Guutip silarsuassaa nutaaq kiffaanngissuseqarfiusoq tikilluaqqujuk
’[Guutip] qulliit tamaasa isaannit allarterumaarpai, toqulu peqarunnaassaaq, aliasuttoqarunnaarlunilu nilliasoqarunnaarlunilu anniartoqarunnaassaaq.’ — SARKÚMERSITAT 21:4.
1, 2. Kina kisimi piviusumik kiffaanngissuseqalersitsisinnaava, Bibelimilu Taanna pillugu sumik ilinniarsinnaavugut?
OQALUTTUARISAANERUP ersersissimavaa pruffiitip Jeremiasip oqaasii makku ilumoortuusut: „Nalunngilara inuup ingerlavissani nammineq aalajangigassarinngikkaa, angutillu aalajangigassarinngikkai qanoq ingerlanissani alloriartornissanilu.“ Kia kisimi inuup ingerlanissaa eqqortissinnaavaa? Jeremias ima nangippoq: ’Perorsaatissittannga, Jehova, (NV).’ (Jeremia 10:23, 24) Aap, Jehovap kisimi inuiaat ajornartorsiutaannit aniguisissinnaavai.
2 Jehovap kiffaminik aniguisitsisinnaaneranut Bibelimi assersuutissarpassuaqarpoq. ’Siornagummi allassimasut tamarmik allassimapput uatsinnut ilinniutissaallutik nerioqqulluta erinitsannata allakkallu tuppallersaatigalugit.’ (Rûmamiut 15:4) Jehovap guutisiornermut eqqunngitsumut eqqartuussissutai aamma allassimapput ’mianersoqqussutaallutik uatsinnut ullunik kingullernik angumerinnittunut’. — 1 Korintumiut 10:11.
Innuttani aniguisittarpai
3. Jehovap qanoq ililluni takutissimavaa innuttani Egyptenimiit aniguisissinnaallugit?
3 Guutip eqqunngitsumik upperisarsiornermut eqqartuussisinnaassusianik piumasaanillu iliortunik aniguisitsisinnaassusianik assersuut tassa innuttaasa Egyptenimi inussiaaneranni pisimasut. Mosesimik allakkat aappaat 2:23-25-mi ima allassimavoq: „Israelikkut inussiaataanertik anersaaruluutigalugulu kappialaatigaat, kappialanerallu Guutimut annguppoq, anersaarulunnerallu Guutip tusaavaa.“ Egyptenip guutiinit ilumuunngitsunit qutsinnerungaarnerminut mianernangaartumik takussutissaasumik Guutip perluit qulit nunamut atuutitippai. Perluit tamarmik immikkut Egyptenip guutiinik nikanarsaasuupput, tamarmillu qulaarpaat guutit tamakku ilumuunngitsuusut Egyptenimiunillu pallorfiginnitsiminnik ikiuisinnaanatik. Taamaalilluni Guutip innuttani aniguisillugit Farao sakkutuuilu Imaq Aappalaartumi nungutippai. — 2 Moses kapitalit 7-14.
