Jesusip inuunera ajoqersuineralu

Naartusoq – katissimananili

MARIA qaammatit pingajussaanni naartuvoq. Eqqaamajunnarsivat naartunermi affaata siulliani Elisabetimut pulaarnera. Kisianni massakkut najugaqarfimminut, Nazaretimut, utersimavoq, qanorlu pisimanera illoqarfimmi ilisimaneqaleriissaaq. Soorunami tamanna Mariamut ilungersunanngitsuunngilaq.

Ilungersunartualu aajuna Maria Josefilu, sanasoq, aappassiariimmata. Mariap nalunngilaa Guutip Israelikkunnut inatsisai naapertorlugit arnat aappassiaqartut angummik allamik pinngitsaalisaanatik atoqateqarsimagunik ujaqqanik milloorneqarlutik toqunneqartartut. Qanoq-ililluniuna naartunini Josefimut nassuiarniassavaa?

Maria qaammatini pingasuni peqannginnikuummat takunissaa Josefip qilanaarutigeqaa. Naapikkamik Mariap nutaarsiassamik qajassuartumik oqaluttuussimassavaa. Qularnanngitsumik sapinngisani tamaat Guutip anersaavata iluartup ikiuineratigut naartulersimanini nassuiarniarsimassavaa. Kisianni takorloorsinnaassagunarpat tamanna Josefip paasiuminaatsittorujussuugaa.

Josefip nalunngilaa Maria ajunngitsumik oqaatigineqartartoq, malunnarporlu Josefip Maria nuannarisorujussuugaa. Nassuiaanerali iluaqutaanngilaq, ilimagilluinnarpaalu angummik allamik naartulersimassasoq. Taamaakkaluartorli Josefip kissaatiginngilaa ujaqqanik milloorneqarluni toqutaanissaa imaluunniit tamanit narrunarsagaanissaa. Taamaattumillu aalajangerpoq oqarnani avinniarlugu. Taamanikkut aappassiariinneq aappariinnertut unioqqutinneqassanngitsuutinneqarami. Aappassiariilerneq kipitinniaraanni avittutut pisariaqarpoq.

Kingornagut, tamanna Josefip eqqarsaatigitillugu, sinilerpoq. Jehovallu inngilia sinnattuagut takutippoq oqarfigalugulu Mariap nuliartaarinissaa annilaanngatigisariaqanngikkaa, ’ilumiua anersaakkut iluartukkut pimmat’. Inngililu nangippoq: „Ernertaarumaarporlu, taanna Jesusimik atsissavat; innuttani ajortaannit annaatissavai.“

Josef iterami qujamasuttorujussuuvoq. Inngilip oqarnerasut iliorasuarpoq Marialu angerlaallugu. Tamanna pisimasoq katititsineruvoƙ tamanut takussutissaalluni maannamiit Maria Josefilu katissimasutut isigineqarsinnaalersut. Taamaakkaluartorli Jesus inuutinnagu atoqatigiissinnaanngikkallarput.

Takoriarulli! Maria meerartaangajalerpoq, Josefillu siutituumut ingitippaa. Sumunnalersunuku? Soorlu angalanialerpat uffa Maria erningajaleraluartoq? Lukas 1:39-41, 56; Mattæus 1:18-25; 5 Môrsase 22:23, 24.

◆ Mariap naartunera tusaramiuk Josef qanoq isumaliorpa, soorlu?

◆ Qanoq ililluni Josefip Maria avissinnaavaa naak suli katinneqanngikkaluarlutik?

◆ Pisimasoq suna Josefip Mariallu katititaanerannik ersersitsiva? (wD 15/5 85)