Guutip innuttaasa akornanni tipaatsunneq

KUNNGI Davidip oqaasii, Tussiaat 68-imi, versini 3-5-imi allassimasut, piviusumik kiffaanngissutsimik nuannarisaqartunut tamanut kajungernartumik qaaqqusissuteqarput: „Guuti erinalersorfigisiuk, aqqa erinalersuutigisiuk, inoqajuitsukkut ingerlasup aqqutissaa iluarsarsiuk. [Jehova] tassaavoq aqqa, nuannaaritsi pillugu.“ Guutitta saani nuannaarnermit annerusumik immikkut pisinnaatitaaffeqarsinnaanerpa? (Isaia 12:2, 3) 1986-ip ingerlanerani Jehovap nalunaajaasuni tupinnartumik napatittuarsimavai, iperarneqarnissaq nunap inuinut nalunaarutigiuarmassuk.

Quppernerni tulliusuni Jehovap Nalunaajaasuisa 1986-imi silarsuarmi tamarmi suliaat pingaarnersiorlugit nalunaarutigineqassapput. Ila tipaatsunnassusii! Nalunaarutit naapertorlugit nunani 208-ni nalunaajaasoqarfiusuni Nalunaajaasut oqaluussisartuusut qaammammi ataatsimi amerlanerpaamik 3.229.022-nngorsimapput, tassa ukiup ingerlanerani 6,8 procentimik amerleriarsimaneq. Kuisittut 225.868-inik amerlassuseqarput.

Jesusip toquanik eqqaaniaaneq

Ukiumi ataatsimiinnerit pingaarnersaannut, Jesusip toqua eqqaaniarlugu nalliuttorsiornermut, najuuttut amerleriarsimapput minnerpaamik 8.160.597-inngorlutik, silarsuarmili pissutsit ajorsiartorsimanerat pissutigalugu nalunaarutit ilaat tiguneqanngitsoorput. Eqqaaniaalluni nalliuttorsiornermi assersuutinik ilangiisut amerlassusii appariarsimapput 8927-nngorsimallutik, tanitaasut utoqqaanerusut ilaasa nunami kiffartuussinertik naammassisimammassuk. — sarĸúmersitat 2:10.

Jesusip peqqussutaa maleruarlugu katersuutut ilarpassuisa maligassaalluartumik ersinngissuseq ersersippaat. (1 Korintumiut 11:23-26; Juánase 16:33) Afrikami nunat ilaanni Jehovap suliareqqusaanik suliffigeqqusaanngitsumi, ilagiit qatanngutip arnap illuani katersuupput eqqaaniaalluni nalliuttorsiorniarlutik. Oqalugiarneq aallartereersoq minuttit arfineq-pingasut qaangiummata illoqarfimmi pisortat takkupput qatanngutit tigusariniarlugit. Ataatsimiinnermik soraaqquaat. Qatanngutit inussiarnersumik aalajaatsumilli aalajangiuppaat Jesusip pilliutitut toquanik eqqaaniaaneq tamanna pinngitsooratik ataqqinartittariaqaritsik. Politiit tunngaveqartumik nassuiaatereerlugit kimigiiserfigalugillu, akuerineqarput politiit oqartussaasut tusaatillugit ataatsimiinnermik ingerlateqqinnissaanut. Ataatsimiinneq eqqissisimasumik naammassineqarpoq, taavalu tamarmik tigusarineqarput. Apersorneqareeramik ilaat tallimat tigusarisatut uninngatinneqarput. Parnaarussaagaluarsinnarlutik iperarneqarput, pilluaatigaalli Naalakkap unnukkorsiortitsinera nalliuttorsiutigisinnaasimagamikku! — 1 Juánase 5:3, 4.

Nigeriami, 128.461-inik Nalunaajaasoqarfiusumi, inuit 394.370-it eqqaaniaalluni nalliuttorsiornermut najuupput, aatsaat taama amerlatigalutik. Eqqaaniaalluni ataatsimiinnerit ilaat Beteleqarfissap nutaap Igiedumamiittup sananeqarfiani pisimavoq, inuillu 700-nit amerlanerusut — eqqaani nunaqarfeeqqami najugaqartut tamangajammik — najuupput!

