Ima oqarusuppit: „Tassaavunga! Aallartinnga“?
„[Jehova oqarpoq]: ’Kina aallartissavara, kinalu angalasortarissavarput?’ Taava oqarpunga: ’Tassaavunga! Aallartinnga.’“ — Isaia 6:8, NV.
1, 2. Immikkut ittoq suna aappariit nuannaarnissamut peqqutigisimavaat?
„NUANNAARUTIGAARPUT nalunaarfigisinnaagassi Colombiamut aallassamaaleratta. Maani Ecuadorimi kiffartuuterput immikkut pisinnaatitaaffiusoq nuannaralugu atorsimavarput — uuma skrivemaskinap allaatigisinnaasaanit nuannaarutiginerungaarsimavarput.“ Taama nipeqarput allakkat Jehovap Nalunaajaasuisa marluk, Vagttårnip peqatigiiffiata Ecuadorimi immikkoortortaqarfissaanik allaffiliortitsinerani peqataasimasut, allassimasaat.
2 Kisianni oqaluussisartut taakku Ecuadoriliarsimapput sanaqataaginnarniaratik; kristumiutut ajoqersuinermi aamma iluaqutaasimapput. Ima allapput: „Paasisimavarput oqaluussisarneq tamanit pingaarnerpaasoq. Sapaatit akunneri pingasuinnaat qaangiupput nalunaajaasut arfineq-pingasuulluta silaannarmi niuerniarfimmiikkatta. Atuakkat 73-it atuagassiallu 40-t sinneqartut tunivavut. Tamanna sapaatip-akunneranik ataatsimik sioqqullugu marlunnik Bibelimik atuaqqissaaqatiginnittalerpugut. Maani allaffimmik immikkoortortaqarfiusumik pisariaqartitsisoqarnera malunnaqaaq. Nuliaralu qutsavigiumavassi allamik atorfeqarata kiffartuussinerup immikkut ittup tamatuma ingerlatiinnarnissaanut akuerigatsigut,“ Colombiami.
3. Amerlasuut Esajasitut isumaqarnertik qanoq ilillutik ersersissimavaat?
3 Aappariit taakkua, allallumi hundredillit arlaqartut nunanut allanut aallarnissaminnik neqeroorutiginnissimasut, pruffiitip Esajasip isumaanut assingusumik isumaqarput. Taassumami tusaramiuk Jehova ima oqartoq: „Kina aallartissavara, kinalu angalasortarissavarput?“ akivaa: „Tassaavunga! Aallartinnga.“ Taava Guutip ima inappaa: „Aallarit oqarlutillu inuiannut ukununnga: ’Tusartuassaasi, paasisaqassanasili; takunnittuassaasi, ilisimassulli pissanasiuk.’“ (Isaia 6:8, 9, NV) Suliassaq sunaana Esajasip nammineq kajumissutsimigut suliariumallugu nalunaartoq, sumillu inerneqarpa? Oqaluttuaq tamanna tamatta immikkut sumik ilinniarfigisinnaavarput? Ullumikkumut naleqqiunneqarsinnaava?
Esajas oqaluussinissamut piginnaatinneqartoq
4, 5. (a) Esajasip takorruukkaminik kapitali 6-imi atuarsinnaasatsinnik allaatiginninnerata nalaani pissutsit suut atuuppat? (b) Esajasip takkorruukkamini tassani suut takuai?
4 Ukiumi kunngi Uzzijap toquffigisaani Jehovap Esajas ima aperaa: „Kina aallartissavara?“ (Isaia 6:1, 8) Kunngi Uzzija ukiumi 777 u.n.a.s. toquvoq, Jerusalemip Babylonimiunit tiguagaanera taamaalillunilu Judap nunaata piuneerunneqarnera ukiunik 170-inik sioqqullugu. Jehovap tamanna sioqqullugu ilisimareerpaa taamatut pisoqartussaasoq, taamaattumillu Esajas piginnaatippaa tamatumunnga tunngasumik tusarliussinissaanut. Taamatut piginnaatitaanera sumik ilinniarfigisinnaavarput?
