Pilluarneq — sooq taama angujuminaatsigaa?
KAMANNEQ, siooraneq isumatsassimanerlu ilisimatuussutsikkut misissuiffigineqartuartarsimapput. Ukiunili kingulliunerusuni ilisimatuut nuimasut ajunnginnerusumik kissaatiginarnerusumillu misissuiffiginnilersimapput, tassa pilluarnermik.
Inuit suut pilluarnerulissutigisinnaavaat? Inuusunnerulersuugunik, pisuujunerulersuugunik, peqqinnerulersuugunik, anginerulersuugunik imaluunniit salunnerulersuugunik pilluarnerulissagaluarpat? Pilluarneq piviusoq sumik isertugaateqarpa? Inuit amerlanersaasa apeqqut tamanna akiuminaatsittarpaat akissutissaqartinngilluinnartarluguluunniit. Inuillu pilluarnermik ujaasigaluarnerminni iluatsitsisannginnerat eqqarsaatigalugu pissutsit pilluarnermik kinguneqarneq ajortut taagornissaat ajornannginneruvorluunniit.
Isumaliutersuut, inuit ataasiakkaat pisariaqartitaannik kissaatigisaannillu pilluarnissamut aqqutissaaneraasoq, tarnip pissusiinik immikkut ilisimasallit ilinniartitsissutiguarsimavaat. Inunnik inuunerminnik qatsussisimasunik kajumissaarisarsimapput namminneq pisariaqartitatik kisiisa eqqarsaatigissagaat. Tarnikkut katsorsaaniarnermi oqaatsit napititaanartut atorneqartarsimapput, soorlu „namminiuinnassaatit“, „imminut iserfiginiarit“ aamma „imminut ilisariniarit“. Immikkulli ilisimasallit eqqarsariartaatsimik taama ittumik siuarsaasimasut ilaat ullumikkut isumaqatigiillutik isummersimapput isuma namminissarsiorpaluttoq taama ittoq pilluarnermik ataavartumik kinguneqarneq ajortoq. Namminissarsiorneq naammagisaqalinngisaannarnermik misigissutsikkullu anniaateqarnermik kinguneqaannartarpoq. Namminissarsiorneq pilluarnermut aqqutaanngilaq.
Pilluaannermut aqqut
Nuannaarniutit aqqutigalugit pilluarnermik ujarlersut kukkusumut ujarlerput. Kunngip silatuup Salomonip misigisimasai misissoriartigik. Biibilimi Nalunaajaasup oqaasiini taanna ima oqarpoq: „Piumasakka tamaasa pisinnaavakka; nuannaarutaasinnaasut naaggaarneq ajorpakka. Sulissutigisakka tamaasa uummatikkut nuannaarutissarsiffigaakka, tamannalu tassaavoq assoruunnikkut pissarsiara.“ (Nalunaajaasup oqaasii 2:10) Salomon imminut illuliuullunilu, viinnissanullu naatsiiviliuulluni, naatsiivissualiuullunilu tasilialiuussimavoq. (Nalunaajaasup oqaasii 2:4-6) Ilaanni ima aperisimavoq: ’Kina nerillunilu inuulluarpa uanga qimmullunga?’ (akugdlîssup oĸausê 2:25) Erinarsortartunit nipilersortartunillu pikkorinnerpaanit aliikkusersorneqartarsimavoq nunamilu arnanik pinnernerpaanik peqateqartarsimalluni. — Nalunaajaasup oqaasii 2:8.
Tassa nuannaarniutit Solomonip tunuarsimaarfiginngilluinnarsimavai. Inuunerminili nuannersorpassuarnik atugaqareerluni qanoq isummerpa? Ima allappoq: „Taavali eqqarsaatigilerpakka nammineq assannik piliarisimasakka tamaasa qanorlu assoroortigalunga sulisimanera; paasilerparalu sunaaffa tamarmik nungujasuinnaasut anorillu tiguniarsarineratut suallaataanngitsigalutik. Seqernup ataani suut tamarmik anorip tiguniarsarineratut pissarsiviunngitsigipput.“ — Nalunaajaasup oqaasii 2:11.
