Tusagassaq nuannersoq ulapputigiuartaruk
PIFFISSAQ tamaat oqaluussisartut Jehovap nalunaajaasuisa akornanniittut ilisimalluagaattut apustili Paulus atugaqarsimavoq — pissakitsuusimavoq. Taamaattumik Korinthimiitilluni suliassaq pilimanngitsoq, tupiliorneq, inuusuttuunermini ilinniarsimasani suliarilerpaa. Suliaq tamanna assoroornartuuvoq, qularnanngitsumillu ilaatigut tupiliassaq mattusooq suliaritillugu assai aanaarsuttuinnanngortarput. Paulus naammaqqalaaginnartunik pissaqartaraluarluni nalerisimaartuuvoq, ullormummi suliassani naammassigaangamigit tupiliornermut atortuni illuartarpai suliarlu Korinthimukarsimanerminut pissutaasoq pingaarneq suliarilertarlugu — tusagassamik nuannersumik oqaluussineq! — Filípimiut 4:11, 12.
Ilaanni sabbatiugaa Paulus naalagiarfimmukartarpoq. ’Sanngiitsuulluni mianersorluni uulingaarlunilu’ tusarnaartini siulliit Korinthimiut naapippai. (1 Korintumiut 2:1, 3) Ilaasali tusarliussani tusarnaarmassuk ’sapaatiusaraangat naalagiartarfimmi juutillu griikerillu nakimajunnaarsillugit oqaluttarpoq’. — apustilit suliáinik agdlagkat 18:1-4.
Piffissap ilaani ullup ilaannaa Paulus oqaluussisinnaasimagaluarpoq. Taavali Silas Timoteusilu Makedoniamiut tukkorlutillu tunissutaat, ’ajorsaataanik ikiuutaat’, nassarlugit tikipput. (2 Korintumiut 11:9; Filípimiut 4:15) Kajumissisinneqarportaaq tusaramiuk qatanngutit Thessalonikamiittut naak malersorneqaraluarlutik aalajaatsut. — 1 Tásalûníkamiut 3:6.
Paulus qanoq qisuariarpa? ’Paulusip oqaaseq ilungersuutigaa, juutinullu Jesus Kristusiusoq nalunaajaassutigaa.’ (apustilit suliáinik agdlagkat 18:5) Maannakkut aningaasatigut ajornartorsiuteqarunnaarami Paulusip piffissani tamaat oqaluussinermut atuleqqippaa. Qiimalluni suliaq tamanna suliarileqqippaa, juutit oqaluussiffigiinnarnagit aammattaarli allakkani Guutip sunniineratigut isumassarsiarititaasut siulliit allannissaat piffissaqarfigalugit — tassa Thessalonikamiunut allakkani.
Ullumikkut uatsinnut maligassiuisoq
Paulusip Korinthimi eqiasuilluni sulineranik oqaluttuaq kristumiut tamarmik tusagassamik nuannersumik ilungersuutiginninnissaannik kajumissisinniarlugit atatitaasimavoq. Paulusip misiutiginngilaa Naalakkap Jesusip nammineq ajoqersukkani ’silarsuup qaamasortaasut’ kiffartornermik ataqqinaammik angingaartumik tunisimagai. Qaamaneq isertussanngilaat, Jesus ima oqarsimammat: ’Taamaattaaq qaamasorsi qaamali inunnut, ajunngitsuliasi taakkununnga takoqqullugit Ataatarsilu qilammiusoq unnersiutigeqqullugu.’ (Matîuse 5:14-16) Oqaluussinissaq Jesusip siulittuilluni eqqartugaa tamakkiisumik peqataaffigisariaqarpaat. (Matîuse 24:14; 28:19, 20; apustilit suliáinik agdlagkat 1:6-8) Ilagiit kristumiut suliassaasa pingaarnerpaartaat tassaavoq Naalagaaffik pillugu tusagassap nuannersup siaruarternissaa.
Kristumiut siulliit Paulusitut oqaluussinermik suliaq tamanna pingaarnerpaatut isigaat. Guutip akerartortaasa ’inuunermut siulersuisoq’ peqqarniillutik toqullugu qaamaneq piviusoq qamissimasorigaluaraat taassuma ajoqersugai ilungersorlutik oqaluussillutik silarsuarmut qaamasortaajuarput. (apustilit suliáinik agdlagkat 3:15) Malersugaanerup allaat unitsissinnaasimanngilai. Bibelimi ima oqaluttuarineqarpoq: ’Soraanngillallu ullut tamaasa naalaffimmi illunilu ajoqersuillutik iivangkiiliulu Jesus Kristusimik oqaluutigalugu.’ (apustilit suliáinik agdlagkat 5:42) Suulluunniit unitsissinnaasimanngilai!