5 Piginnaatitaanermik tunineqarnermini takusaasa itisuumik misigisaqartissimassavaat — soorluttaaq uatsinnut taamaassimassagaluartoq. Ima allappoq: ’Jehova takuara kunngip issiavissaarsuani qutsissumi portuusumi issiasoq, atisaatalu naalaffiup ilua tamakkerpaa. Serafit avatangerpaat, tamarmik arfinilinnik sulullit: marluk kiinnaminnut uligaat, marluk isikkaminnut uligaat, marluk timmisigaat. Torlorfigeqatigiippullu oqarlutik: Illernarpoq, illernarpoq, illernarpoq Jehova katersaarsuit Guutiat, naalannarsusiata nuna tamakkerpaa.’ — Isaia 6:1-3.
6. Sooq Esajasip taamatut takorruuinera immikkut pisinnaatitaaffiua angisooq?
6 Esajasip nalunngilaa Uzzija pupissunngortitaasimasoq, makitasuulluni naalaffiup Illernartortaanut iserluni tipigissaatilliisimanini pissutigalugu, massa naggueqatigiinnut palasikkuusunut ilaasortaanani. Taamaattumik Esajasimut immikkut pisinnaatitaaffiuvoq aningaartoq Guutip takkua takusinnaasimagamiuk! Esajasip, inuup naammalluinnanngitsup, Jehova piviusumik takunngilaa, kisianni takorruuinikkut takusinnaasimavaa. (2 Môrsase 33:20-23) Tamanna pisinnaatitaaffiusoq angingaartoq erseqqissarneqarpoq inngilinit angisuumik atorfilinnit (serafinit) Jehovap issivissaarsuata eqqaani kiffartortunit. Guutip illernassusia misiutiginagu ataqqinnillutik ’kiinnatik’ matuaat. Aammattaaq Guutip illernarsusia nipituumik suaarutigaat. Illit qanoq isumaqarpit tamanna inuup qanoq misigisaqarfigisinnaagaa?
7. Esajas qanoq qisuariarpa, sunalu pissutigalugu immaqa aamma uagut taamatut misigisimavugut?
7 Apeqqut taanna Esajasimut akitissinnaavarput: ’Oqarpungalu: „Eqqanaq uanga! Nipangersitaalerpunga; minguttuunik qarloqartunga inuiaallu minguttuunik qarlullit akornanni nunaqartunga, isima takummassuk kunngi, Jehova katersaarsuit Guutiat!“’ (Isaia 6:5) Esajasip ilisimavaa Guutip oqaaseqartartorigaani, takorruugaatali tamatuma eqqaasippaa minguttuuneranik, aammalu Kunngip naalannartup illernartullu taassuma oqaaseqartartuata qarlui minguitsut pigisassaraluani piginngikkini. Uaguttaaq immaqa ilaannikkut ajortilittut kukkoqqajaasarnivut nanertisimassutigisutut misigeqqajaasarpavut; ilaannikkullu qinunikkut Guutimut saaffiginninnissatsinnut ajukkuteqqajaasarluta, sulilu ajukkunnerusinnaalluta aqqata uatsinut atorneqarnissaanut. Taamatut misigisimagutta taava Esajasip kingorna misigisaa atuarutsigu qiimmaallaatigissavarput.
8. Maannakkununa inngili susoq, sumillu inernilimmik?
8 Serafit ilaata ornippaa aamarsuarmik aamaartumik ikikkagassanik pilliisarfimmeersumik nassarluni. Taassuma aamarsuarmik taassuminnga Esajasip qarlui attorpai oqarlunilu: ’Takuat, matuma qarlutit attormagit, ajortuliat piiagaavoq, ajortuliaatsillu matuugaavoq.’ (Isaia 6:6, 7) Salomonip nalaani Jehova qilammit innermik nakkartitsivoq nalunaarutiginiarlugu ikikkagassanik pilliisarfik akuerigini, naak tassani pilliutigineqartulluunniit palasit Guutip isaani minguivissutut isigineqalersissinnaanngikkaluaraat. (2 nalunaerssûtigdlit 7:1-3; Eprîarit 10:1-4, 11) Esajasip minguttuunini aamarsuarmit aamaartumit peerneqarmat, Jehovap oqaasia, tassa kiffartuutissamut immikkut ittumut tigusinissamut pisariaqartoq naapertorlugu ajortini matoorneqarsimasut, akuerisinnaalerpaa. Tamanna siunissamik qanoq ittumik takutitsiva?
