Iperarneqarnissaq torlulaatigisiuk!
NUNAP inuisa fem milliardissaat julip arfineq-aappaanigooq, 1986-imi, inunngorsimavoq. Nunap inuisa fem milliardissaata taassuma, tassami inuiaat tamarmik, pissutsit qanoq ittut atugassarinerpaat? Inuiaat milliardillit qaquguluunniit piviusumik iperarneqarnissaat imaluunniit kiffaanngissuseqarnissaat ilimanarpa? Qularnata oqarpugut: Aap. Kisiannili „iperarneqarsimaneq“ qanoq paasisariaqarpa? Tassa imaappa iperarneqarsimallutik kiffaanngissuseqartut qanorluunniit piumagaluarunik iliorsinnaatitaassasut? Naagga, imaapporli soorlu atuakkiortoq tuluk ukiut 1900-ssaanni inuusimasoq Charles Kingsley allassimasoq: „kiffaanngissutsit assigiinngitsut marluupput, eqqunngitsoq pigalugu piumasaminik iliornissaminut kiffaanngissuseqartoq, eqqortorlu pigalugu pisussaaffimminik iliornissaminut kiffaanngissuseqartoq“.
Inuit eqqortumik kiffaanngissuseq angussavaat aatsaalli ’pisussaaffimminnik’ iliorunik. Inuillu qanoq iliortussaappat? Jesus nunamiikkallarami paasiuminartumik oqarsimavoq inassutit pingaartut marluusut — siulleq Guuti asassagipput uummatikkut, tarnikkut isumakkullu iluunngarluta nukivullu tamakkerlugit, aappaalu, tullerput immitsitut asassagipput. (Mákorse 12:29-31) Asanninnermik piviusumik — Guutimik asanninnermik inoqatiminnillu asanninnermik — ilumoorlutik nittaasut kisimik kiffaanngissuseq piviusoq piumaarpaat. — Juánase 8:31, 32.
Ullumikkut silarsuarmiut asanninnermik taama ittumik nittaappat? Ajoraluartumik naagga. Asanninneqanngikkaanni kiffaanngissuseq atuuttoq piviusuussanngilaq. Kiffaanngissutsip tamatuma namminissarsiornermik allamullu atajumannginnermik salliutitsineq kingunipilugisarpaa. Taama ittumik kiffaanngissusillit ’piumasaannarminnik iliornissartik’ aalajangiuttarpaat, Guuti inoqatitillu soqutiginagit. Isummap pingaarnerutinneqartup tamatuma inuit ataasiakkaat piinnarnagit aammattaarli innuttaaqatigiit, naggueqatigiit inuiaqatigiillu sunnerpai. Namminiinnarsiorneq atuukkallartillugu nunami kiffaanngissutsip suulluunniit, eqqissinerup suulluunniit, pilluarnerup suulluunniit tunngaviat patajasuussaaq. Eqqaamaniaruk Jesus oqarsimammat: ’Tullit ilittut asassavat.’ Piviusumik kiffaanngissuseqartoqassappat tullimut asanninneq pisariaqarluinnarpoq.
Naalagaaffiit Peqatigiit aaqqissorneqarsimapput inuiaat kiffaanngissuseqarnissaat anguniarlugu, sorsunneq atugarliortitsisoq taarserniarlugu ’eqqissinissaq isumannaassusissarlu’ pilersikkumallugit. Ukiut 40-nngortorsiorneranni FN-ip nalunaarutigaa 1986 tassaassasoq naalagaaffiit tamalaat eqqisseqatigiinniarnissaata ukiua. Tassaasimavali kiffaanngissuseqarneq, eqqissinerup atuutilerumaarnissaanut qularnaveeqqutaasoq? Sakkussiornermut aningaasartuutit kakkaqisut (ukiumut 8 billionit kronit amerlassuseqalereersimasut) killilerneqarsimappat? Peqqarniisaarniarnerit biilinillu qaartunik usilinnik qaartitsisarnerit ikilisimappat? Irlandimi avannarlermi, Kangiami qiterlermi Kangianilu toqoraannerit upperisarsiornermut tunngasut sakkukillisimappat? Upperisarsiornerup tungaatigut pisortat naalakkersuinermik ingerlatsinermut akuliutilereersimapput eqqissiniarnissarlu assut oqallisigalugu. Piviusumilli kiffaanngissuseqarneq eqqissineqarnerlu tassaaginnanngillat eqqissinermik sorsunneqannginnermillu oqallinnerit.
Ullumikkut inooqatigiissoqarpa silarsuarmiut nakuuserluni namminiinnarsiorlunilu ileqquinik soraarussisimasunik? Aap, ilaana! ’Eqqissinermut Naalakkap’ siulittuutigisap, Jesus Kristusip, taakku katersorsimavai ’naggueqatigiinnit, oqaasilinnit, inuiaasunit inuiaqatigiinnillu tamaneersut’ immikkoortillugit. (Isaia 2:3, 4; 9:6, 7; sarĸúmersitat 5:9; 7:9) Nuannaarput Guutip Kristusikkut naalagaaffiata ungasinngitsukkut ajussuseq tamaat taamaatitissammagu nunarsuarlu tamakkerlugu paratiisi eqqissisimaarfiusoq, piviusumik kiffaanngissuseqarfiusoq, pilersikkumaarlugu. Inooqatigiit taakku taaguuteqarput Jehovap Nalunaajaasuinik. (Dâniale 2:31-35, 44; Isaia 65:17-25; 43:10, 12) Itsarsuaq Israelimi Tipaatsungaarfimmik aaqqissuussaanermut illua-tungiliuttuusoq kristumiut taakkua peqatigiillutik tipaatsullutik nalunaarutigaat. Silarsuarmi tamarmi nunani 200-nit amerlanerusuni nuannaarlutik Guutip peqqussutaa una naalappaat: ’Iperarneqarfissaq nunami torlulaatigisiuk tamanut tassani nunaqartunut.’ (3 Môrsase 25:10) Torlulaat tipaatsunnartoq tamanna tusaaviuk maleruarlugulu? (wD 1/1 87)