4. Sooq Guutip Kana’anamiunut eqqartuussissummik naammassinninnera naapertuilluarpa?
4 Guutip Israelikkut Kana’animut siulersoramigit Kana’animiut inngilipilussiortuusut nungutippai nunalu innuttaminut tunniullugu. Jehova tassaagami qilammi nunamilu kisimi Oqartussaq upperisarsiornermut ajortunngorsimasumut eqqartuussinissaminut pisussaviuvoq. (1 Moses 15:16) Halleyp Bible Handbook-iani Kana’animiut upperisaat ima allaatigineqarpoq: „Kana’animiut guutiinik guutisiorfiginninneq piumasaarsornerpaamik erngulluni nuannaterujunnertaqartarsimavoq; naalaffii ileqqupilulersornermut qitiusimapput. . . . Kana’animiut guutipilussiornerminni guutimik najuuffigisaanni kanngunartuliornertalimmik ileqqulersuuteqartarsimapput; taamaalioreeraangamillu angajulliliatik toquttarsimavaat guutiminnullu pilliutigalugit. Nuna Kana’an Sodomatut Gomorratullu illuinnarsimannguatsiarpoq.“ Atuakkiortup allakkani ilavai: „Atugartuussuseq taama maajunnartigalunilu soqqusaatsigisoq ataannarsinnaatitaasariaqarsimanerpa? . . . Itsarnisarsiortartut Kana’anip illoqafikuinik assaasut tupigusuutigaat Guutip siusinnerusukkut taakkuninnga nungutitsisimannginnera.“
5. Guutip itsaq innuttaminik aniguisitsisimanera qanoq ililluni nalitsinnut assersuutaava?
5 Tassa Guutip eqqunngitsumik upperisarsiorneq akuliuffigalugu inuiaat angerfigeqatigisani aniguisissimavai nunamullu nutaamut eqqullugit. Tamanna pisussamut allamut assersuutaavoq. Pissutsit aaqqissuussaanerata matuma guutiinik ilumuunngitsunik tamakkuninngalu tapersersuisunik Guutip nungutitsiffissaanut, ullumikkullu innuttaminik silarsuassamut nutaamut naapertuilluartumut eqqussiffissaanut assersuutaavoq. — sarĸúmersitat 7:9, 10, 13, 14; 2 Pîtruse 3:10-13.
Guutip silarsuassaani nutaami kiffaanngissuseq piviusoq
6. Kiffaanngissutsit suut Guutip silarsuassami nutaami pilersissavai?
6 Silarsuassami nutaami Guutip innuttani kiffaanngissutsip inuiaat nuannaarutigisassaattut siunertarisami immikkoortortaanik nuannersunik tamanik pilluaqqussavai. Naalakkersuinikkut, aningaasatigut upperisarsiornikkullu pissaanilinnit naqisimanninnermit kiffaanngissuseqassaaq. Ajortimit toqumillu kiffaanngissuseqassaaq, inuimmi nunarsuarmi naassaanngitsumik inuunissaminnut periarfissaqassapput. „Iluartut nuna kingornutissavaat najugaqassallutillu tassani naassaanngitsussamut.“ — Tussiaat 37:29; Matîuse 5:5.
7, 8. Silarsuassami nutaami peqqilluinnassuseq pillugu sumik ilimagisaqarsinnaavugut?
7 Silarsuassap nutaap pilersinneqariitsiarnerani inuit tassaniittut tupinnartuliornikkut peqqilluinnartunngortitaassapput. Job 33:25-mi ima oqaatigineqarpoq: „Taava timaa inuusukkallarneranisut nukittorumaarpoq inuusunnermi ulluinisut ileqqilluni.“ Jesaja 35:5, 6-imi ima neriorsuuteqarpoq: „Taava tappiitsut isaat uisitaassapput, tusilartut siutaat ammarneqassapput. Tusiattoq tuttutut pissigarumaarpoq, oqajuitsuugaluaq qiimmattarluni appikkumaarpoq.“
8 Uagut ullumikkut inuusugut utoqqalinerlu imaluunniit peqqiilliorneq pissutigalugit timikkut anniaateqartugut — takorloorsinnaavarput silarsuassami nutaamiilluta, ullaat tamaasa itertassalluta ippassarnit peqqinnerullutalu inuummarinnerulluta. Malugisassavarput amerput amequsuttoq tasikkiartortoq peqqippalussiartorlunilu — amermut tarnutit pisariaarutissapput. Isikujoortut tappiitsullu ajorunnaarsinneqassapput, tappissilluinnassaagut — isarussat pisariaarutissapput. Tutsarissilluinnassaagut — tusartaatit igillugit! Avativut iloqiaasut ajorunnaarsinneqassapput ukallitut pissigarsinnaalerluta — ajaappissat issiaviillu kaamisartakkat peerlugit! Napparsimasassanngilagut — iisartakkat nipaallisaatillu pisariaarutissapput. Jesaja 33:24-mi siulittuutigineqarsimasutut issaaq, tassani allassimagami: „Nunatsinni ima oqartoqassanngilaq: ’Napparsimavunga!’“ Aamma ima allassimavoq: „Tipaatsunneq nuannaarnerlu pissarissavaat, aliasunneq anersaaminerillu peerutissapput.“ — Jesaja 35:10.