Mexicominngaanniit nalunaarutigineqarpoq: „Nunatsinni sumut pigaluaruttaluunniit oqaluussisartut qiimmatsannermit nuannaangaarput, soorlulusooq nunap tamarmi sallusuissut ikuallaatigigaa. Qatanngutit sallusuissut tamaviaarutigaat, inuunerisalu sallusuissut ulikkaarutigaat. Ilaqutariit tamarmiullutik sallusuissut ilassivaat. Atuaqqissaartartut ilaat amerlangaatsiartut atuaqqissaartalernerminni ataatsimiinnernut najuuttalerput. Tamanna pissutigalugu siumukarasuarsinnaapput.“ Mexicomi inuit 833.467-it eqqaaniaalluni nalliuttorsiornermut najuupput. Augustimi nunami tassani naalagaaffimmik oqaluussissutiginnittartut 198.003-t Bibelimik atuaqqissaaqatigiinnerit 327.664-it inuit angerlarsimaffiini aquppaat. Amerleriaataasinnaasorujussuupput!

Silarsuarmi annertusisimanerit allat

Annertusisimanerit tamakkununnga assingusut nunat kristumiuunerartut najugarisaasa qitianninngaanniit nalunaarutigineqarput. Italiami augustimi oqaluussisartut aatsaat taama amerlatigilerput, 139.570-inik amerlassuseqalersimagamik, inuillu 301.009-t Naalakkap unnukkorsiortitsineranut najuupput. Jehovap Nalunaajaasuisa ilumut ’qaamasortik inunnut qaamatippaat’. Una assersuutigalugu: ’Qatanngut arnaq bussimi automatimut billetteerniarfimmut aningaasanik nakkaatitsimmat ilisarisimasaata oqarfigaa sivikitsuinnarmik busserniarmat akiliinissaa pisariaqarnavianngitsoq. Qatanngutip nassuiaappaa unittarfimmut tulliinnarmulluunniit ingerlassagaluaruni, akiliinissaq eqqortuliornerussasoq. Taama oqareerneragut ikinnugutaa bussimit niuvoq. Taava bussimik ingerlatsisup saaffigaa oqarlunilu: ’Illit Jehovap Nalunaajaasuisa ilagaatsit?’ ’Aap,’ qatanngut akivoq, ’soormi aperivit?’ ’Billettimik akiliineq pillugu oqaloqatigiinnersi tusaavara, nalunngilaralu inuppaalunnguit taamaaliortartut tamatigullu unneqqarissut Jehovap Nalunaajaasui ilagigaat.’ Qaammaterpaalunnguit tamatuma kingornatigut angutip taassuma qatanngut arnaq taanna ataatsimiinnermi ornippaa oqarlunilu: ’Ilisarivinga? Uangaana bussimik ingerlatsisoq billettimik akiliinermik eqqartuisoq. Qanoq iliornerit malugigakku aalajangerpunga Jehovap Nalunaajaasui Bibelimik atuaqqissaaqatigilerumallugit.’“

Tuluit Nunaanni naalagaaffimmik oqaluussissutiginnittut qaammammi ataatsimi amerlanerpaamik 107.767-iupput, taakkualu ilagaat qatanngut angut kuiseqqammersoq una: „George maanna 84-inik ukioqarpoq. Ilagiinni nalinginnarni attavigigaluamini ukiut 50-it palasi sinnerlugu oqaluussisartuusimalluni, sallusuissut ilisarilerpaa. Siullermik, angerlarsimaffimmini Bibelimik atuaqqissaareeraangami, inimut allamukarasuartaraluarpoq sikkaritsimik pujortariartorluni. Ukiut 70-it pujortartuusimagaluarpoq. Kisiannili atuakkami pâratîsime nuname nâgssáungitsumik inûsínauvutit-mi kapitali 26 atuareeramiuk pujortaqqissimanngisaannarpoq. Ukioq ataaseq sinnilaarlugu qaangiuttoq George kuisippoq inuillu tamaasa ornillugit oqaluussisarnermi aallussilluarluni, inuit allat oqaluttuullugit pilluaqqussutissanik Jehovap pissutsinik aaqqissuussinissamini nutaassami eqqukkumaagassaanik.“

