Nalitta ilungersornassusia qularutiginngittuarpiuk?
TARNIKKUT iluunngarluta Jehovap kiffartuuttuarnissaanut suna iluaqutigisinnaavarput? Nalitta ilungersornassusianik qularinninngilluinnarneq! Tarnikkut iluunngarluni Guutimut kiffartorneq isumaqarpoq kinaassuseq tamakkerlugu taassumunnga kiffartorneq, tamatumalu nassatarisaanik aalajangiusimalluinnarlugu taassuma peqqussutaanut tamanut naallalluinnarnissaq.
Pruffiitip Mosesip tamanna erseqqissarsimavaa Israelikkut ima peqqugamigit: „[Jehova] Guutit asassavat uummatikkut iluunngarlutit tarnikkullu iluunngarlutit nukitillu tamakkerlugit.“ (5 Moses 6:5) Ukiut hundredelippassuit tamatuma kingorna Jesus Kristusip peqqussut tamanna uteqqissimavaa: „Jehova Guutit asassavat uummatikkut iluunngarlutit tarnikkullu iluunngarlutit isumakkullu iluunngarlutit.’ (Matîuse 22:37) Aamma apustilip Paulusip tamanna innersuussutigisimavaa Efesusimiut kajumissaaramigit ’kajumillutik [tarnermik tamakkiissumik] Guutip peqqusaanik suliarinninnissaannik’, aamma Kolossamiut ilungersortumik ima oqaaqqissaaramigit: ’Qanoq iliugassasi tamaasa kajumillusi [tarnikkut iluunngarlusi] suliarisigik Jehovamullusooq, soorlu inunnut pinngitsusi.’ — Evfisumiut 6:6; Kulorsamiut 3:23.
Piffissalli sivikinneranik qularinninngilluinnanngikkaanni, qularinninngippiarunnaarsimagaanni imaluunniit qularinninnginneq katalluinnarsimagaanni Guutip uummatikkut iluunngarluni tarnikkullu iluunngarluni kiffartuunnissaa ajornakusooqaaq. Ullumikkut suliaq aatsaat taama nukinginnartigilersimavoq.
Immikkut nukingertariaqartarsimanerit
Kristumiussuseq sioqqullugu arlaleriarluni nukinginnartoqarfiusarsimavoq. Soorlu Noap nalaani aammalu Sodomap Gomorrallu aserorneqarnissaata tungaanut. (2 Pîtruse 2:5, 6; Jûtarse 7) Ukiuni ulersuup siornagut ingerlasuni ulapaarnersuaqarsimassaaq. Noap ilaqutaasalu qaqugorpiaq ulersuaqarnissaa nalugaluarpaat, Guutimilli mianerinnillutik inuunertik piumaataalernissaraluaminnut illersuutigisimavaat. — Eprîarit 11:7.
Aamma Sodoma Gomorralu aserorneqassamaalermata nukinginnartoqarsimavoq. ’Inngilit Lot tuavisaarsimavaat’ oqarfigalugu: „Tamaviat qimaaniaritsi, . . . annanniarniaritsi nungutitaaqqunasi.“ (1 Moses 19:15, 17) Aamma taamani naapertuilluartut nalimik ilungersornassusianik qularutiginninnginnertik pissutigalugu annaanneqarput. Ukiut hundredelikkuutaat qangiuttut juutit Babylonimi tigusaaqqasut ima kajumissaarneqarput: „Aallaritsi, aallaritsi, Babylonimit aallaritsi, mingunnartumik attueqinasi.“ (Jesaja 52:11) Ukiumi 537-imi u.n.s. nunaminnit qimaatitaasimasut 200.000-it missaanniittut peqqussut siulittuutaasoq tamanna naalallugu tuaviorlutik Babylonimit aallarput.
Eqqartorneqareersut takutippaat nalimik ilungersornassusia qularinngilluinnarsimagitsik, uummatikkullu iluunngarlutik kiffartorlutik.
Kristumiut nalimik ilungersornassusianik qularutiginninnginnerat
Kristumiut Allagaataanni Griikerisuuni tamani piffissap ilungersornassusia malugisassaavoq. ’Eqqumagitsi,’ ’pigaaritsi,’ ’piareersimaniaritsi,’ ’misissoritsi,’ oqaatsit tamakku atorlugit Jesusip ajoqersukkani piffissap sivikissusianik paasitinniartarsimavai. (Matîuse 24:42-44; Mákorse 13:32-37) Aamma niviarsianik qulinik, kiffamik ajortumik, talentinik kiisalu savanik savaasanillu avissaartiterinermik assersuusiai ilimasulersitsipput, suliallu nukinginnassusianik paasititsillutik. — Matîuse 25:1, 14, 15, 32, 33.