Aamma ullutsinni kristumiut oqaluussinermik suliaq ulapputigaat. 1800-kkut naalerneranni kristumiut ilumooqqissaartut Guutip oqaasianik atuaqqissaartartut paasilerpaat ilumoortut Bibelimeersut inunnut allanut siaruartertariaqarlugit. Vagttårnip Peqatigiiffia — ullumikkut nunarsuarmi tamarmiittoq — 1884-imi pilersinneqarpoq. Bibelimik Atuaqqissaartartut, 1931-minngaaniit Jehovap Nalunaajaasuinik taaguuteqarlutik ilisimaneqalersut, eqqortumik oqaatigalugu Guutip oqaasianik ilisarsinermik siaruarterillutik nuna tamakkersimavaat. Taakkua tamaviaarlutik sulisimanerat pissutigalugu ullumikkut oqaluussisartut 4 millioninit amerlanerulersimapput! Qularnanngitsumillu Jehovap siulersuineratigut amerliartortuassapput. — Jesaja 60:22.
Sapinngisannik peqataasarpit?
Jesus oqarsimavoq: ’Katersugassat amerlaqaat, sulisussalli ikeqaat.’ (Matîuse 9:37, 38) 1990-imi inuit 10 millioningajaat Jesusip toquneranik eqqaaniaalluni nalliuttorsiorneq najuffigaat. Tamanna nunarsuaq tamakkerlugu katersuinissamik suli annerusumik ilimasaarivoq! Amerleriartornerli tamanna nuannaarutigigutsigu immitsinnut aperisariaqarpugut: ’Uanga suliaq annertooq tamanna qanoq annertutigisumik peqataaffigaara? Akuttunngitsumik peqataasarpunga — sapinngikkuma sapaatit akunneri tamaasa?’
Utoqqaanertat suliami tamatumani siulersortaasariaqarput, ’savaatinut maligassanngorlutik’. (1 Pîtruse 5:3) Utoqqaanertat tamangajammik nalinginnaasumik suliffeqarput. Paulusili aamma Korinthimiitsilluni suliffeqarsimavoq. Taamaattorli akuttunngitsumik oqalussisarnermut peqataanissaminut piffissaqarsinnaasarpoq. Aamma ullumikkut utoqqaanertarpassuit sapaatit-akunnerisa naanerini anersaakkut tunngasut eqiasuillutik ulapputigisarpaat. Tamanna ilagiinni ilaasortaasunut tamanut kajumissinangaarpoq. Qaammatini immikkut ittumik suliniuteqarfiusuni ilagiit ilaanni oqaluussisartut amerlanersaasa piffissaq annertooq oqaluussinermut atortarpaat. Sooq? Utoqqaanertat oqalussinermi kiffartuussinerullu aaqqissorneqarnerani maligassiuimmata.
Aamma ilagiinni kiffartortut akuttunngitsumik oqaluussisarnermikkut kristumioqatiminnut maligassiuilluarsinnaasarput. Eqqaamajuk Bibeli naapertorlugu ilagiinni kiffartortut ’titsiitsuusariaqartut kiffartorluartariaqarlutillu’. (1 Timûtiuse 3:8, 13) Utoqqaanertatut ilagiinni kiffartortutulluunniit kiffartussagaanni piginnaassuserisariaqakkat ilaat tassaavoq oqaluussinermi aalajaassuseq. — Títuse 1:8, 9.
Soorlu Paulus iliorsimasoq ilaasa sulisarnertik millilersinnaavaat pionerinngorlutillu. Pionerit nalinginnaasut, ikiorti-pionerit pionerillu atorfinitsitat ukiut qulit kingulliit ingerlaneranni 137.861-imit 1990-imi 536.508-mut amerleriarsimapput. Tamanna pisinnaasimavoq aatsaat Jehovap suliaq pilluaqqummagu iluaralugulu. Pionerilli eqqarsaatigisariaqarpaat piffissap silatuumik atorluarnissaa, nalunaaqutap-akunneri eqqarsaatigiinnarnagit. Ilissi pioneriususi oqaluussigaangassi piareersarluarsimasarpisi piffissarlu atorluartarlusiuk? Tamatigut siumukarluarnissarsi aallulluartarpisiuk kiffartornersi kinguneqarluarsinnaaqqullugu?