9. Esajasip tusarliussaata suna pingaarnersarisussaavaa?
9 Soorlu taaneqareersoq Esajas misigisami tupinnartup tamatuma kingorna oqaluussinissaminut piginnaatinneqarpoq. (Isaia 6:8, 9) Kisianni sooruna oqartoq inuit tusarumaartut ilisimassummilli angusinaviaratik? Guuti nangippoq: ’Inuiaat ukua uummataat killitassaajunnaarsikkit, siutaallu siussarlutsikkit, isaallu nipitikkit; takoqinapput saallutillu peqqissillutillu.’ (Isaia 6:10) Imatut paasisariaqarpa Esajas soqqusaatsuussasoq kusananngitsuliussallunilu, tamatumalu kingunerisaanik juutit imminik akuersorunnaassasut Jehovamillu saakkumanatik? Naamik. Jehovap oqaasiisa takutiinnarpaat juutit amerlanerit qanoq qisuariarumaartut, qanorluunniit ilumoortigaluni peqqissaartigalunilu Esajasip nammineq kajumissutsimigut nalunaajaaneq ima oqarluni suliariumasani: „Tassaavunga! Aallartinnga,“ ingerlakkaluarpagu.
10. (a) Kikkut pisuullutik inuit oqaatigineqarsinnaappat tappiitsuullutillu tusilartuusut? (b) Esajas suna eqqarsaatigalugu ima aperiva: ’Qanoq sivisutigisumik, Jehova?’
10 Kukkussut inunniippoq. Naak Esajasip ’tusartuarnissaminnut’ periarfissikkaluaraatik, ilisimassummik pinavianngillat paasinninnaviaratillu. Guutip siumut oqaatigereersimavaa amerlanerit uteriissusertik anersaamullu tunngasunut soqutigisakissusertik pissutigalugu Esajasip oqaluussinera tusarumanavianngikkaat. Ikinnerusut immaqa tusarumassapput. Amerlanerilli ima tappiitsigissapput soorlu isaat nipinneqqummik kimittuumik nipitinneqarsimasut. Pissutsit alianartut taama ittut qanoq sivisutigisumik atuutissappat? Tamannaana Esajasip apeqqutigigaa — imaanngitsoq ukiut qassit oqaluussissanerluni — oqarami: ’Qanoq sivisutigisumik, Jehova?’ Guutilu akivoq: ’Illoqarfiit piuneerullutillu nunagineqassaarpata.’ Tamannalu pisimavoq, aatsaalli Esajasip toqunerata kingorna. Babylonimiut nunap inui tigusaraat Judallu ’inuerunnera’ ’angeqaaq’. — Isaia 6:11, 12; 2 kúngit 25:1-26.
11. Tuppallernartumik sumik Esajasip tusarliussaa imaqarpa?
11 Taamaakkaluartorli naggataagut Jehovap Esajas neriorsoqqissaarpaa tamanna neriuutissaqanngilluinnanngitsoq. Suli nunap ’aggornerisa qulingi atassapput’. Aap, nuna ’soorluli orpik manngertuusarluunniit manngertorluunniit kipigaanni manngua atasoq, taamaalluni mannguat kingunissaassaaq illernartoq’. (Isaia 6:13) Ukiut 70-it Babylonimi inussiaareerlutik kinguaassaq imaluunniit sinneruttut nunaminnut uterput, soorlulusooq orperujussuaq kippakoq nutaaliorluni naajartoqqilersoq. (2 nalunaerssûtigdlit 36:22, 23; Esra 1:1-4; naleqqiuguk Jûpe 14:7-9; Dâniale 4:10, 13-15, 26.) Naak Esajasip tusarliussaa nikallornaraluarluni aammattaaq tuppallernartortaqarpoq. Aammalu Esajasip tusarliussaanut siunissami pisussanut tikkuartuussisuusutut isiginninnerput Bibelimik tunuliaqutaqarpoq. Qanoq ililluni?