Tyskit Killiit Naalagaaffiini Peqatigiinni oqaluussisartut 118.645-t aatssat taama amerlatigilerput. Aammattaaq Tyskit Kangilliit Naalagaaffianni Nalunaajaasut ilumoortut qulinik tuusintillit ’qaamasortik qaamatippaat’. Aamma Tysklandimi utoqqaat ilumoortut ’pana anersaap pia’ sapangikkumanngilaat. (Evfisumiut 6:16, 17) Ilagiit ilaat nalunaarput: „Qatannguteqarpugut arnamik 103-nik ukiulimmik suli kisimi illuminiittumik. Utoqqaanertat aaqqissuuppaat qatanngutit arnat arfineq-marluk arfineq-pingasulluunniit sinnerseraallutik sapaatit akunneri tamaasa taassuminnga paarsinissaat. Ukiuni pingasuni sisamaniluunniit taamaaliortuarput. Ikiuisartut, kommunip tungaaninngaanniit akissarsiaqartartut, uffariartortarpaat allanillu atisisikkiartortarlugu. Taakkuli napparsimagaangata ferieqarlutilluunniit qatanngutitta kingoraartarpaat. Kristumiut asanninnerannut allallu ikiorniarlugit imminut tunulliunnerannut malunnaat tamanna ilagiissimik avataanniittunut nalunaajaataalluarpoq. Qatannguterput arnaq 103-nik ukiulik ilorlikkut piginnaassutsiminik suli atuilluarsinnaavoq ikiuisartullu ’oqaluussiffigisartakkamisut’ isigalugit. Uffartilluni aallussilluarluni oqaluussiffigisarpai atuakkianillu tunisarlugit.“ Ilumoorpoq ’qiit niaqorussuusut usornaatit, iluarnermut aqqutaasukkut pigiligaasut’. — ússatit 16:31.

Inuilli qassinilluunniit ukiullit — „nukappiaqqat niviarsiaqqallu, utoqqaat inuusuttullu“ — qaaqquneqarput Jehova unnersiutigiartoqqullugu. Inuusuttorpassuit ’Pinngortitsisertik eqqaaniarpaat inuusutsillutik’. (Tussiaat 148:12; akugdlîssup oĸausê 12:1) Brasiliami, nersornangaartumik amerlanerpaanik 196.948-nik oqaluussisartoqarfiusumi, Vagttårnip peqatigiiffia allagarsivoq illoqarfimmit avinngarusimasumit qatanngutit angutit inuusuttut marluk qaammatit arlallit nalunaajaafigisimasaannit. Allakkat ilaatigut uku oqaasertaraat: „Nersualaarumavassi uppeqatigiissortassinni inuusuttortasi pillugit. Uanga ilinniartitsisuuvunga inuusuttunillu sammisaqarsimallunga, nalunngilaralu qanganit allaasorujussuusut. Ilissi inuusuttortasi maligassaalluarput. Utoqqaanerusortatik ataqqisarpaat, kusanartumik pissuseqarniartuupput tulluartumillu atisaqartarlutik. Bibelimillu ilisimassusii! Upperisarsiorneq tassa aatsaat! Ajoraluarpoq illoqarfitsinnit aallartariaqarmata.“ Qatanngutivut ilaqutariiusut illoqarfiit avinngarusimasut taakkua ilaannut nuulerput tassani najugaqavinniarlutik soqutiginnittut isumaginiarlugit.

