Annakkumalluta qanoq iliortariaqartugut

SOOQ annaanneqarnissamik pisariaqartitsivugut? Ajortip kinguneri naalliuutigigatsigik: naammalluinnanngissuseq, anniaatit, nappaatit, aliasunneq toqulu. Apustili Paulusip nassuiarpaa tamatumunnga pissutaasoq tassaasoq siuaasatta, Adamip, Guutip inatsisaanut pikitsitsinera. Ima allappoq: ’Inukkut ataasiusukkut [Adamikkut] ajorti silarsuarmut tikiuppoq, ajortikkullu toqu tikiulluni, taamalu toqup inuit tamakkerlugit tikikkai, tamarmik ajortuliormata.’ (Rûmamiut 5:12) Sooq Adamip ajortuliornerata kingunerisaanik toqup inuit tamakkerlugit tikippai? Aap, taama ingerlasariaqarsimammat.

Adam ajortuliorami Guutip inatsisaa naapertorlugu toqusussanngortinneqarpoq. Tamanna naapertuilluarnerullunilu pisariaqarpoq. Naapertuilluarneruvoq inuunermik pinngitsoorata pisussaanngikkaluaratta, Guutimilli inuuneq tunissutaammat. Adam piaaraluni ajortuliornermigut tunissutip pigiinnarnissaanut piumasaqarsinnaajunnaarpoq. (Rûmamiut 6:23) Pisariaqarsimavorlu Adam toqusussanngortissallugu sunaluunniit naammalluinnartuunngitsoq naassaanngitsumik piunissaminut akuerisaasinnaanngimmat silarsuarlu mingutsillugu. Taamaattumik Adam ajortulioreerami toqujartulerpoq; ajortilinngornini naammalluinnartuujunnaarninilu pissutigalugit, kinguaaminut naassaanngitsumik inuusinnaaneq naammalluinnassuserlu kingornussaritissinnaajunnaarpai, taamaallaalli naammalluinnanngissuseq ajortilu. — Rûmamiut 8:18-21.

Eqqaamasariaqarparpulli Guutip ajunngissusia pisassarinngisaraluarput kisiat pissutigalugu inuusinnaatitaagatta — naak inuunikikkaluarluta. (Job 14:1) Guuti pinngitsoorani pisussaanngilaq Adam Evalu toqunnginnerini kinguaassiortissallugit. Taama iliornissaalli akueraa uppernarsineqarsinnaaqqullugu inuit naammalluinnanngitsut kisimi naalagaassusia tapersersorsinnaagaat imminut aalajaatsuunermikkut. Aammattaaq akueraa nalunnginnamiuk pikitsitsisut taakku marluusut, Adamip Evallu, kinguaavi ilumoortut naggataatigut utertissallugit imaluunniit annaatissallugit. Qanoq ililluni?

Annannissamik aaqqissuussineq

Jehova Guutip eqqartuussunni naapertuilluartoq allanngortiinnarsinnaanngilaa. Adamip ajortuliornera kingornalu inuit ajortuliarpassui isiginngitsuusaaginnarsinnaanngilai. Guutip inatsisini naapertuilluartut sumiginnaraluarpagit inatsiseqartitsineranut mianerinninnerup tatiginninnerullu aseruutigissagaluarpaa. Takorlooriaruk eqqartuussisup namminissarsiorluni pinerluttoq pillagaanissaraluanit aniguisippagu qanoq akaarinninnginnermit nillianeqartigissagaluartoq. Eqqartuussisulli naakkinnittup ilumoorneq tunuliaqutaralugu pillaammik pinerluttoq sinnerlugu akiliiumasoq akiliisissinnaavaa. Guutip uatsinnut iliuusaata tamanna missiliorpaa.