9. Sorsunnerit qanoq ilillutik soraarsitaavissappat?
9 Aammattaaq sorsunnerup pilliiviinut pilliutaasoqartarunnaassaaq. Tussiaat 46:10-mi ima allassimavoq: „[Guutip] nunarsuarmi tamarmi sorsunnerit soraarsikkumaarpai, pisissit nallorumaarpai qalugiusallu aserorterlugit, qamussuit sorsuutit ikikkarumaarpai.“ Tamakku atorneqarnissaat akuerineqaqqinngisaannassaaq. Tamanna Guutip naalagaaffiani naalagaasup, Kristus Jesusip, isumagissavaa. Taanna Jesaja 9:6-imi taaneqarpoq „Naalagaq eqqissisitsisoq“, versi 7-imilu nangippoq: „Naalagaaffia angissaqaaq eqqissinerlu ataavassalluni.“
10, 11. Piviusumik eqqissineq nunarsuarmut qanoq nassataqassava?
10 Sorsunnermi sakkussiarsuit sioorassutaajunnaarnerat inuiannut nunarsuarmullu pilluaqqussutaassaaq angisooq. Sakkut siornatigut sorsunnermi atorneqarsimasut ulloq manna tikillugu inuit inuunerannut navianartorsiortitsipput. Assersuutigalugu, nunami ataasiinnarmi, tassa Frankrigimi, 1945-miilli qaartartunik ilisimatuut 600-t sinnillit qaartartunik siornatigut sorsunnermi atorneqarsimasunik ajoqusiisinnaajunnaarsitsiniaanerminni ajunaarsimapput. Frankrigimi sakkuiaanermut siulersortaasoq oqarsimavoq: „Qamutilinnut aqerlut franskit tyskillu 1870-imi sorsuunneranneersut suli atorsinnaasut suli nassaarisarpavut. Taseqarpoq qaartartunik toqunartortalinnik sorsunnersuarmi siullermeersunik ulikkaartunik. Akuttunngitsumik nunaatillit traktoriminni ingerlatillutik qamussuarnut sorsuutinut qaartartumeerutissanik sorsunnersuup aappaaneersunik aqqusaalutorinnittoortarput, taamaalillunilu qaartoornermi ajunaartarlutik. Tamakku sumi tamaani nassaassaapput.“ Ukiut marluk matuma siorna New York Times-imi ima oqaatigineqarpoq: „Sorsunnersuup aappaata kingorna ukiuni 45-ni [qaartartunik ilisimatuut] Frankrigip narsartaanit aqerlut qaarasuartartut 16 millionit, qaartartut 490.000-it aamma qaartartuliat imaaniititat 600.000-it peersimavaat. . . . Hektarit millionilikkuutaat sakkussiakunik ulikkaartut suli ungalulersorneqarput ima allassimasunik allagartalerlugit: ’Attorneqassanngilaq! Toqunarpoq!’“
11 Silarsuassap nutaap allaalluinnassusissaa! Inuit tamarmik pitsaasumik najugaqassallutillu, naammattunik nerisassaqassallutillu, nunarsuup tamarmi paratiisinngortinnissaanik siunertaqarluartumik nuannersumik suliaqassapput. (Tussiaat 72:16; Jesaja 25:6; 65:17-25) Inuit nunarsuarlu qaartartulianik millionilippassuarnit qaarfigineqaqqinngisaannassapput. Angut uppernerartoq Jesusip ima oqarfigigamiuk silarsuassaq nutaaq eqqarsaatigaa: „Paratiisimeeqatigiumaarparma.“ — Lúk. 23:43, NV.