Nunani kristumiutut upperisaliunngitsut najugarisaanni sallusuissut qanoq siuariartorpa? The Wall Street Journal-imi 9. juli 1986-imi saqqummersumi „Nuna naggorluttoq — ajoqersuiartortitat kristumiut Japanimi siaruarteripput inerititakillutilli“ qulequtaralugu takkajaamik ilanngutassiaqarpoq. Ajoqersuiartortitaq United Church of Christ-imeersoq oqarsimanerarneqarpoq: „Japanimi kristumiussuseq sorlaniffissaqanngivippoq,“ palasilu Franciskaneriusoq oqarsimanerarneqarpoq: „Ajoqersuiartortitat nunanit allaneersut Japanimi atorfissaqartinneerupput.“ Tamarmik marluk ukiut 30-t sinnerlugit suligaluarlutik angiluttorput. Ilanngutassiami allassimavoq: „Nunap inuisa ilaat procentimit ataatsimilluunniit ikinnerusut kristumiuupput, ajoqersuiartortitallu sulerulukkaluartut amerlassusiisa procentiat appariartuinnarpoq.“ Kristumiuunerartut uppeqatigiissortaasa naammassisimasaat taakkuinnaapput! Jehovap Nalunaajaasuimi, nunami tassani kristumiussutsimik minguitsumik ajoqersuutiginnittut? Qaammatini qaangiuttuni 92-ini tulleriiginnartuni oqaluussisartortaat amerliartuinnarput, amerlanerpaamik 113.062-inngorlutik (taakkualu ilagaat allamik atorfeqaratik oqaluussisartut „pioneriusut„ qaammatit tamaasa agguaqatigiissillugit 43.390-iusut). Taakkua peqatigiillutik angerlarsimaffinni Bibelimik atuaqqissaaqatigiinnerit 146.316-it soqutiginnittunngorlaani aquttarpaat. Qularnanngitsumik tamanna siunissami amerleriataarnissaannut ilimanaataavoq. Isaia 65:13, 14-imi allassimasup eqquunnera Japanimi timitaligaavoq.

Pionerit suliaat

USA-mi — suliarsuit taakkua tamarmik qitiat? Tassani qaammammi ataatsimi amerlanerpaamik naalagaaffimmik oqaluussissutiginnittut 744.919-inik amerlassuseqarput. Kisianni ’nunavimminni ajoqersuiartortitat’ taakku atorfissaqartitaalluarpat? Ilaana, pinerluttuliornerit, ikiaroornartutornerit, kanngunartuliornerit, nappaatit peqquserluttuliortarnerillu nunani Guutimik nalusunik taaneqaraluartut najugarisaanni pisarnermit tassani sakkortunerungaartumik amerleriataarmata. Inuit pissutsinik pitsaanerusunik eriniginnittut tuppallertariaqarput neriuutissinneqartariaqarlutillu, Jehovap Nalunaajaasuilu tusarliussaqarput taakkua atorfissaqartitaannik. (Isaia 61:1, 2; Matîuse 24:14) 1986-imi USA-mi oqaluussisartut taakkua nalunaaquttap akunneri 146.673.490-it atorpaat tusagassamik nuannersumik nalunaarutiginninnerminni. Tassaavoq siornaniit 12,6 procentimik qaffariarsimaneq, imaluunniit akunnerit 16.449.229-t amerlanerusut. Piffik tamanna atorneqarluarpoq, atuakkat 6.138.938-t agguarneqarmata, tassa siornaniit 23,2 procentimik qaffariarsimaneq. Apriliinnarmi atuakkat eqqissinissamut isumannaallisaanissamullu neriuutissamik piviusumik nassuiaatitallit 1.000.000-init amerlanerusut agguarneqarput.

