Harmagedon sôk taima okatdlisiginekartigâ?

„HARMAGEDON“ — ateĸ táuna bîbilimêrsoĸ ĸanoĸ isumaĸarpa? Napassuliaĸ Alapernaerssuivfik januarime februarimilo 1986-ime sarĸúmersut erssiutauvdluartumik ĸúperneĸartut sujugdliussumik ilángutagssiaĸartásáput tamatumínga pâsíssutigssaussunik. neriungnarpoĸ agdlauserissat bîbilerpalugtut tamáko tugpatdlersautigísagitit, ilisimatíneĸásagavit HARMAGEDON sunarpiaussoĸ.

„tastamantitorĸame pruvfîtit íssuartarpáka nalunaerĸutitdlo Harmagedonimut sujuligtûtaussut isumaliutigalugit, erĸarsautigilerdlugulo kinguârît uvagut tamáko tamaisa angumerísanerivut.“ — Ronald W. Reagan, USA-me præsidente, 18. oktober 1983.

„sût tamarmik naggatigssât tássáinaujungnaerpoĸ bîbilime oĸalugtuaĸ, ilumôrdluínartumigdle piviussúngorsínaulersimavdlune. inuiait oĸalugtuarissauneráne aitsât mãnákut ajunârnerssûp ánangnigssavdlo akornánîlerpugut ameĸissume navianaĸissumilo.“ Javier Pérez de Cuéllar, FN-ime generalsekretære, 8. juni 1982.

„HARMAGEDON“ silarssuarme tamarme oĸatdlisigineĸalersimavoĸ. oĸauseĸ erĸanarsautaussoĸ táuna ilagîngne kivfartûtigdlit, politikerit, nâlagkersuissut, sákutût nâlagarssuisa, ilisimatût agdlâtdlo aningaussarsiornermik ilisimatût atorajungneruvât. USA-ínarme atuagkat amerdlanerúngíkunik 15-it 1983-ime pisiarineĸarsínaussut taigûtaisa oĸauseĸ Harmagedon ilagât. atuagkat avdlarpagssuit, ilait milliûnilíngordlugit tunineĸarsimassut, táuna imarât.

tupingnarsínauvoĸ oĸauseĸ táuna tássángáinaĸ oĸatdlisigineĸartorujugssuángorsimangmat. oĸauseĸ táuna agdlangneĸarĸârpoĸ bîbilime — atausiáinardlunilo pineĸardlune. (sarĸúmersitat 16:16) kisiánile palasit kisimik oĸauseĸ táuna atortaríngilât. ukiune 1800-kúne oĸauseĸ Harmagedon bîbilimut túngassũngitsumik atorneĸartalerpoĸ. 1900-kúnile aitsât oĸauseĸ „Harmagedon“ isumaĸartíneĸalerpoĸ „toĸoráunerssuaĸ sunalũnît“ imalũnît „akiũnerssuaĸ inârutaussoĸ“.

taimanernîtdle atorfileĸatigît iluáne ássigĩngitsune oĸauseĸ Harmagedon akulikínerujartortumik atortalerpât, tamarmik ingmíkut ássigĩngilârtumik isumaĸartitdlugo. Theodore Rooseveltip, 1912-ime USA-me præsidentiujuarnigssaminut ĸinigagssángortitdlune ĸinerĸusârnermine oĸauseĸ táuna politikilerinermut isumaĸartíniarpâ. pingâkujugdlune oĸarpoĸ: „ersisuitsumik ũmateĸardluta nákutigingnigdluardlutalo Harmagedon atugagssarârput Nâlagardlo sivnerdlugo sorssugdluta.“ Roosevelt ĸinigagssángorterĸingniarnermine ajorssarpoĸ.

uvdlumíkut silarssuarmiut tamarmik ánilângagamik Harmagedon oĸatdlisigât, sôrdlo uko ánilângássutigalugit: atomip nukinga atordlugo silarssûp aserorneĸaratarsínaunera, sákugssiat amîlârnartorssuit táukua ĸârtíneĸarnerat píssutigalugo nunarssuaĸ tamákerdlugo sivisûmik ukiûnigssâ, kangiane ĸiterdlerme sorssungnerssuaĸ, imalũnît silarssûp aningaussarsiorníkut túngaviata ajornartôrnigssâ. taimáitumik oĸauseĸ Harmagedon uvdlumíkut ilimagineĸángíkaluartúkut tutsiútarpoĸ:

◆ japanimiut filmiliãne issigingnâgagssiame titartagaussume sivisûme „Kichijojime Harmagedon“-imik taigûtilingme takugssáuput filmip inugtai titartagaussut ajúngíssusermut ajússusermutdlo ássersûtaussut ardlamik ajorssardluínarnigssãnut akiũtut.

◆ Halleyip uvdloriâ pamiulik 1986-ime tákuterĸísangatínarmat Frankfurter Neue Presse-me agdlagsimavoĸ inuit ugpiassut „Harmagedonimut ilimasârutitut isumaĸartitdluarsínáusagât“.

tamákuale ardláinâtdlũnît tássáungilaĸ Harmagedon erĸortoĸ. uvdlumíkut nipe avdla tutsiútarpoĸ Harmagedon tusardliutdlugo — nipigtoriartuínardlune inuit milliûnit mardluk agfardlo sivnerdlugit tusardliússãnik. ivdlit tusâviuk? nipe táuna tusarnârugko ilíniáinásángilat Harmagedon sunáungínersoĸ, ãmátaordle — pingârnerussumigdlo — ilíniásavat Harmagedon sunarpiaussoĸ. (wD 1/1 85)