Inuuneq pillugu ilinniartitaaneq
12, 13. Nunarsuaq tamakkerlugu ilinniartitaanermik suliassaq suna Jesusip Esajasillu siulittuutigisimavaat?
12 Guutip silarsuassaa nutaaq pillugu ajoqersorneqaleraangami inuup paasilersarpaattaaq ilagiit silarsuaq tamakkerlugu peqatigiiusut nalitsinni Jehovap pilersissimagai. Taakku silarsuassamut nutaamut tunngaviussapput, Jehovallu maannakkut inunnik peqqusersuitsunik siunertani pillugit ajoqersuinermut atorpai. Ilagiit kristumiut taakku nunarsuaq tamakkerlugu ajoqersuinermik, oqaluttuarisaanermi takuneqarsimanngisaannartumik periaasilimmik annertussusilimmillu, suliaqarput. Jesusip tamanna siulittuutigaa: „Naalagaaffimmik tusagassaq nuannersoq tamanna nunarsuarmi inuit najugarisaanni tamarsuarmi inuiaat tamarmik nalujunnaarutissaannik oqaluussissutigineqassaaq; taavalu naggatissaq nalliutissaaq.“ — Matîuse 24:14, NV.
13 Silarsuaq tamakkerlugu ajoqersuinermik sulineq tamanna Esajasittaaq eqqartorpaa. Ima allassimavoq: ’Ullussani kingullerni [maannakkut inuuffigisatsinni] qaqqaq Jehovap illuata inigisaa [tassa ilumoortumik pallorfiginninneq] aalajaakkumaarpoq. . . . Tassunga inuiaat ornigutissapput, inuiaqatigiippassuillu tassunga ingerlaartut oqassapput: ’Qaa, majuarta Jehovap qaqqaanut, Jaakup Guutiata illuanukarluta; aqqutigeqqusaminik ajoqersussavaatigut ingerlavigeqqusamigut ingerlasinnaaleqqulluta.’“ — Jesaja 2:2, 3.
14. Qanoq ililluta paasisinnaavarput Guutip innuttai ullumikkut kikkuusut?
14 Silarsuaq tamakkerlugu ajoqersuinermik sulineq taamaalilluni pissutsit aaqqissuussaanerata ajortup matuma ’ullussaani kingullerni’ inuunitsinnut kiffaanngissutsillu piviusup atuutilernissaata qanillineranut takussutissaavoq. Tusagassamik neriulluarnartumik tamatuminnga inunnik allanik oqaluttuussisartut tassaapput apustilit suliáinik agdlagkat 15:14-imi eqqartorneqartutut ’Guutip aqqanik, Jehovamik, innuttassarsiarineqartut’. Kikkut Jehovap aqqa atorpaat silarsuarlu tamakkerlugu Jehova taassumalu naalagaaffia oqaluussissutigalugit? Ukiut 20 hundredessaanni oqaluttuarisaanerup uppernarsarpaa Jehovap Nalunaajaasui kisimik taamaaliortut. Maannakkut 4 millioninit amerlanerupput ilagiinni 66.000-ini silarsuaq tamakkerlugu. — Jesaja 43:10-12; apustilit suliáinik agdlagkat 2:21.