Suliap nukinginnassusia Jesusip oqaluuseriinnarsimanngilaa, namminerli suliniarluarnermigut oqaatsini maleruarneqartussanngortittarlugit. Ilaanni inuit imminik nangartaaniarsarisut ima oqarfigisimavai: ’Nunaqarfinnut allanuttaaq Guutip naalagaaffianik iivangkiiliu oqaluutigisassaraara, tamanna pillugu aallartitaagama.’ (Lúkarse 4:42, 43) Aamma ajoqersukkani kajumissaarsimavai ’katersugassat inuannut’ qinussasut sulisussanik amerlanerusunik aallartitseqqullugu ’katersugassat amerlaqimmata, sulisussalli ikeqalutik’. (Matîuse 9:37, 38) Qinnutip tamatuma piffissap sivikinneranik nalunaatsumik paasitippaatigut.
Ilumut taama nukinginnartigisimava?
Tupinnanngitsumik ima aperiumasoqassaaq: Sooq uffa ’annikilliornartoq angisooq’ siulittuutigisaasoq tamanna aatsaat ukiut hundredelikkuutaat qaangiuppata nalliuttussaasoq piffissap sivikinneranik qularutiginninnginnissaq taamanikkut taama pingaartigisimava? — Matîuse 24:21.
Qularutiginngissinnaavarput Jesusip ajoqersukkani oqaluussinermik ajoqersuinermillu ulapputeqartinniaannarlugit taamatut oqaluffigisarsimanngikkai. Aap, ajoqersukkaminut asanninnera Jehovallu piffissamik isiginninneranik paasinnilluinnarnera ulapputeqartuarnissaannik unnersuussutaanut tunuliaqutaapput. Jesus Kristusip nalunngilaa Jehovap piumasaa Guutip siunertaa naapertorlugu naammassineqassappat piffissap ilungersornassusianik qularutiginninngilluinnarnissaq pisariaqartoq. Nalunngilaattaaq tikiuteqqinnisami tungaanut piffissap sivikissusianik qularutiginninnginneq tamanna pigiuarunikku ajoqersukkat iluaqutigissagaat.
Jesusip erseqqissumik oqaatigisimavaa piffissap killillip ingerlanerani nunarsuaq tamakkerlugu oqaluussineqartussaasoq. (Matîuse 24:14; Mákorse 13:10) Piffissap ingerlanerani suliassap tamatuma immikkoortui siuariartortut assigiinngitsut qulaarneqariartuaarsimapput. Immikoortuili tamaasa naammassisinnaassagaanni piffissap sivikissusianik qularutiginninnginnissaq pisariaqarsimavoq. Suliap qanoq ineriartornissaa Jesusip ima oqaatigimisaarsimavaa: ’Nalunaajaasigiumaarpassi Jerusalemimi Judæamilu tamarsuarmi Samariamilu nunallu isuanut allaat.’ (apustilit suliait 1:8) Suliarlu taamatut nalerput tikivillugu ingerlasimavoq. Tamatuma nassatarisaanik Guutip kiffai ukiut ingerlaneranni tupaallaatissinneqartarsimapput, ilaannikkullu paasisat allanngortinnissaat pisariaqartarsimavoq.
Suliap nukinginnassusianik kristumiut paasinninnerat Jehovap siunertaanut iluaqutaasimavoq. Kristusip ajoqersugaasa Jehovap piffissamik pilersaarutaa uniorsinnaanngitsoq naapertorlugu suliassaminnik siuariartortumik naammassinninnissaannut tamanna iluaqutaasimavoq. Ukiut 2000-ingajaat ingerlaneranni oqaluttuarisaaneq ullumikkut kingumut qiviaraangatsigu Guutip piffissamik pilersaarusiaanik paasinninnerulersarpugut.