Jehovap ernini, Jesus Kristus, pisinnaatissimavaa Adamip inuuneranik naammalluinnartumik atulussinnagaanik inuunerminik naammalluinnartumik taarsiinnissaanik. Jesusip piumalluarluni ajortuliatsinnut pillaat, toqu, atorpaa. (Jesaja 53:4, 5; Juánase 10:17, 18) Bibelimi allassimavoq: ’Inuup ernera tikiuppoq inuunini akissatut tunniussallugu amerlasuut utertinneqaatissaannik.’ (Matîuse 20:28; 1 Timûtiuse 2:6) Kinaluunniit alla taama iliorsinnaasimanngilaq. Jesus kisiartaalluni ajorteqarani inunngorsimavoq inuuninilu tamaat ajortuliorani naammalluinnartuusimalluni toqunini tikillugu. (Eprîarit 7:26; 1 Pîtruse 2:22) Toqunini tikillugu aalajaatsuunermigut ajortitsinnik akiliussinnaasimavaatigut.

Guutili, Eqqartuussisoq qutsinnerussaartoq, pinngitsoorani pisussaanngilaq inuit tamaasa pillaammit aniguisissallugit. Jesusip inuunerminik naammalluinnartumik pilliutiginninnera ajortuliavut pissutigalugit akiitsukkatsinnik akiliinertut isigaa — inunnulli nalunngikkaluarlugu piaaralutik ajortuliortuartunut atuutitinnagu. Isumakkeerfiginninneq annassullu kikkuugaluartunulluunniit atuuttussaq Bibelimit neqeroorutigineqanngilaq, takutinneqarporli ajortip kingornussarititaasup kingunerinit aniguisitaasinnaassagaanni piumasarisaqartoq naammassineqartariaqartunik.

Piumasarisat naammassisariaqartut

Annaanneqarnissamut suut piumasarineqarpat? Apustili Paulusip parnaarussat paarsisaannut filippimiuusumut akissutaa piumasarisat pingaarnersaraat: ’Naalagaq Jesus Kristus upperfiguuk, taava annakkumaarputit.’ (apustilit suliáinik agdlagkat 16:31) Annakkumagutta qamuuna uummatitsigut Jesusip aavata kuineqartup nalinga akuerisariaqarparput. Annannerlu uagutsinnut qanoq isumaqarpa? Jesusip tamanna ima nassuiarpaa: ’Inuunermik naassaanngitsumik tunisaraakka, tammarnavianngilluinnassappullu.’ (Juánase 10:28) Inuit amerlanersaannut annanneq, nunami paratiisinngorteqqitaasumi naassaanngitsumik inuunermik kinguneqassaaq. (Tussiaat 37:10, 11; sarĸúmersitat 21:3, 4) ’Savarpannguanulli’ Jesusimik naalagaaffiani qilammiittumi naalagaaqatiginninnermik kinguneqassalluni. — Lúkarse 12:32; sarĸúmersitat 5:9, 10; 20:4.

Inuit ilaat isumaliortarput Jesusimut upperaanni naammattoq. „Qilammut piniaraanni ataasiinnaq kisiat pisariaqarpoq,“ upperisarsiornermut atatillugu allassimasoqarpoq. „Tassalu Jesus Kristus namminermut annaassisutut akueralugu, tunniuffigalugu Naalakkatut taamaattuuneralu silarsuarmut ammasumik nassuerutigalugu.“ Inuppassuillu taamaammat isumaliortarput tassanngaannaq misigissuseqarpaluttumik mumisitaanerup naassaanngitsumik inuuneqalernissaq qularnaallisissagaa. Annannissamulli piumasarisaq pingaarutilik ataasiinnaq siunniukkaanni sinnerilu puigorlugit, assigiinnarpaa isumaqatigiissummi piumasarisaq pingaartoq ataasiinnaq aalajangerfigalugu sinnerilu isiginngitsuusaarlugit.

Tamanna Jesusimut uppernerup nassuerutiginerinnaatigut annassinnaasutut misigileraluarsimasut oqaaseqaataannit erserluarpoq. Bernice oqaluttuarpoq: „Qatanngutigiinniani peroriartoraluarlunga tupigusuutigaara una: Inuuneq naassaanngitsoq Jesusikkut kisiat pisinnaagutsigu, soormitaavaana ima oqarsimasoq: ’Tassaavorli inuuneq naassaanngitsoq illit ilisaralutit kisivit ilumut Guutiusutit aallartitallu Jesus Kristus ilisaralugu’?“ — Juánase 17:3.