15. Naalakkersuinermut tunngasut eqqarsaatigalugit Guutip kiffai ilumoortut qanoq ililluta ilisarisinnaavavut?
15 Naalagaaffik pillugu oqaluussilluni suliamik Jehovap Nalunaajaasuisa kisiartaallutik eqquutitsinerannut takussutissap aappaa Jesaja, kapitali 2, versi 4-mi nassaassaavoq: „[Jehova] eqqartuussiumaarpoq inuiaat akornanni, inuiaqatigiippassuit eqqartuussisutut aalajangiiffigissavai; saffiussavaat panatik assallatserummut savissaliaralugit, qalugiusatillu saviliaralugit viinnequtilerissutit; inuiaat panamik imminnut silugutissaassapput, sakkunik atuinissamut sungiusarunnaassallutik.“ Aap, Guutip naalagaaffianut atatillugu silarsuaq tamakkerlugu ajoqersuisut ’sakkunik atuinissamut sungiusarunnaarput’. Jesus oqarpoq ’silarsuup ilagissanngikkai’. (Juánase 17:16) Tassa naalakkersuinermut tunngasunut akuliunnaveersaarluinnartuusariaqarput inuiaallu sorsuunnerinik arlaannaannilluunniit illersuisuussanatik. Nunarsuarmi inuiaat tamarmik arlaat kikkut ’silarsuarmut ilaanngitsutut’ aalajangiusimalluinnarlugulu ’sakkunik atuinermut (imaluunniit sorsunnermut) sungiusarumanngitsutut’ oqaatigineqarsinnaappat? Ukiut 20 hundredessaanni oqaluttuarisaanerup uppernarsarpaa Jehovap Nalunaajaasui kisimik taamaaliortut.
16. Guutip nunarsuaq tamakkerlugu ilinniartitaanermik suliarititaa qanoq peqqissaartigisumik ingerlanneqassava?
16 Jehovap Nalunaajaasuisa silarsuaq tamakkerlugu ajoqersuinerat allaat Guutip pissutsit aaqqissuussaanerannik ajortumik suujunnaarsitsereernerani ingerlaannassaaq. Jesaja 54:13-imi ima allassimavoq: „Qitornatit tamarmik uannit, [Jehovamit], ajoqersorneqassapput.“ Ajoqersuinerup tamatuma qanoq peqqissaartigisumik ingerlanneqarnissaa Jesaja 11:9-mi siulittuutigineqarpoq: „[Jehovamik] ilisarsinerup nuna tamakkerumaar[paa] soorlu ermit matoqqagaat immap naqqa.“ Silarsuatoqqap matuma naggatissaani aniguisuinnaanngitsut ajoqersuinermik tamatuminnga pisariaqartitsiuaannassapput, aammattaarli aniguisut meeraat inuillu toqusunit makititaasut milliardilikkuutaat ajoqersorneqarnissaminnik pisariaqartitsissapput. Piffissap ingerlanerani nunarsuarmi inuusut tamarmik piumasamik iliorsinnaanertik eqqornerujartuinnartumik atulissavaat, Guutip inatsisaasa killissarititaasa iluanni. Tamanna qanoq kinguneqassava? „Qanilaartut nuna kingornutissavaat, pilluangaarlutillu inuussapput.“ — Tussiaat 37:11.
Kiffaanngissuseq annertooq maannangaaq
17. Guutip innuttai itsaq inuusut Mosesip sumik peqquai?
17 Israelikkut itsaq nunap neriorsuutigisaasup killinganiittut, Mosesip ima oqarfigai: „Ileqqoreqqusanik peqqussutinillu ajoqersorpassi, soorlu [Jehovap] Guutima taamaalioqqusimagaanga, taakku maleruaqqullugit nunami pigiligassassitut iserfigisassassinni. Peqqussutit taakku maleruaqqissaassavasi; taava inuiaat allat silatuutut siuneqartutullu naatsorsuutissavaasi. Ileqqoreqqusat tamakku tamaasa tusarunikkit ima oqarumaarput: ’Ila inuiassuit uku silatussusii siuneqassusiilu!’ Sumi pissaanilissuarnik inuiaqarnerpa guuteqartunik [Jehovap] uagut Guutitta qinnuigigaangatsinni uatsinnut qanillisarneratut innuttaminnut qanitsigilersartunik?“ — 5 Moses 4:5-7.