USA-mit nalunaarutigineqartut pissanganarnerusut pionerit kiffartuussinerata annertusisimanera ilagaat. Augustimi pionerit nalinginnaasut amerlanerpaamik 45.786-inngorsimapput, tassa siornaniit 23 procentimik qaffariarsimaneq. Kisitsisit taakku pionerit ikiortaasut 43.369-inik amerlassusiannut pionerillu atorfinitsitat qaammatit tamaasa agguaqatigiissillugit 279-inik amerlassusiannut ilanngunneqarpata, paasinarsissaaq qaammatit tamaasa 90.000-init amerlanerusut pioneriullutik Guutip naalagaaffianik oqaluutiginnittuusut. Taakkua ilarpassui inuusuttuupput Jehovamik unnersiutiginnillutik piffissaminnik atorluaasut. Aammattaaq utoqqaanerusut pioneriullutik suliaqarput.

Qatanngut arnaq 88-inik ukiulik, qaammatit tamaasa pioneriusartoq ikiortaasoq, atuagassiamik tunniussiffigisimasaminut pulaaqqikkami, paasilerpaa inuusuttut katissimanatik inooqatigiissut. Atuakkani Lad os ræsonnere ud fra Skrifterne atorlugu aappariinnerup pingaaruteqarneranik oqaluttuuppai. Allassimaffiit arnap atuffassissutigisai killissutigingaaramikkik aappariinnertik inatsisinut naapertuuttunngortikkiartorasuarpaat, maannalu Bibeli atuaqqissaartarlugu.

Peqqissaartumik nalunaajaaneq

Inuit tutsaanni illumillu illumut angalaarluni ajoqersuinermini, apustilip Paulusip tusagassaq nuannersoq ’peqqissaartumik nalunaajaassutigaa’. (apustilit suliait 20:20, 21, NW) Ullumikkut nunat ilarpassuini tamatumunnga assingusumik nalunaajaatiginninneqarpoq. Soorlu Guadeloupeminngaanniit nalunaarutigineqartoq: „Ukiup oqaluussiffiup naalernerani nunap matuma inui 72-iuppata ataatsimik oqaluussisartoqarpoq. Pisariaqanngikkaluarpoq oqassalluni nunatsinni tamarmi Nalunaajaasut ilisimaneqarluartuusugut! Imaakkami, illoqarfiit ilarpassuini sapaatit akunneri tamaasa illunut taakkuusunut aggertarpugut oqaluussiartorluta. Isumaqartoqarsinnaagaluarpoq pulaartaqattaarnivut inuit qatsussimassagaat, imaluunniit oqaluussisartut sapaatit akunneri tamaasa illunut taakkuusunut pulaartaqattaarnertik nikalluutigisimassagaat. Akerlianilli, illut taakkuusut akulikinnerusumik ornittaratsigik, amerlanerusunik soqutiginnilersitsisarpugut. Suulli tamatumunnga takussutaappat? Aprilimi oqaluussisartortatta 4558-iusut angerlarsimaffimmi Bibelimik atuaqqissaaqatigiinnerit 7136-t aquttarpaat! Ungasinngitsukkut aviisi qulequtaqarpoq oqaasertalimmik: ’Jehovap Nalunaajaasui — illumit illumut angalaartutut kunngiusut’! Oqaatsit taakku ataqqinaataatippavut. Ukiup oqaluussiffiup ingerlanerani qatanngutinngorlaat angutit arnallu 458-it kuisipput.“ Oqaluussiffigisartakkatsinnut aalajaatsumik nuannaarlutalu orniguttaqattaartuarutta, inuit ilisariniarutsigik ikinngutiginiarlugillu, paqumigisaqarneri asannittumik taamaatinniartarutsigik, taava inuppassuit savatut ittut nassaarisinnaassavavut.

Jehovap kiffani nunat Afrikamiittut ilaanni oqaluussiffigeqqusaanngitsumi nunallu inui imminnut sorsuuttoqarfiusumi najugaqartut pilluaqqungaarpai. Nunami tassani qatanngutitta ilarpassui parnaarussivinni naalliupput, Nalunaajaasullu inuusuttut ilaat toqunneqarput. Aprilimili malunnangaartumik nalunaaruteqarpoq, nalunaarutigineqartut qulit aatsaat taama amerlatigilersimammata. Oqaluussisartut amerlassusii siorna amerlassuserigaluannut naleqqiullugu 29 procentimik qaffariarsimapput. Qatanngutitta asanartut ila aallussilluarsimassusii! Aprilimi oqaluussisartut agguaqatigiissillugit nalunaaquttap akunneri 18-init amerlanerusut oqaluussinermi atorsimavaat, angerlarsimaffimmilu Bibelimik atuaqqissaaqatigiinnerit 2,6-it aqullugit.