Norman ukiuni qulingiluani annassimasutut misigisimasimavoq. Paasilerpaali naammanngilluinnartoq misigissuseqarpaluttumik Jesus Kristusip annaassisuuneranik nassuerutiginninneq. „Bibeli tunngavigalugu paasisimavara naammanngilluinnartoq Guutimut ajortuliunerput annaanneqarnissamillu pisariaqartitsinerput kisiisa nassuerutigissallugit,“ Norman oqarpoq. „Aammattaarli allamik isumataarnermut naapertuuttumik suliaqartariaqarpugut.“ — Matîuse 3:8; apustilit suliáinik agdlagkat 3:19.

Aap, annaanneqassagutta pisariaqarpoq Jesus upperfigissallugu, tamannaannarli naammanngilaq. Jesusip oqaluttuarai imminut uppernerminnik nassuerutiginnittut allaallu atermigut ’angisuunik nalunaaqqutiliortut’. Taamaakkaluartorli taakku ilisariumanngilai. Sooq? Iluaatsuliortuummata Ataatamilu peqqusaanik iliortuunngimmata. (Matîuse 7:15-23) Ajoqersugaq Jakob ima allappoq: ’Oqaaserlu naammassillugu pigitsi tusaaginnarnagulu, ilissinnut salloqittaqinavusi.’ Aamma oqarpoq: ’Illit upperaat Guuti ataasiusoq; iluartumik pivutit; anersaapiluittaaq upperaat uulillutillu . . . upperneq sulianik ilaqanngitsoq toqungavoq.’ — Jâko 1:22; 2:19, 26.

Inuilli ilaasa aalajangiullugu oqaatigaat ilumut annassimasut Guutip piumasaanittaaq tamanik iliortuusut. Pissutsilli piviusut qanoq takutitaqarpat? Denis, inuusuttunnguulluni ’Jesusimik ilassinnittoq’, oqaaseqarpoq: „’Annassimasut’ nalunngisarisimasakka Bibelip misissornissaanut annertunerusumik pisariaqartitsisutut misigisimanngillat, isumaqaramik tamarmik annattussanngorsimallutik.“ Aap, „annassimasorpassuit“ akornanni ilumoortuusaarniarnersuup kristumiorpalunngitsumillu ileqqulersornersuup annannissamik isuma allaat tutsuiginarunnarsissimavaat.

Amerlasoorpassuilli tutsuiginartuutippaat Bibelimi allassimasoq: ’Ernermut uppertoq naassaanngitsumik inuussuteqarpoq.’ (Juánase 3:36) Aalajangiussimavaat ataasiarluni Naalagaq Jesus Kristus namminermut annaassisutut akueralugu ilassisimagaanni qaqugumulluunniit tammartoqaqqissinnaanngitsoq. „Ataasiarluni annassimasoq, qaqugumulluunniit annassimassaaq“ oqariartaaseraat. Tamannaavali Bibelip ilumut oqaatigisaa? Apeqqut akissutissarsiniarlugu Bibelip tamanna pillugu oqaatigisai tamakkerlugit eqqarsaatigisariaqarpavut. Guutip oqaasiani aalajangersimasuinnaat atuarutsigik ’immitsinnut salloqittariaannaavugut’.

„Ataasiarluni annassimasoq, qaqugumulluunniit annassimassaaq“?

Maluginiaruk ajoqersukkap Judasip Guutimit isumassarsisitaalluni mianersoqqussutaa. Ima allappoq: ’Asanartusi ukorsii, annaqatigiissimassutsitsinnik ilungersungaarlunga allaffiginialerassi, oqaaqqissaarumallusi allaffigisariaqartippassi upperisassaq iluartunut tunniussaareersoq assoruutigeqqullusiuk.’ (Jûtarse 3) Sooq Judas taama allappa? Nalunnginnamiuk kristumiut ataasiakkaat ’annaqatigiissimassusertik’ annaasinnaagaat. Allapportaaq kissaatigigamiuk eqqaasikkumallugit ’Jehovap, innuttani [Israelikkut] Ægyptenimiut nunaannit aniguisikkaluarlugit, uppinngitsortaat kingullermik nungutikkai.’ — Jûtarse 5.

