Sooq Qujamasuttariaqarpa?

QATIGGAMIGUT pilattartinnermi kingorna Harley allamik suliffittaartariaqalerpoq. Maskiinalerisuujunnaarluni allaffimmiunngorpoq. Allamik suliffeqalernini qanoq isumaqarfiginerini aperineqarami akivoq: „Maskiinalerineq maqaasivara, ilumoorlungali oqassaguma maannakkut suliffigiligara nuannarineruara.“

Tamatumunnga pissutaasoq Harleyp ima oqaatigaa: „Suleqatima pissusiat tamatumunnga pissutaavoq. Suliffigisimasanniittut assiginagit sulisitsisorilikkama suleqatigilikkamalu naammassisannik pingaartitsinertik ersersittarpaat, uannillu nersualaarinninnissartik ersissutigineq ajorlugu. Tamanna assigiinngissutaavoq annertooq.“ Harley iluaqutaasutut atorfissaqartinneqartutullu misiginini pissutigalugu maanna nuannaarluni sulisarpoq.

Pissutissaqavissumik nersualaarneqarneq ilalerneqarnerlu qamuuna nuannaajallatsitsisarpoq, akerlianilli qujasuitsumik pissusilersorfigineqarneq nikallornartuulluni. Shakespeare ilaanni ima allassimavoq: ’Superiannguarit, superiannguarit, ukiumi anorsaaq, inuit qujasuissusiat ilinnit nillerneroqaaq.’ Ajoraluartumik inuppassuit taamatut inussiarniitsuliorfigineqartarput.

Qujasuitsuunaveersaarit

Ullumikkut ilumoortumik qujamasuffigineqartarneq qaqutiguulersimavoq. Assersuutigalugu, atuakkiortoq ima apeqquteqarsimavoq: „Katittussat katinnissaminnut qaaqqusissutinik 200-nik allannissaminnut piffissaqarunik, sooq taava katinnerminni tunissutisiaminnut 163-inut qujassutinik allannissartik piffissaqarfigisinnaassanngilaat?“ Ilarpassui allaat qujaneq ajorput. Aap, qujamasunneq imminuinnaq eqqarsaatiginermik taarserneqarsimavoq. Tamanna ullussanut kingullernut ilisarnaatit ilagaat. Apustili Paulus ima mianersoqqusisimavoq: ’Imaattorli ilisimassavat: ullussani kingullerni ajornartunik nalliuttoqassammat, inuit inuujumaarmata imminnik asasut, . . . qujasuitsut.’ — 2 Timûtiuse 3:1, 2.

Allat pingaartitsineq qujamasunnerlu qujanarniarnermik taarsersimavaat. Qujamasunneq uummammeersuuvoq inuttullu iluanaarutissamik anguniagaqarnani. Akerlianilli qujanarniarneq, ilumoortuusaarnerullunilu ingasaassinerugajuttoq, nammineq soqutigisanik siuarsaanissamik imaluunniit inuttut iluanaaruteqarnissamik kissaateqarnermik aallaaveqartarpoq. (Jûtarse 16) Oqaatsit tusaruminarsakkat, oqaluffigineqartumut nakutitsissutaasinnaasut, pingaarniassutsimik makitassutsimillu aallaaveqarajupput. Ilumoortuusaartumik qujanarniarfigineqarnissani kia kissaatigissanerpaa? Akerlianilli qujamasunneq piviusoq ajunngitsumik sunniuteqartarpoq.

Qujamasunnermik ersersitsineq qujamasuttumut namminermut iluaqutaasarpoq. Ilumoortumik qujamasunneq iluarusunnartarpoq, nuannaarnermullu eqqissinermullu ilasaataasarluni. (Naleqqiuguk Ussatit 15:13, 15.) Qujamasunneq pissusiugami ajunngitsoq aamma misigissutsinut nuanniitsunut, soorlu kamannermut, sinnganermut akaarinninnginnermullu, illersuutaasarpoq.

’Qujasaritsi’

Biibilimi kajumissaarneqarpugut qujamasuttooqqulluta. Paulus ima allassimavoq: ’Suut tamaasa qujassutiginiarsigik, tassaammat Guutip ilissinnut peqqussutaa Kristus Jesusimi.’ (1 Tásalûníkamiut 5:18) Kolossamiullu Paulusip ima unnersuussimavai: ’Eqqissinerlu Kristusip pia uummatissinni ilitsersuigili, . . . qujasaritsilu.’ (Kulorsamiut 3:15) Tussiaatit arlallit qujaniutinik imaqarput, tassuunalu erserpoq ilumoorluni qujamasunneq tassaasoq ileqqoq pitsaasoq Guutimeersoq. (Tussiaat 27:4; 75:2) Taamaattumik inuunermi sutigut tamatigut qujamasunnermik ersersitsigaangatta Jehova Guutimut nuannaarutaasarpoq.

Silarsuarmili qujasuiffiusumi matumani pissutsit suut qujamasuttumik pissuseqarniarnissamut akimmisaarfiusarpat? Qanorlu ililluta ulluinnarni qujamasunnermik ersersitsisarsinnaavugut? Apeqqutit tamakku allaaserisap tulliani sammineqarput.