Eqquunnerit pingaarnerit
12. Bibelimi suna tunngavigalugu Jesus taaneqarpa „Esajas anneq“?
12 Ukiut hundredillit arlaqartut qaangiuttullu Esajasimik annermik taasinnaasatsinnik takkuttoqarpoq — tassa Jesus Kristus. Inuttut nunami inuunini sioqqullugu qilammi inuutilluni nammineq kajumissutsimigut ataataminit nunamut aallartinneqarnissi akuerisimavaa, oqaluussinerminilu ilaatigut Esajasip allagarisimasaanik taasaqartarpoq. (ússatit 8:30, 31; Juánase 3:17, 34; 5:36-38; 7:28; 8:42; Lúkarse 4:16-19; Isaia 61:1) Soorlu taamani nassuiaatigigamiuk sooq ajoqersuinini, Isaiap agdlagaisa kapitaliisa arfernat unnersuuppaa. (Matîuse 13:10-15; Mákorse 4:10-12; Lúkarse 8:9, 10) Kapitalimut tassunga unnersuussinera pitsaasumik tunuliaqutaqarpoq, tassami juutit Jesusip oqaluussiffigisai Esajasip oqaluussiffigisimasaaniit tusakkaminnik akuersaarnerunatillu maleruaarusunnerunngimmata. (Juánase 12:36-43) Juutit Jesusip tusarliussaanut imminnik ’tappiillisillutillu tusilartunngortissimasut’ ukiumi 70-imi piuneerussaanermik aammattaaq nalaanneqarput soorlu ukiumi 607-imi u.n.a.s. taama pisoqarsimasoq. Ukiuni hundredilinni siullerni piuneerussaaneq Jerusalemimut annikilliornartumik nassataqarpoq ’silarsuaqaleqqaarneranit mannalu tikillugu naleqanngisaannartumik kingornaluunniit naleqassanngitsumik’. (Matîuse 24:21) Kisianni soorlu Esajasip siulittuutigereersimagaa sinneruttoqarpoq, ’kinguaassamik illernartumik’, uppernermik ersersitsumik. Sinneruttoq taanna anersaakkut inuiaqatigiinngorpoq, tanitaasoq, ’Israel Guutip pigisaa’. — Galâsiamiut 6:16.
13. Sooq ilimagisinnaavarput Isaia, kapitali 6, eqquuteqqissasoq?
13 Tamatuma uparuuppaatigut Isaia, kapitali 6-ip eqquuteqqinneranik. Ukioq 60-ip u.n.a.k. missaani apustili Paulusip nassuiaatigaa sooq juutit ilarparujussuisa Romami imminik tusarnaarsimasut ’Guutip naalagaaffianik nalunaajaassutiginninnera’ akueriumasimanngikkaat. Pissutaasoq tassaavoq Isaia 6:9, 10 eqquuteqqimmat. (apustilit suliait 28:17-27) Imatut paasisariaqarpa Jesus qilaliarnerata kingorna ajoqersugai tanitaasut Esajasip kiffartuutigisimasaata assinganik suliaqassasut? Aap.
14. Jesusip ajoqersugaasa qanoq ilillutik Esajasip suliaata assinga naammassisinnaassavaat?
14 Esajasip annerup qilaliartinnani oqaatigaa ajoqersukkani anersaamik iluartumik tunineqarumaartut taavalu ’nalunaajaasigiumaarini Jerusalemimi Judæamilu tamarsuarmi Samariamilu nunallu isuanut allaat’. (apustilit suliait 1:8) Soorlu ikikkagassanik pilliisarfimmi Esajasip ajortuliaanik peersisinnaasumik peqartoq, taamattaaq Jesusip pilliutigineqarneragut ajoqersugaasa ajortiminnik isumakkeerfigineqarnissaat tunngavissinneqarpoq. (3 Môrsase 6:12, 13; Eprîarit 10:5-10; 13:10-15) Taamaattumik Guutip anersaamik iluartumik tanissinnaasimavai, tamannalu ilutigalugu ’nunap isuanut allaat’ nalunaajaanissaannut nakuussusilerlugit. Pruffiiti Esajas aammalu Esajas anneq tamarmik aallartitaasimapput Guutip tusarliussaanik saqqummiussissallutik. Jesusip ajoqersugai tanitaasut aammattaaq ’Guutimit aallartitaapput Kristusimi’. — 2 Korintumiut 2:17.
15. Esajasip tusarliussaanut assingusumik oqaluussissutiginninnermut nalinginnaasumik qanoq qisuariarneqarsimava, taamaattumillu sumik pisoqassava?