Judasip mianersoqqussutaa tunngavissaqassanngikkaluarpoq kristumiut Israelikkut ulorianartorsiorsimanerattut ulorianartorsiunngikkaluarpata. Jesus Kristusip pilliutaata nalinga Judasip nalornisiginngilaa. Pilliutip tamatuma ajortimit annaappaatigut, imminerminullu uppertoq Jesusip paariumaarpaa. Kialuunniit assaanit peersissinnaanngilai. Jesusilli sernissuinera annaasinnaavarput. Qanoq ililluta? Israelikkut Ægyptenimit aniguisitaasut ilarpassuisut pissusilersornitsigut. Guutimut naalanngitsuuneq piaaraluta qinersinnaavarput. — 5 Moses 30:19, 20.

Takorlooriaruk illumit ikuallattumit annaanneqarlutit anninneqartutit. Ikualanersuarmit ajornak aniguigavit eqqissiallaqalutit anersaartorsinnaanngorputit annaassiniartartullu oqarfigigaatit: „Maanna isumannanngitsumiilerputit.“ Aap, toqunissaraluannit annaanneqarputit. Tassanngaannarluinnartumilli sianiitsorpallattumik isumassarseriataarlutit illumut iseqqeriataaraluaruit, taava inuunerit ulorianartorsiorluinnartitaaqqilissagaluarpoq.

Kristumiut annaanneqarsimasutut misigisimaffimmi inissisimapput. Guutip isaani akuerisaanertik pillugu naassaanngitsumik inuulernissartik qilanaaraat. Ataatsimooqatigiissutut ajortimit kingunipiluinillu annannissartik qularinngilaat. Ataasiakkaatulli annaanneqarsinnaapput naassaanngitsumillu inuulerlutik aatsaat Guutip piumasai malillugit inuujuarunik. Jesusip tamanna erseqqissarpaa imminik viinneqummut assersuunnermigut ajoqersukkanilu viinnequtip avalequtaanut. Ima oqarpoq: ’Avalequtit uanniitut inerititaqanngitsut nungullugit [Guutip] peerarai . . . uanniittuanngitsoq avalequtitut igitaassaaq toqullunilu; taamaattut katersoraraat innermullu qisugalugit ikikkarlugillu.’ (Juánase 15:2, 6; Eprîarit 6:4-6) Jesusimut uppernermik annaasaqartut inuuneq naassaanngitsoq pinavianngilaattaaq.

’Naggatissamut aalajangersoq annakkumaarpoq’

Aap, annakkumalluta assigiinngitsunik iliuuseqartariaqarpugut. Guutip siunertaanik annannissamillu aaqqissuussineranik ilisarsineq pigiliuttariaqarparput. Annassutaasumut Jesus Kristusimut uppertariaqarpugut, Guutillu piumasaanik inuunitta sinnerani iliorluta. (Juánase 3:16; Títuse 2:14) Taama iliorutta annassaagut aatsaalli maanna inuunerisatta imaluunniit aaqqissuussaanerup matuma naggatissaa tikillugu taama iliortuarutta. ’Naggatissamut aalajangersoq annakkumaarpoq.’ — Matîuse 24:13.

Paulusip Silasillu annannissamik tusagassamik oqaluussinerannut Filippimi parnaarussat paarsisaat illuaniittullu allat ajunngitsumik qisuariarput. Ima allassimavoq: ’Erniinnarlu taanna ilagisanilu tamarmik kuisipput.’ (apustilit suliáinik agdlagkat 16:33) Uaguttaaq taama qisuariarutta, Jehova Guutimut erneranullu, Jesus Kristusimut, qanittumik pilluaqqussuterpassuaqartumillu attaveqalissaagut. Guutillu annannissamik aaqqissuussinera qularutiginagu iluaqutigisinnaalissallugu. Parnaarussat paarsisaat Filippimiu ’nuannaarpoq inoqutini tamaasa ilagalugit Guutimut uppertunngorami’. (apustilit suliáinik agdlagkat 16:34) Uaguttaaq Guutip piumasaanik iliorutta angingaartumik ’nuannaalissaagut’. (wD 15/9 89)

[Qupp. 7-mi assiliartaq]

Qanoq pisoqassava annaanneqareeraluarlutit illumut ikuallattumut uteqqikkuit?