18. Maannangaaq Guutip kiffai qanoq kiffaanngissuseqartigilereerpaat?
18 Ullumikkuttaaq Jehovamik pallorfiginnittut millionillit nunap neriorsuutigisaasup killinganiipput — silarsuassap nutaap. Guutip inatsisai maleruaramikkik taanna qanimut attavigaat, taamaalillutillu inuiannit allanit immikkooruteqarlutik. Guutip upperisarsiornikkut paasinnittaatsinit eqqunngitsunit, ammip qalipaataatigut nakerisarsiornermit, ikiaroornartunik inerteqqutaasumik atuinermit, inuiaassutsimik pingaartitsivallaarnermit, sorsunnermit kinguaassiuutitigullu nappaatinit tunillaassuuttunit kiffaajunnaarsereersimavai. Aammalu asannittumik killissaanngitsumik ataasiussuseqartilersimavai. (Juánase 13:35) Siunissaq sioorassutiginagu ’uummammilli iluunngaannit qiimmattarput’. (Jesaja 65:14) Guuti Naalakkatut kiffartorfigigamikku maannangaaq annertuumik kiffaanngissuseqarput. — apustilit suliáinik agdlagkat 5:29, 32; 2 Korintumiut 4:7; 1 Juánase 5:3.
Allat upperisanit eqqunngitsunit aniguisittarpaat
19, 20. Toqungasut eqqarsaatigalugit Bibelimi ajoqersuutigineqartut ikiortigalugit inuppassuit qanoq ilillutik kiffaajunnaarsitaasarpat?
19 Jehovap nalunaajaasuisa oqaluussiffigisaasa ilarpassuittaaq taama kiffaanngissuseqalertarput. Assersuutigalugu, nunani siuaasanit pallorfiginnittarfiusuni Jehovap nalunaajaasuisa inuit allat paasitittarpaat toqungasut sumiluunniit inooqinneq ajortut taammaattumillu inuusunik ajoqusiisinnaanngitsut. Oqaluussisartut Nalunaajaasut oqaasii 9:5 innersuussutigisarpaat, tassani allassimammat: „Uumassuseqartut nalunngilaat toqusussaagamik, toqungasulli sunnguamilluunniit ilisimasaqanngillat.“ Aamma Tussiaat 146:4 innersuussutigisarpaat, tassani erseqqissarneqarmat inuit ’anerningerunik kingumut issunngussasut, pilersaarutaallu ulloq taanna maangaannassasut’. Bibelimmi takutippaa toqungasut tassaalerneq ajortut anersaat aliortugangasut imaluunniit tarnit toqusuitsut ajorunnaarsitsisinnaasut imaluunniit inuusunut ersiortitsisinnaasut. Taamaattumik angakkuarnissinnaanernut palasilluunniit qinnussinerannut erloqilluni aningaasarsiat atussallugit pissutissaqanngivippoq.
20 Bibeli pillugu eqqorluartumik ilisimassutip inuit upperisapalaanit tamanit, ilaatigut anniarfik eqqiarfillu pillugit eqqunngitsumik ajoqersuutinit, inussiaajunnaarsittarpai. Taamaattumik inuit Bibeli tunngavigalugu paasigaangamikku toqusut ilisimajunnaarluinnarlutik itisuumik sinittutut pissuseqalersartut, qanigisamik toqusimasut qanoq pisimanerat isumakuluutigiunnaartarpaat. Akerlianik, piffissaq Paulusip eqqartugaa qilanaarutigilersarpaat: ’Toqusut makikkumaarput, iluartullu iluaatsullu.’ — apustilit suliáinik agdlagkat 24:15.