Kunngip silatuup paasisimasai tamakku ullumikkut suli taamaapput. Nuna pisooq USA assersuutigeriartigu. Ukiut kingulliit 30-t ingerlaneranni Amerikamiut timikkut pigisatik marloriaatinngortissimavaat, soorlu biilitik tv-kkullu isiginnaarutitik. Tamannali pissutigalugu pilluarnerulersimanngitsut sianissutsikkut peqqissutsimik immikkut ilisimasallit oqaatigaat. Paasissutissiisoq ataaseq naapertussagaanni „piffissami tamatumani isumakkut artorsaateqartut procentinngorlugit amerleriarujussuarsimapput. Inuusuttuaqqat akornanni imminortarneq pingasoriaammik annertusisimavoq. Aappariit avittut marloriaatinngorsimapput.“ Misissueqqissaartut qanittukkut assingusumik isummerput nunani assigiinngitsuni 50-it missaanniittuni innuttaasut akornanni pigissaarnerup pilluarnerullu ataqatigiinnerat misissoreerlugu. Allatut oqaatigalugu, pilluarneq pisiarineqarsinnaanngilaq.
Ilumoorluni oqassagaanni pisuussutinik ilungersorluni noqqaassutiginninneq pillualernissamut akornutaasinnaavoq. Apustili Paulus ima mianersoqqusisimavoq: ’Pisuunngorumasulli usserneqarlutillu napititaasarput silaqanngitsorpallattunillu ajoqutaasunillu pilerigisarpassuaqalersarlutik; tamakkua inuit aserornermut tammarnermullu kiviartortittarpaat, aningaasanik piumatuunermit ajortut tamalaat naasarmata; tassungalu kajumissillutik ilaasa upperneq tammaavaat, erloqinartorpassuillu imminnut atortippaat.’ — 1 Timûtiuse 6:9, 10.
Pisuussutit, peqqissuseq, inuusuttuuneq, pinnissuseq, pissaaneqarneq imaluunniit tamakkuninnga ataatsimut pigisaqarneq pilluarnermut ataavartumut qulakkeerutaasinnaanngillat. Sooq? Uagut inuit ajunaarnernik pinngitsoortitsinissamut pissaaneqannginnatta. Kunngip Salomonip tamanna eqqorluartumik oqaatigisimavaa ima: „Kialuunniit ilisimanngilaa qanoq ilisukkut ajunaarsinnaalluni. Aalisakkat qassutinut napitittut timmissallu qilorartuutinit nigarneqartut assigalugit inuit ullormi ajortumeerfissaminni pisarineqartarput ajunaarneq tassanngaannaq nalliukkaangat.“ — Nalunaajaasup oqaasii 9:12.
Angujuminaatsoq
Qanorluunniit paasiniaaqqissaartigisoqaraluarpat qanoq ililluni pillualersoqarsinnaaneranut najoqqutassiisinnaasumik inoqanngilaq. Aamma Salomon oqarsimavoq: „Mannattaarlu nunarsuarmi matumani malugaara: Ullut ajortumeerfissat atugarliornartullu kikkunnulluunniit nalliussinnaapput. Taamaattumik oqilanerpaaq arpaliunnermi ajugaanngitsoorsinnaavoq sapiinnerpaarluunniit sorsunnermi ajugaanngitsoorsinnaalluni. Imaanngilaq ilisimassuseq nerisassamik pissarsissutissatut tamatigut naammattartoq. Silatussuseq pisuunnguutaanngitsoorsinnaavoq pikkorissullu ilaannikkut nersualaarneqanngitsoorsinnaallutik; taamaattarpormi suut tamarmik periarfissatigut nalaatsornertigullu pisarmata.“ — Nalunaajaasup oqaasii 9:11.
Oqaatsinut qulaani allassimasunut isumaqataanerartorpassuit isummersimapput piviusorsiortumik oqaatigalugu pilluarluinnarluni inuuneq anguneqarsinnaanngitsoq. Ilinniartitsisoq nuimasoq oqarsimavoq ’pilluarneq takorluugaannaasoq’. Allat isumaqarput pilluarnermut aqqut isertugaataasoq silassorissorpaalunnguit kisimik paasisinnaasaat.
Inuilli pilluarnermik ujartuinerminni inooriaatsinik assigiinngitsunik misileraajuarsinnarput. Naak allat pilluarnermik angusiniarnerminni iluatsitsisimanngikkaluartut inuppassuit inuunerminni nuannaarutissaqannginnertik matussutissinniarlugulusooq pisuussutinik, pissaanermik, peqqissutsimik nuannaarniutinilluunniit noqqaassutiginnittuarput. Inuit ujartuiuarsinnarput, amerlanerimmi qamuuna ilumikkut upperaat pilluarneq ataavartoq takorluugaannaanngitsoq. Neriupput pilluarneq tassaannaanngitsoq takorluugaq anguneqarsinnaanngitsoq. Taamaattumik manna apeqqutaalerpoq: ’Pilluarneq qanoq ililluni anguneqarsinnaava?’