Biibili inuit inuunerannik allannguisitsisarpoq
ARNAP inuusuttup peroriartornermini upperisimasaminut uternissaminut suna killinneqaatigaa? Oqaluttuaa atuaruk.
“Misigivunga inuunera maannakkut pitsaanerusumik siunertaqalersoq.” — LISA ANDRÉ
UKIOQ INUUIA: 1986
INUNNGORFIA: LUXEMBOURG
SIORNATIGUT INUUNERA: ‘ERNERTUT TAMMARALUARTUTUT’ INUUVUNGA
INUUNINNI PEREERSUT: Illoqarfeeqqami eqqiluitsumi eqqissisimanartumi pigissaarfiusumilu Bertrangemi Luxembourgip eqqaani peroriartorpunga. Qatanngutigiit tallimaasuni nukarlersaavunga. Angajoqqaakka Jehovamut Nalunaajaasuupput, taakkulu qatanngutinnut uannullu kristumiut najoqqutassiaat puiuikkiutsinniarlugit ilungersortuarsimapput.
Inuusuttuaranngorama Jehovap Nalunaajaasuisa ajoqersuutaat ilumoornersut qularilerpakka. Aallaqqaammut qularnera soqutiginngitsuusaarpara uppernikilligaluttuinnarpungali. Angajoqqaama ajunngitsumut saannissara sulissutigiuaraluarpaat, uangali ikiuiniarnerat itigartippara. Angajoqqaama nalusaannik inuusuttut oqartussaasunut ataqqinninngitsut kammalaatigilerpakka. Killeqarnatik inooriaasiat assut nuannaartoraara. Fiistertaqaagut tamalikalluta, ikiaroortarluta ernguttarlutalu. Taamanikkut taamatut inuusut najussallugit nuannaraara.
Kisianni misigivunga pilluarnanga. Kammalaatikkalu inuunerput qarsupittuinnaavoq. Kikkut tamarmik itinerusumik eqqarsaateqanngillat. Uangali nunarsuarmi naapertuilluannginnerujussuaq pissutsillu allat isumakuluutigisarpakka. Nikalloriartuinnaavippunga.
BIIBILI INUUNINNIK QANOQ ALLANNGUISSUTIGIGIGA: 17-inik ukioqarlunga misigivunga aliasungaarlunga. Anaanama aliasunnerujussuara malugaa siunnersorlungalu Biibilimik atuaqqissaartaleqqissasunga. Kajumissaarpaanga Biibilip ajoqersuutai misissoqqullugit, taamaalioreerumalu ilikkakkakka malikkusunnerikka imaluunniit malikkusunnginnerikka aalajangeqqullunga. Oqaloqatigiilluarnerput inuuninnut allannguivoq. Angajuma Carolinep uiatalu Akifip atuaqqissaaqatigisalerpaannga. Akifi aatsaat inersimasunngorami Jehovamut Nalunaajaasunngorpoq. Taassuma inuunerinikuusaa pissutigalugu misigivunga ammasumik oqaloqatigisinnaallugu, uannullu tamanna pingaaruteqaqaaq.
Nalusimanngilara inuunerisara Biibilimut naapertuutinngitsoq, taamanikkulli isumaqarsimavunga inuunera allat susassarinngikkaat. Biibilimik atuaqqissaartarnera tunngavigalugu paasilerpara inooriaaserisara Jehovamut attuumassuteqartoq. (Tussiaat 78:40, 41; Ussatit 27:11) Taamatuttaaq paasilerpara inunnut allanut attuumassuteqartoq.
Biibilimik misissueqqissaartillunga paasilerpara taanna ilumut Guutip oqaaserigaa paasinarluinnartunik ilumoorluinnartunillu tunngaveqarmat. Assersuutigalugu ilikkarpakka siulittuutit amerlasuut Biibilimeersut tupinnarluinnartumik eqquuteqqissaarsimasut. Qularninnut ilikkakkakka tamakku qularunnaassutigaakka.
Biibilimik atuaqqissaartalernerma ukiup ataatsip qaangiunnerata nalaani angajoqqaakkalu aniga Jehovap Nalunaajaasuisa immikkoortortaqarfianni Tysklandimiittumi namminneq kajumissutsi tunngavigalugu suliffianut pulaarparput. Animalu pilluangaarnera takullugu qamuuna assut attortissutigaara. Pilluarneq tamannarpiaq tassa uanga ujartorsimasarigaluara! Aamma Jehovamut Nalunaajaasut allat kajumissutsiminnik suleqataasut takullugit sunnertippunga. Taakku kammalaatigisimasannit tatigisassaanngitsunit nuannaarniutilerituusunillu allaanerulluinnarput. Pulaarnitta kinguninngua qamannga pisumik Jehovamut qinuvunga neriorsorlugulu inuunera naallugu kiffartuukkumallugu. Jehovamut tunniulluinnarsimanera 19-inik ukioqarlunga imermi kuisinnikkut ersersippara.
QANOQ ILUAQUTIGIGIGA: Maanna inuunera siunertaqalerpoq. Jehova taassumalu neriorsuutai Biibilimeersut inunnut allanut ilinniartitsissutigigaangakkit nuannaalissutigisarpakka. Ilaquttannut aamma iluaqutaavoq — ernumagisarunnaarpaannga.
Nalunngilara siornatigut ajortuliorsimallunga, kisiannili kukkussutigisimasakka eqqarsaatiginaveersaartarpakka. Jehovalli isumakkeerfiginnittarnera uannullu asannilluni isumaginninnera eqqarsaatiginiartarpara. Ussatit 10:22-mi ima allassimasoq isumaqatigaara: ‘Jehovap pilluaqqusinera pisuunngortitsisaraaq, erloqinartumillu ilasarinngilaa.’ (1900) (wp11 10/1-E)
[Qupp. 10-mi issuagaq]
“Fiistertaqaagut tamalikalluta, ikiaroortarluta ernguttarlutalu”
[Qupp. 11-mi issuagaq]
“Nalunngilara siornatigut ajortuliorsimallunga, kisiannili kukkussutigisimasakka eqqarsaatiginaveersaartarpakka”