15 Ukiuni nutaanerusuni makkunani, pingaartumik sorsunnersuup siulliup kingorna, kristumiut tanitaasut misiutiginngilaat Guutip tusarliussaanik, ilaatigut ’Guutitta ulluata akiniaaffiup’ qanillineranik, nalunaajaatiginninnissap pisariaqartinneqassusia. (Isaia 61:2) Ullussami tassani kristumiuuneraqatigiit, qanga Israelimut iliorsimanerattut Guutimut innuttaanerartartut, aseruinerit eqqornerpaassavaat. Naak ukiuni qulikkaani arlaqalersuni Guutip nalunaajaasui tanitaasut oqaluussisimagaluartut, taamaattoq kristumiuuneraqatigiinni ilaasortaasut amerlanerit ’uummatitik killitassaajunnaarsissimavaat; siutitillu matusimallugit’. Esajasip siulittuutaata ersersippaa taamaattuassasoq ’illoqarfiit piuneerullutillu nunagineqassaarserlugit, illullu inussaarutserlugit, nunalu piuneerunnerinnanngorluni inuerusserlugu’. Pissutsit taama ittut ilisarnaataassapput pissutsit aaqqissuussaanerata matuma ajortup naggatissaanut. — Isaia 6:10-12.
„Aallartinnga“
16. ’Amerlangaartut’ qanoq ilillutik suliamut Esajasip suliarisimasaatut ittumut peqataappat?
16 Ullumikkut millionilinnik kristumioqarpoq suliassaminnik aallussilluartunik Bibeli tunngavigalugu paratiisimi nunami naassaanngitsumik inuunissamik neriugisaqartunik. Jesusip aavanik pilliut tunngavigalugu maannakkut pisariaqartoq naapertorlugu ’amerlangaartut’ ajortiminnik isumakkeerfigineqarsinnaapput. Kristumiut tanitaasut sinneruttut ilagalugit Guutip anersaavagut nakussatsinneqarlutik ikiorneqarlutillu oqartarput: „Tassaavunga! Aallartinnga.“ Sunali suliarissallugu aallartinneqarpat? Tamanna Rûmamiunut agdlagkane 10:13-15-imi Paulusip nassuiarpaa: ’Kinaluunniimmi Jehovap aqqanik torlorfiginnittoq annakkumaarpoq. Qanorli ilillutik upperfiginngisartik torlorfigissavaat? Qanorlu ilillutik tusaamanngisartik upperfigissavaat? Qanorlu ilillutik oqaluussisoqanngippat tusassappat? Qanorlu ilillutik aallartinneqanngikkunik oqaluussissappat? Soorlu allassimasoq [Isaia 52:7-imi, NV]: „Ila takorannersusia: pisuinnarlutik aggerput ajunngitsut pillugit tusagassamik nuannersumik tusarliisut.“’ — sarĸúmersitat 7:9-15.
17. Esajasip siulittuutaanut naleqqiullugu tusarliussarput sumik imaqarpa?
17 Eqqaamajuk Esajasip tusarliussassaq nalunaajaassutissani sunaanersoq suli paasinagu ima oqarsimammat: „Tassaavunga! Aallartinnga.“ Akerlianilli uagut nalunngilarput apeqqummut uumunnga: „Kina aallartissavara? Kina angalasortarissavarput?“ kajumillutik qisuariartunut suna Guutip nalunaajaatigeqquneraa. Tusarliussap imaraa ’Guutitta ulluanut akiniaaffimmut’ mianersoqqussut, aammattaarli imaraa ’ajunngitsut pillugit tusagassaq nuannersoq’. ’Aallartitaasut’ ilaatigut torlulaqataassapput ’aallarussaasut iperarneqarfissaannik, parnaarussaallu annivissaannik’. Isumaqassannginnerpit tusarliussaq taama ittoq nalunaajaatigissallugu kajumissinarlunilu naammagisimaarinnilernassasoq? — Isaia 61:1, 2.
18, 19. Qanoq immikkut ittumik ilillutik amerlasuut oqarpat: „Aallartinnga“?
