Guutimik nalusut nalliuttuat kristumiussutsimut ilanngutitinneqarsinnaava?

Guutimik nalusut nalliuttuat kristumiussutsimut ilanngutitinneqarsinnaava?

ITALIAMI 2004-mi juullip nalaa oqalliffioqaaq. Ilinniartitaanermut tunngassuteqartunik suliaqartut ilaat isumaqarput juullimi upperisarsiornikkut ileqqulersuutigineqartartunut tunngassuteqartut tamarmik annikillisinneqassasut imaluunniit pinngitsoorneqarluinnassasut. Taamatut kajumissaaripput atuartut naaggaartuunatillu katuuliunngitsut amerliartuinnartut ataqqiniarlugit. Atuarfeqarfimmiittulli ilinniartitsisoqarfimmiittullu allat piumasaraat ileqqutoqqat ataqqineqarnissaat tamakkiisumillu atuunnissaat.

Isumaqatigiinngissulli tamanna eqqaassanngikkaanni, juullimi ileqqulersuutigineqartartorpassuit suna aallaavigigamikku? Oqallittoqarnerpaaffiup nalaani Vatikanip aviisiani L’Osservatore Romano-mi misissuinerit soqutiginartut allaaserineqarput.

Ulloq juullisiorfiusartoq pillugu katuullit aviisianni ima allassimasoqarpoq: „Romamiut oqaluttuarisaanerat, tamatuma nalaani kaasarip inunnik kisitsisitsinera ukiunilu hundredelinni tulliuttuni misissuinerit eqqarsaatigalugit ulloq Jiisusip inunngorfia ilumoortoq oqaluttuarisaanermit isigalugu nalornissutigineqarpoq. . . . Ilisimaneqartutut 300-kkunni decembarip 25-at Romamiut ilagiivinit aalajangiunneqarpoq. Romami guutimik nalusoqarfiusumi ulloq taanna seqinermut guutiutitamut pigitinneqarpoq . . . Kristumiussuseq Konstantinip peqqusineratigut Romami akuerisaalereersimagaluartoq . . . seqinermut guutiutitamik oqaluttuatoqaq, pingaartumik sakkutuunit, suli ilisimaneqarluarpoq. Nalliuttorsiornerit decembarip 25-ata missaani pisartut eqqaariikkavut inuit ileqqutoqaannik aallaaveqarput. Taamaattumik Romamiut ilagiivisa naapertuilluarnermut seqernup ilumoortup, Jiisusi Kristusip, seqinermut guutiutitamut taarsiunneratigut ullup tamatuma kristumiorpalaarlunilu upperisarsiortorpalaarnissaa isumassarsiaraat, ulloq taanna Jiisusi Kristusip inuuianik nalliuttorsiutiginniffissatut toqqarlugu.“

Orpiliarmi, maanna katuullit ileqqulersuutaannut ilaasoq?

Katuullit aviisianni allaaserisami eqqaaneqarpoq orpiit qorsuujuaannartut, soorlu „kristtornit, musetornit, piloqutit aamma sallilikkiassat orpiliassalluunniit avalequtinngui [siornatigut] angakkuarniutitut ajorunnaarsitsisinnaasutullu napparsimanaveersaartitsisinnaasutullu isigineqartartut“. Allaaserisaq ima nangippoq: „Juulliaqqami, decembarip 24-ani, orpimmik paratiisimi nunamiittumi pisimasumut ilisimaneqarluartumut tunngatillugu Adami Evalu eqqaaniarneqartarput . . . Orpik iipilequtaasussaagaluarpoq, iipilequlli ukiuuneranut tulluutinngimmat orpiliassaq toqqavimmut ilineqartarpoq avalequtaanullu iipilinik nivinngaassuisoqartarluni . . . , aammattaaq meeqqat mamakujussaat tunissutisiassaallu sananeqartarput.“ Kingusinnerusukkummi?

Aviisimi eqqaaneqarpoq orpiliaqartarneq Tysklandimi 1500-kkunni ileqqorineqalersoq, nangillunilu ima allassimavoq: „Italia nunat orpiliamik akuerinnittut kingulliit ilagaat, ilaatigut orpiliaqartarneq naaggaartut ileqquattut tusaamaneqartorujussuummat, taamaattumillu nersutaatit nerriviannik taarserneqartariaqarsorigamikku.“ Pave Paul VI nersutaatinut nerrivissuup saniani Romami Peterspladsimiittumi „orpiliarujussuarmik inissiisarnermik ileqqumik aallarniivoq“.

Upperisarsiornikkut siuttut pisartunik assersuutinillu itsarsuaq Guutimik nalusut ileqquinik aallaavilinnik kristumiussutsimut ilanngussisarnerat illit akuerineqarsinnaasutut isigaajuk? Kristumiut ilumoortut qanoq isumaqartariaqarnerat pillugu Biibilimi ima oqaaqqissaaruteqarpoq: „Iluarnerup inatsisaanneq sukkut peqatiginerpaa? Qaamasoq taartorlu sukkut assigiissuteqarpat?“ — 2 Korinthimiut 6:14-17. (w07 12/15-E)

[Qupp. 16, 17-mi assiliartaq]

Vatikanimi orpiliaq (quppernerup illuatungaani) nersutaatillu nerriviat

[Suminngaanneernera]

[Qupp. 17-mi assiliartaq]

Seqinermut guutiutitaq

[Suminngaanneernera]

Museum Wiesbaden