Illit Annaassisup tumai atuarpigit?
INUK alla ilaarlugu nersualaarineruvoq annerpaaq. Meeqqat angajoqqaatik ilaarajuppaat. Inuusuttuaqqat aliikkusersuisartut tamanit nuannarineqartut ileqqui malinniartarpaat, inersimasullu niuertorsuit politikerillu nuimanerusut assiginiartarpaat. Inuilli qanoq amerlatigisut silamiut oqaluttuarisaaneranni siulersuisuusimasut annersaat — Jesus Kristus — malinniarpaat?
Gallupikkut ungasinngitsukkut misissuisitsinerisa ilaannit una paasineqalersimavoq: „Amerikamiut quliugaangamik arfineq-pingasut oqarput Jesus ilaatigulluunniit malinniaritsik.“ Aperineqartut „tolv procentiinnaat oqarput sapinngisamik malinniaritsik“.
Sunali pissutigalugu Jesus inunnit kimitsisinnaalluartunit allanit malinniartariaqarnerua? Pissutiginerullugu, soorlu The World Book Encyclopedia-mi allassimasoq, Jesus Kristus „inuusimasunit allanit tamanit inuiannut sunniuteqangaarnerusimammat“. Inunnilli sunniuteqangaartunit allanit allaalluni, sakkutoorpassuarnut siulersortaalluni pinngitsaaliinikkut allamik isumataartitsiartorneq ajorpoq. Ussassaarutit akisungaartut annertoqqutigineq ajorpai, soorlu ullumikkut iivangkiiliulersaartut tusaamasaalluartut annertoqqutigisaraat. Aamma politikkikkut partiit arlaannaalluunniit tapersersorneq ajorpai. Sunniuteqarnerata pissutigiinnarpaa oqariartuutaata kimeqassusia oqariartuutiminillu saqqummiusseriaasia. — Matîuse 7:28, 29; Juánase 7:46.
Jesusip inuit killittarpai inuunerminni anersaakkut ileqqussatiguttaaq annertuumik allannguuteqartillugit. Allamik kimitsisinnaalluartumik inoqarsimanerpa inunnik taama amerlatigisunik iluaqutissaannut sunniuteqarfiginnissinnaasimasumik? Aamma inunni siulersuisuusuni allanik inoqarsimanerpa imatut allaaserineqarsinnaasimasumik: ’Illernartoq ajortuitsoq minguitsoq, ajortilinnit immikkoortitaasoq’? (Eprîarit 7:26) Jesus amigaateqanngivissumik maligassaavoq — nunami inuusimasunit allanit tamavinnit allaalluni!
’Qanorli ililluni inuup sanngiitsup naammalluinnanngitsullu taama maligassaalluartigisoq malinniarsinnaassavaa?’ aperiumasoqarsinnaassaaq. Histooriamik ilisimatooq H. G. Wells atuakkiamini Menneskeslægtens Historie-mi oqarpoq aallaqqaataanilli inuit Kristus malinniarusukkajunngikkaat. „Kristus malinniartariaqartutut isigissallugu,“ Wells oqarpoq, „tassaavoq inooriaaseq takornartaq annilaanganartorlu aallartissallugu, ileqqut soraarutissallugit, misigissutsit eqqarsaatigeqqaagaanngitsumik iliortitsisartut isumassissutillu naqisimaniassallugit, pilluarnissaq uppernanngitsuusaartoq anguniassallugu.“ Naggasiilluni Wells oqarpoq: „Tupinnanngilarmi ulloq manna tikillugu Galilæamioq taanna [Kristus] uummatitta inikitsuusut inissaqartinngimmassuk.“
Tamannali ilumoorpa? Miserratigineqarsinnaanngikkaluarpoq Kristus naammalluinnartumik malinniarneq ajornassaqisoq. Aappaatigulli apustili Peter oqarsimavoq Kristusip ’maligassaqartikkaatigut tumini peqqissaartumik atuaqqullugit’. (1 Pîtruse 2:21, NW) Oqanngilaq naammalluinnartumik malinniassagipput, kisianni „peqqissaartumik“. Jesusip qanoq ittumik maligassaqartippaatigut? Qanoq ililluta malinniarsinnaavarput? (wD 1/9 86)