18 „Ajunngitsut pillugit tusagassamik nuannersumik“ nalunaajaaqataareersimaguit, taava Isaiap agdlagaisa kapitaliisa arfernannik misissuinerpit immaqa imminut aperitippaatit: Isaia 6:8 naapertorlugu qanoq ilillunga naammassisaqarniarnerusinnaavunga? Allaaserisap matuma aallaqqaataani aappariittut eqqartorneqartutut silarsuaq tamakkerlugu namminneq kajumissutsimikkut inuit hundredikkuutaat angerlarsimaffinnik Betel-inik, ataatsimeersuartarfinnik ataatsimiittarfinnillu sanaartornermi suleqataasimapput. Allallu amerlaqisut, immaqa misigisimasut sanaartornermi taamatut ikiuutaasinnaanatik, nunanut allanut Naalagaaffimmik oqaluussisartunik amigaateqarfiunerusunut nutsersimapput. Alloriarneq tamanna pinngikkallarnerani silatusaarnerussaaq Vagttårnip peqatigiiffiata immikkoortortaqarfianit siunnersorteqqaarnissaq. Aammattaaq nunamut allanut nuunniarneq piareersaqqissaartariaqarpoq, aamma ilisimalluareertariaqarluni nuuffissami oqaatsit, inuuniarneq aammalu suliffissarsisinnaaneq immaqa nammineq nunagisami pissutsinit allaaneroqisut. Nuunnissamilli eqqarsaatitit unitseqinagit arlaannik allannguingaatsiarnissat pissutigiinnarlugu. Amerlasuut Esajasitut ima oqarsimasut: „Tassaavunga! Aallartinnga,“ pisariaqartunik allannguisimapput tamatuminngalu Guutimit pilluaqqusaangaarsimallutik. — Naleqqiukkit ússatit 24:27; Lúkarse 14:28-30.
19 Aammalu suli allat — qatanngutit angutit arnallu aappaqanngitsut, aappariit, allaallu ilaqutariit tamakkerlutik — nunaminni illoqarfinnut allanut nuuttarput Naalagaaffimmik oqaluussisartussanik ilagiinnilu nakkutilliisussanik amigaateqarfiunerusunut. (apustilit suliait 16:9, 10) Taamaaliorneq arlaannik pilliuteqarnarsinnaasarpoq, soorlu allamik suliffittaartariaqalernermik, immaqa akilerluagaavallaanngitsumik. Ilaat oqaluussinermut piffissaqarnerulerumallutik soraarnerussuteqalersimapput suliunnaarnersiuteqalersimallutilluunniit, allallu ullup affaannaanut suliffissarsisimallutik. Ilaqutariit tamarmiusut assut nersornartarput oqaraangamik: ’Tassaavugut! Aallartitsigut.’ Esajasip ilaqutai taamaaliorput. Nulia pruffiititut Guutip piumasaanik sulilluartuusimavoq, tusarliussallu siulittuutaasut eqqarsaatigalugit erneri pingaaruteqarsimapput. — Isaia 7:3, 14-17; 8:3, 4.
20. Isaia 6:8 pillugu suna eqqarsaatigeqqissaartariaqarparput?
20 Pissutsit maannakkut atukkavit inuuninnik allannguinissannut pitsaalippatit, taava eqqarsaatigeqqissaartariaqarpat maannakkut killiffinni Esajasip piumassusiata sapinngisat tamaat ilaarniarnissaa. Guutip tusarliuteqqusaa uummaarissumik oqaluussissutigisaruk, silarlunnera inuillu soqutiginninnginnerat uniffiginagit; Esajas taamaaliortarsimavoq. Ilungersortumik allat „ajunngitsut pillugit tusagassamik nuannersumik“ oqaluttuuttakkit. Jehova aperisimavoq: „Kina aallartissavara?“ Esajasitut ersersiguk imatut akerusunnerit: „Tassaavunga! Aallartinnga“ — piumassuseqarlutillu aallarit tusarliuteqqusaa oqaluussissutigiartorlugu. (wD 15/10 87)
Apeqqutit uteqqitassat:
□ Pissutsit suut atuunneranni Esajas kapitali 6-imi allaaserineqarsimasumik takorruuitinneqarpa, suullu takuai?
□ Esajas sumut pisussaatinneqarpa?
□ Sooq Jesus Esajas annermik taaneqarsinnaava, ajoqersugaasalu suliassaq Esajasip suliarisimasaanut assingusoq qanoq suliaraat?
□ Esajasitut isumaqarnerput qanoq ililluta ersersissinnaavarput?
[Qupp. 11-mi assiliartaq]
Esajas ajortaajarneqarpoq oqaluussissallunilu aallartinneqarluni
[Qupp. 12-mi assiliartaq]
Amerlasuut oqarsimapput: „Tassaavunga! Aallartinnga“