21. Kikkut qularnanngitsumik makittussat akornanniissappat, qanorlu qisuariassanerpat?
21 Makiffissami makitinneqartut nunarsuarmut toqup, uagut inuit Adamimit kingornussimasatta, naassaanngitsussamut peerulluinnarfigisaanut makissapput. Uummartitaasunut qularnanngitsumik ilaassapput meeqqat Kana’animiut guutiliaannut, soorlu Molekimut, pilliutigineqarsimasut, angutit inuusuttut Aztekerit guutiinut pilliutigineqarsimasut inuillu millionilippassuit sorsunnerup guutianut pilliutigineqarsimasut. Taamanikkussamut inuit toqumut kiffaajunnaarsitaanertik nuanningaartoq qiimmattaatigissavaat ima nillerlutik: ’Toquaa, naak annernartuutitit? Naak pissaanerit aserornartoq?’ — Hosea 13:14, NV.
Jehova ujaruk
22. Guutip silarsuassaani nutaami inoorusukkutta suna eqqarsaatigisariaqarparput?
22 Guutip silarsuassaani naapertuilluartumi piviusumik kiffaanngissuseqarfiusumi inoorusussinnaavit? Taamaappat oqaatsit Israelikkut kinguaariit oqaluttuarisaanerat 2, 15:2-mi allassimasut pingaartittariaqarpatit: „[Jehovap] najorpaasi tunaarigassinni. Ujarussinni nanisikkumaarpoq, tunukkussinnili aamma ilissi tunussavaasi.“ Eqqaamassavat Jehova ilikkarniarlugu taassumalu piumasaanik iliorniarlutit ilumoorlutit suliniutitit Jehovap arajutsinngimmagit. Eprîarinut agdlagkat 11:6-imi allassimavoq Guutip ’ujarlersini akilerumaarai’. Aamma Rûmamiunut agdlagkat 10:11-imi allassimavoq: ’Kinaluunniit taassumunnga uppertoq pakatsisarneqassanngilaq.’
23. Suna pillugu Guutip silarsuassaa nutaaq piviusumik kiffaanngissuseqarfiusoq tikilluaqqusariaqarparput?
23 Qanittunnguakkut Guutip silarsuassaa nutaaq piviusumik ataavartumillu kiffaanngissuseqarfiusoq atuutilissaaq. Taamanikkussaq ’pinngortitat aserujasumut kiffaasut kiffaajunnaarsinneqarumaarput Guutip qitornaasa kiffaanngissusiata naalannaataat pigilerlugu.’ Aamma ’[Guutip] qulliit tamaasa [inuit] isaannit allarterumaarpai, toqulu peqarunnaassaaq, aliasuttoqarunnaarlunilu nilliasoqarunnaarlunilu anniartoqarunnaassaaq.’ (Rûmamiut 8:21; sarĸúmersitat 21:4) Taava Jehovap kiffaasa tamarmik niaqqutik makitissinnaalissavaat nuannaarlutillu Guutip silarsuaa nutaaq kiffaanngissuserlu nassatarisaa unnersiutigalugu ima nillerlutik: „Jehova, qujanaq, kiffaanngissuseq piviusoq tunniussat pillugu!“ (wD 1/4 92)
Qanoq akissavit?
□ Jehovap innuttaminik aniguisitsisinnaanini qanoq ililluni takutissimavaa?
□ Guutip silarsuassaani nutaami sunik tupinnartunik kiffaanngissuseqassava?
□ Jehovap qanoq ililluni inuit inuunissamut ilinniartittarpai?
□ Guutip innuttai Taassumunnga kiffartornerminni maannangaaq qanoq kiffaanngissuseqartigippat?
[Qupp. 12-mi assiliartaq]
Jehovap Egyptenip guutiinit ilumuunngitsunit qutsinnerungaarnini takutippaa pallorfigisini aniguisillugit
[Qupp. 14, 15-mi assiliartat]
Ullumikkut Guutip kiffai ilumoortut ilisarineqarsinnaapput Taassuma nunarsuaq tamakkerlugu ilinniartitaanermik suliarititaa naammassisaramikku