Oqimaaqatigiissumik kiffartuussinikkut pilluaqqusaanerit
Paasissutissat inuunermut pingaaruteqartut qaammatit tamaasa Napasuliaq Alapernaarsuiffik-mi saqqummersinneqartartut pingaartippigit? Qularnanngitsumik pingaartippatit. Tassuuna atuagassiat tamakkua agguaanneqarnerannut peqataanissannut kajumissisinneqartarpit? Botswanami qatanngut arnaq taamatut kajumissisinneqarsimavoq. Siornatigut sallusuissummik assortuisuusimagaluarpoq, uiatali atuagassianik nipituumik atuffattarsimavaa. Isumaa allanngoriartuaarsimavoq, kingornalu oqaluussisartunngorluni. Naak atuarsinnaananilu allassinnaanngikkaluarluni atuagassianik agguaalluartorujussuusarpoq. Ima oqaannartarpoq: „Atuagassiat atuarsinnaanngilakka, uimali atuffattarpaanga. Assut nuannaraakka, aamma illit qularnanngitsumik nuannarissavatit.“
Sapaatit-akunneri tamaasa suliassamut inuunermut annassutaasumut tamatumunnga illit peqataasinnaavit? Anersaakkut tamatumunnga pisinnaannguleriaruit kristumiut ilagissaasa peqataalernissannut ikiornissat nuannaarutigissavaat. Oqaluussinerli tassaannaanngilaq atuagassianik agguaanneq. Tusagassamik nuannersumik ulapputiginnittut oqimaaqatigiissumik kiffartorniartarput. Aamma atuaqqissaarnermut atortussat allat atorluarniartarpaat. Vagttårnip Peqatigiiffiata atuakkat ungalullit millionilippassuit saqqummersittarpai, anersaakkut inuussutissanik puilasutut ittunik imallit inunnut neqeroorutigineqartartut. Illit oqaluussinermut ima pikkoritsigilersimavit atuakkanik agguaassisinnaalersimallutit, soorlu assersuutigalugu atuagaq pâratîsime nuname nâgssáungitsumik inûsínauvutit?
Inuimmi soqutiginninnermik ersersitsisut qanoq isigaagit? Pulaaqqinnissaat eqqarsaatigalugu allattoqqissaartarpigit? Inuit pulaaqqittarnerisigut immaqa oqaluusseriaatsit nuannaarutissarsinarnerpaartaannut — Bibelimik atuaqqissaaqateqarnermut — peqataanissannut periarfissarsissaatit. Eqqaamajuk Matîuse 28:19, 20 naapertorlugu Jesusip peqqugaatigut ’ajoqersuganngortitseqqulluta kueqqullugillu’. Aatsaat inuit Bibelimik atuaqqissaaqatigigutsigik taamaaliorsinnaavugut. Nassuerutigisariaqarpoq atuaqqissaaqateqalissagaanni uniinnajanngissuseq pisariaqarmat. Assersuutigalugu oqaluussisartup aappariit utoqqasaat naapissimavai Bibelimik atuaqqissaaqatigineqarnissaminnut piumasorujussuit. Sapaatilli-akunneri pingasut tulleriisiinnarlugit atuaqqissaaqatigiinnissartik kinguartittarpaat. Kiisamili aallartipput. Piffissap ilaani sapaatip-akunnera allortarlugu nalunaartarput pisinnaanngikkallarlutik. Naggataatigulli kiisami nuliaasoq kuisissinnaanngorpoq. „Kuisinnermi kingorna,“ qatanngut oqaluttuarpoq, „isai nuannaarnermik imerlaarsisuinnaapput, nuliamalu uangalu isivut aamma taamaapput.“ Aap, tusagassamik nuannersumik siaruarterineq ulapputigiuaraanni nuannaarutissarpassuarnik kinguneqartarpoq!
Kiffartuussinissamut piareersimajuaannarit!
Jesus Kristus apustili Paulusilu tamatumuuna maligassiuilluarsimapput. Aamma ullumikkut Jehovap nalunaajaasuisa akornanni maligassaalluartorpassuaqarpoq. Tusagassamik nuannersumik nalunnginnittut tamarmik tamaviaarlutik inunnut allanut tamatuminnga siaruarterinissaannut piffissanngorpoq. Bibelimi neriorsoqqissaarneqarpugut suliaq tamanna ’asuliinnassanngitsoq’. — 1 Korintumiut 15:58.
Paulusitut amerlanersavut aningaasatigut pisussaaffeqarput naammassisariaqakkaminnik. Taamaattumik amerlasuut pionerinngornissaminnut periarfissaqanngillat. Jehovalli ikiuineratigut tamatta unnersuussut pitsaasoq Paulusip Rûmamiunut agdlagkat 12:11-mi allagaa maleruarsinnaavarput: ’Piniaqqissaagassanut eqiasunnaveeritsi anersaakkut ilungersuagitsi. Jehova kiffartorfigisiuk.’ Pissutsillu allanngorpata oqaluussinermut piffissaqarnerulerluni kikkut tamarmik Jehovamik ilumut asannittut Paulusitut periarfissatik atorluarniassavaat. Tusagassaq nuannersoq ulapputigiuaruk taava massakkuinnaanngitsoq pilluaqqussuterpassuarnik katersuissaatit aammali siunissami nuannaarlutit pilluarlutillu inuuneq naassaanngitsoq angussallugu! — Matîuse 19:28, 29. (wD 1/7 91)