kiffani aalajaatsut imminiiginnanngisaannassavai. (Uss 17:3; Tuss 145:18; Hebr 13:5) Taamaattumik avissimasoq sallusuissummut asanninnera Guutimullu kiffartorniarluni iliuuserisartagai pissutigalugit Guutimit naleqangaartutut isigineqarnera pillugu qularunnaarsiguk. — Fil 2:29.

Avissimasoq ilagiinniittunut qanittumik attaveqarnissaanut kajumissaaruk.

Ilaasa ataatsimiinnernut najuunnissartik sapernartissinnaavaat. Erloqinartorsiornerminnili pinertusaarnissamut ataatsimiinnerni pisariaqartumik nakussatsinneqartarlutillu sapiissuseqalersinneqartarput. Ataatsimiittarnivut ‘ineriartuutaapput’. — 1 Kor 14:26; Tuss 122:1.

Avissimasoq qinusarnikkut, atuaqqissaartarnikkut eqqarsaatiginneqqissaartarnikkullu Guutimut attaveqarnerminik nakussatsitsinissaanut kajumissaaruk. (Jaak 4:8)

Jehova Ajugaqanngitsuugaluarluni qilammiittuugaluarlunilu maniguuttunik ‘nikasunillu’ nakussatsitsiniarluni neriorsuisimavoq. Qinusarnikkut atuaqqissaartarnikkullu Guutimut qanillinitsinnik tamatta iluaqutiginnittarnerput pillugu avissimasoq eqqaasiguk. — Es 66:2.

Oqaluusseqatigiumajuk ataatsimiinnernulluunniit piareersaqatigiumasarlugu.

Tamanna kristumiup avissimasup inooriaatsiminik sungiussiniarnermini imminut tatiginerulissutigisinnaavaa. Qatanngut arnaq ikinngutiminik avissimasumik tuppallersaasimasoq ima oqarpoq: “Akuttunngitsumik oqaluusseqatigiittarpugut. Anguniagarput angugaangatsigu nuannaalertarpugut. Ilaannikkut ataatsimiinnermut piareersaqatigeeriarluta mamartunik nerisassioqatigiittarpugut.”