Tusarliussaq paasiuminaallisagaq immikkoortoqarfimmit nunami tassani oqaluussinermik nakkutilliisoqarfiusumit tigusaq pissutsinik tassani atuuttunik naammattumik paasisitsisinnaavoq. Allassimavoq: „Kiannerup tuffigiuaannarpaatigut. Angalaarneq inunnillu naapitsiniarneq taama ilungersornartigimmata nalunanngilaq kiannersuaq nalliusimaalersimasoq. Nalunngilarpulli immikkut pinngortitaagatta sumilluunniit kiammut sumilluunniillu avatangiisoqarnermut allanngortarsinnaalluta. Qanoq pisoqaraluarpalluunniit aalajaappugut, aniguissallutalu isumalluarpugut.“ Ila assuarnaassusiat!

Assuarnaassutsiminnik aalajangiussisut ataasiakkaat peqatigiillutik peqatigiiffinngorput assuarnaassutsimik aalajangiussisut. Jehovap Nalunaajaasuisa silarsuaq tamakkerlugu peqatigiiffiat ilumut taamaappoq! Qilanaaraat ’annikilliornissami angisuumi’ nalliuttussami amiakkuullutik inuunissartik Kristusillu naalagaaffiata ataani nunamik paratiisinngortitsinissamut nuanningaartussamut suleqataanissartik. (sarĸúmersitat 7:14; 21:3, 4; Isaia 65:17, 21-23, 25) Assut nuannaarput Jehovap aallussilluarlutik sulinerat maannakkut allaat pilluaqqummagu, ’atoruminartuni’ ’atoruminaatsuniluunniit’ oqaaseq oqaluussissutigigamikku. (2 Timûtiuse 4:2, NW) Nalunaarutigineqartunit paasineqarsinnaavoq allassimaffik 1986-imi eqqarsaatigisimasartik maleruarsimagaat: „Guutip naalagaaffia tamani oqaatigiartoruk.“ — Lúkarse 9:60, NW. (wD 1/1 87)

[Qupp. 7-mi ungalusaq/assiliartaq]

Jehovap Nalunaajaasuisa silarsuarmi tamarmi sulinerannik nalunaarusiami nalunaarutigineqartut ilaat

Amerleriarsimaneq:

Oqaluussisartut amerlanersaat: 3.229.022 6,8%

Akunnerit oqaluussinermi atorneqartut katillugit: 680.837.042 15,3%

Bibelimik atuaqqissaaqatigiinnerit qaammatit tamaasa agguaqatigiissillugit: 2.726.252 14,6%

1986-imi kuisittut katillugit: 225.868 19%

[Qupp. 10-13-mi nalunaarsugaq]

UKIUMI OQALUUSSIFFIUSUMI 1986-IMI JEHOVAP NALUNAAJAASUISA SILARSUARMI TAMARMI SULINERANNIK NALUNAARUSIAQ

(Allassimasut qanoq inissisimanersut naqitami takuneqarsinnaavoq)

[Qupp. 8, 9-mi assiliartat]

’INUIT TUTSAANNI ILLUMILLU ILLUMUT ANGALAARLUNI’ NALUNAAJAANEQ ’NUNAP ISUA TIKILLUGU’

Davao City Filippinerit

Venedig Italia

Castle Combe, England

Gålå Norge

Kowloon Hong Kong

Hualien Rural Taiwan

Queenstown New Zealand

Bolgatanga Ghana

Paris Frankrig

Quetzaltenango Guatemala

Kerala India

Banff Alberta Canada