Ajoqersukkat piffissap ilungersornassusianik kristumiutut qularutiginninnginnertik iluaqutigalugu Israelikkut innissisimaffiata immikkut ittup ukiumi 36-mi u.n.k. atorunnaarnera sioqqullugu Jerusalemimi, Judæami Samariamilu kiisalu juutit siammarsimasut akornanni peqqissaartumik nalunaajaateqarsimapput. (Daniel 9:27; apustilit suliait 2:46, 47) Taamatuttaaq ilagiit kristumiut siulliit piffissap ilungersornassusianik qularutiginninnginnertik iluaqutigalugu juutinik mianersoqqusisinnaasimapput juutit aaqqissuussaanerata piuneerussaanissaa pillugu. (Lúkarse 19:43, 44; Kulorsamiut 1:5, 6, 23) Ilimagineqanngivissumik tamanna ukiumi 70-imi pereermat, suliap nukinginnartuuneranik paasinninnertik iluaqutigalugu ukiuni hundredelinni siullerni kristumiut nalunaajaasut qilammi neriuut tunussinerup siulittuutigisaasup anersaakkut taarnersuata toqunartup atuutilernissaa sioqqullugu inuppassuarnut oqaluussissutigisimavaat. (2 Tásalûníkamiut 2:3; 2 Timûtiuse 4:2) Jesus Kristusip siulittuineratut kristumiut ikittunnguit, qajuusiassatut eqqartorneqartut, ukiuni akullerni avaanngunartuni Naalagaaffimmik neriuutertik uumatittuaannarsimavaat. (Matîuse 13:28-30) Jehova piffissaq aalajangersarsimasani nalliummat ilagiinnik sulisinnaassuseqarluartunik nalitsinni pilersitsivoq, Jehovallu tusarliuteqqusaanik eqqartuussutaasumik nukinginnartumik kinguaariinnut kingullernut inuusunut tusarliussineq ilagiinnut taakkununnga kaammattuutaasimaqaaq. — Matîuse 24:34.
Guutip nalitsinni nalunaajaasuisa aalajaatsut pruffiititut Danielitut iliorlutik sapiiserlutik Jehova ima aperiumanngilluinnarpaat: „Susutinuna?“ (Daniel 4:35) Tatigaat Jehovap suliani piffissaq eqqorlugu naammassineqarsinnaassappat suna pisariaqartoq nalunngikkaa. Jehovap periaasii apeqquserneq ajorpaat, nuannaarutigaalli piffissami pingaaruteqartumi matumani Jehovap imminut suleqataanissaminnik periarfississimammatik. — 1 Korintumiut 3:9.
Nalitta ilungersornassusianik qularutiginninnginnissamut pissutissaq alla
’Annikilliornartup angisuup’ qaqugorpiaq nalliunnissaanik ilisimasaqannginnerput suliap nukinginnartuuneranut qularutiginninngitsitseqataavoq. Jesusip erseqqissaatigisimavaa pisussap pingaartup tamatuma ullua piffissaaluunniit nunarsuarmi kialuunniit ilisimanngikkaa. (Matîuse 24:36) Apustilini suliniarluartut ilaanni ima oqarfigisimavai: ’Ilissinnut nalunaariaqanngilaq qaquguluunniit qanoq ilisukkulluunniit pissasoq, Ataatap pissaanermigut aalajangeriigaa.’ (apustilit suliait 1:7) Aap, qanoq pisoqarnissaa qularutissaanngilaq, immikkuualuttulli uagut ilisimasassarinngilavut.
Apustilip Paulusip piffissap ilungersornassusia eqqortumik isumaqarfigisimavaa. Immaqa Jesusip oqaasii eqqarsaatigai Kristusip najuinissaa pillugu Thessalonikamiut ima allaffigigamigit: ’Kisianni qaquguluunniit qanoq ilisukkulluunniit piumaartumik allaffigisariaqanngilassi.’ (1 Tásalûníkamiut 5:1) Taamatut allassimavoq Jesusip ima oqarneranit ukiut 17-it qaangiuttut: ’Nalunaajaasigiumaarpassi . . . nunap isuanut allaat.’ (apustilit suliait 1:8) Taamanikkut allattoqaqqissinnaasimanngilaq, qulaareqqittoqarsimanngimmat. Taamaakkaluartorli qularinngissinnaasimavaat Jehovap ullussaa ’tillinniatut unnuakkut’ takkukkumaartoq, kristumiut eqiasuillutik oqaluussiuarsinnarneranni. — 1 Tásalûníkamiut 5:2.
Ilimananngilaq kristumiut siulliit, oqaatsit taakku eqqarsaatigalugit, isumaqarsimassasut Jehovap ullussaa aatsaat siunissami ukiut hundredelippassuit qaangiuppata pisussaasoq. Kunngi nunamut ungasissumukartoq angullu nunamut allamukartoq pillugit Jesusip assersuusiai nalunngikkaluarpaammi. Nalunngikkaluarpaattaaq assersuutini oqaatigineqartoq kunngi angullu tamarmik immikkut ’kingunersuagut’ aatsaat uterumaartut. Qularnanngitsumilli manna isumaliutigisarsimassavaat: ’Kingunersuagut’ qaquguussagami? Ukiut qulit qaangiuppata? Ukiut 20-t? Ukiut 50-it? Imaluunniit sivisunerusoq qaangiuppat? (Lúkarse 19:12, 15; Matîuse 25:14, 19) Jesusip oqaasii uku eqqaajuartarsimassavaat: ’Taamaattumik ilississaaq piareersimaniaritsi, Inuup Ernera ilimaginngisassigut tikiussammat.’ — Lúkarse 12:40.
Piffissap ilungersornassusianik qularutiginninnginnerup kinguneri pitsaasut
Piffissap ilungersornassusianik qularutiginninnginneq tamanna Guutip kristumiunut siullernut pigiliutsitaa taakkununnga kaammattorneqaataavoq. Oqaluussilluni ajoqersuillunilu suliamik pingaartumik ulapputeqartuaannarnissaminnut iluaqutigaat. Ullumikkuttaaq tamanna assigiinngitsorpassuartigut kaammattorneqaataavoq. Imminut naammagisuulernissamik imaluunniit ’ajunngitsuliornermut arajussinissamik’ pinaveersimatitsisuuvoq. (Galâsiamiut 6:9) Silarsuarmut matumunnga tamatumanilu pigisatigut pingaartitsivallaarnermut akuliusimavallaalinnginnissatsinnut illersuutigaarput. Isumatsinnik ’inuunermut piviusumut’ sammititsivoq. (1 Timûtiuse 6:19) Naalagaq Jesus oqarsimavoq ajoqersukkami assigissagaat ’savat amaqqut akornanniittut’, nalunngilaalu silarsuarmut akiuussinnaassagunik anguniagartik siunniusimajuartariaqaraat. Aap, kristumiut piffissap ilungersornassusianik qularutiginninnginnerat taakkununnga sernissuutaasimavoq. — Matîuse 10:16.
Jehova Guutip ilisimangaarsutsimini kiffani suliap nukinginnartuuneranik qularutiginninngittuaannarsinnaanissaannik ikiorniarlugit paasissutissanik naammattorsuarnik pilersortuaannarsimavai. Asannilluni uppernarsaavigisimavaatigut pissutsit aaqqissuussaanerata ajortunngorsimasup matuma ’ulluini kingullerni’ inuusugut. (2 Timûtiuse 3:1) Eqqaasinneqartuarpugut kinguaariit ullumikkut inuusut annikilliornartup angisuup sakkortuseruttorfissaani Harmagedonimi nungutitaanissaat tikillugu qaamanermik siaruarterisuusariaqartugut. — Filípimiut 2:15; sarĸúmersitat 7:14; 16:14, 16.
Suliap nukinginnassusianik qularutiginninnginneq Guutimit tunissutaasoq Jehovamut uummatikkut iluunngarluta kiffartornitsinni sutigut tamatigut malunnartariaqarpoq. Diaavulup Guutip kiffaanik ’qasulersitsiniaallunilu tarnikkut nikallortitsiniaaneranik’ tamanna pinaveersimatitseqataassaaq. (Eprîarit 12:3) Jehovap kiffai uummatikkut iluunngarlutik tunniusimanerminnit killinneqarlutik taassumunnga naassaanngitsumik naalakkumassapput, ingammilli Harmagedonip tungaanut suliap nukinginnassusianik qularutiginninnginnitsinnit killinneqarluta Guuti tarnikkut iluunngarluta kiffartuukkumassavarput.
Qanortoq Jehovap Guutitta nalitta ilungersornassusianik qularutiginninngittuarnissatsinnik ikiortuarlisigut, apustilillu Johannesip oqaasii uku utertuartigik: ’Amen. Aggerna, Naalagaq Jesusiaa.’ — sarĸúmersitat 22:20. (wE 1/10 95)