Josua ikiortigiuk Jehovamik sapîtsumik kivfartũssiniarningne!
„SILARSSUARME nâgdliúsause; tugpatdleritsile [tatitusâritsile, NW], silarssuarmut ajugaugama.“ angutip Jesusimik atigdlup tamáko oĸauserigai ímaĸa ilisarâtit. eprîarisutdle oĸalugtûgaluaruvit, ateĸ Josua erĸailísagaluarpat, aterme eprîarisôĸ Josua grîkerisôrdlugo tássauvoĸ Jesus. — Juánase 16:33.
tamatumúngalo nalerĸútumik bîbilip atuagartâne Jesusip sujuaissaisa ilâta, Josuap Nunip ernerata, agdlagâne agdlauserissat pingârnerssaisa tatitusârneĸ ilagât. ĸanordle uvagut nangmineĸ Jôrsuap agdlagai iluaĸutigisínauvavut? tatitusârneĸ autdlarĸautigeriartigo.
angut sapîtsoĸ
Mosesip inûnerata nâlernerane Jehovap táussumúnga Josua, pilerdlâjúngivigsoĸ misiligtagaĸángitsûnanilo, kingorârtigssángortípâ. Josuap Ægyptenime inugsiauneĸ inúngûserâ, tássángale aninerata kingornagut sapîtsumik sujulerssuissûvdlune takutitsivoĸ Amalekíkut píssuteĸángitsumik sãssússinerat tunuartitdlugo. (2 Môrsase 17:8-16) Josuap sapĩssutse ugperninilo aulajangiúpai Kana’anip nunâ alapernaerssoriartorĸuvdlugo autdlartitat arĸaneĸ mardlûssut ilagingmáne, Kalebilo mardluínauvdlutik ersisuitsumik nalunaeruteĸaramik Jehova ikiortigalugo kana’animiut inûnerdlugtut ajorssartíneĸarsínaussut nunalo neriorssûtigissaĸ tiguarneĸarsínaussoĸ. — 4 Môrsase 13:1-imît 14:9 ilángutdlugo.
nunamut neriorssûtigissamut iserĸuneĸángíname, Mosesip Josua oĸalugfigâ: „tugpatdlerit [tatitusârit] píssagtitdlutitdlo, ivdlit inuiait uko apûteĸatigiumâragkit nunamut [Jehovap] táukua sujuaissainut ugpernarsáissutigissânut táukunúnga túniúkumassânut; ivdlitdlo kingornússagssatut táukunúnga avguarumârpat.“ — 5 Môrsase 31:7, 23.
tamatumánga pâsineĸarsínauvoĸ suna pivdlugo ilimagisínaugigput Jôrsuap agdlagai ilíniarfigisínauvdlugit sutigut táussuma tatituneranik uvagutdlo ĸanoĸ tatitusínaunigssavtínik. oĸautsit „tatituneĸ“ ãma „píssagtíneĸ“ bîbilime versime atautsíkut pinerisa agfáinit amerdlanerussut Jôrsuap agdlagaine imalũnît Josua pivdlugo oĸauserissane pissarput. una ássersûtigalugo: agdlagkat táukua autdlarĸautãne Jehovap Josuamut sujúnersûtâ una atuarparput: „tugpatdlersínait [tatitusârsínait] píssagtingârdlutitdlo, inatsisit Môrsasip kivfama ilingnut inássutigissai ilũngaisa maleruarĸigsârdlugit; tássánga saĸingnavêrit talerpiuvdlũnît tungânut sâmiuvdlũnît tungânut, sianisûtut iliorsínaorĸuvdlutit ingerdlavigissagssangne tamane.“ (Jôrsua 1:7) ilumigut ugperníkut tatitunerminik takugssaussúkutdlo suliamigut tatitunerminik Josuap takutitsinerisa ilait misigssoriartigik. misigssorêrdlugit tamavta ingmíkut sunik ilíniarfigisínaugivut takúsavarput.
tatitûmik ugperneĸ suliatdlo
Jehovap kajumigsârĸámermane ’tatitusârĸuvdlune píssagtingârĸuvdlunilo’, Israelíkúnik Jordan ikârdlugo Kana’anivdlo nunânut iserdlutik sujulerssuinigssaminut Josua periarfigssiulerpoĸ. Josua ima perĸússuteĸarpoĸ: „upalungaersaritse taĸuardluse, uvdlut pingasut ĸângiutínagit Jôrtane mána ikãsagavsiuk, nuna [Jehovap] Gûtivse pigerĸuvdlugo ilivsínut túniússâ pigilerniariartordlugo.“ (Jôrsua 1:11) tatitûmik ugperaluardlune Josua isumaĸángilaĸ sumigdlũnît iliornatik Jehova utarĸĩnarsínaugigtik táussuma tamanik nãmagsingningnigssâ ilimagalugo. nangmingneĸ ilungersûtigssaĸarput. uvagútaoĸ ugpernermik tatitunermigdlo atorfigssaĸartitsivugut Jesusip únersũssutâ malísaguvtigo nãmagtumik nerissaĸarniarnivtíne atissaĸarniarnivtínilo Gûte uvavtínik ikiuinigssâgut tatigerĸuvdlugo. ikiuinigssânigdle neriorssorneĸaravta imáingilaĸ ilatsĩnarsínaussugut ingmivtínutdlo pilersorniardluta ĸanoĸ iliornata. — Matîuse 6:25-33.
taimaníkorpiaĸ Josuap ajornartorsiutigâ Jordanip kûgssuata akianut ikârniarnigssaĸ upernaungmat ulerulugsimangmatdlo ikârniarnerdlo navianarmat. (Jôrsua 5:10) Josua imáitumik erĸarsángilaĸ: ’ímaĸa pitsaunerúsaoĸ uníngagatdlaruvta aussarigsigpat íkánigssâ utarĸivdlugo.’ Gûtip iliûseĸarĸuvai, Josualo tatitusârdlune iliûseĸarpoĸ. ilíniagagssaĸarnera pâsiviuk? erĸortumik gûtisiornermut atatitdlugo iliûseĸarnigssavtínut pivfigssángorângat, tatitusârtumik iliûseĸartariaĸarpugut, píssutsit iluatingnarnerulernigssât atoruminarnerúsangatínarnigssâtdlũnît utarĸiniarnago. âp, iliûseĸarit, Josuap iliorneratut. — akugdlîssup oĸausê 11:4; Jâko 4:13, 14.
Josua najorine erssersíkumavdlugo, Gûtip táuna perĸuvâ palasit perĸorĸuvdlugit angerutsip igdlerfia kûgssuarmut ulerulugsimassumut ámukautísagât. kûgssûp ervnginut tungmariarmata, ervngit avigsârput. tauva inuiaĸatigît ikârsínaulerput isigkatik masagtínagitdlũnît. pisimassoĸ tamána nangmineĸ atarĸinautiginiarnago, Jehovap únersũssutâ Josuap maligpâ Gilgalimilo (ánagsimavdlutik kímut sineriânîtdlutik) ujarĸat kûgssûp kûgfianit tigussat erĸáissutigssaliûtigalugit. ersserĸigsautáuput ’Jehovap agssai píssaussut, mianererĸuvdlugo uvdlut nungutdlugit’. (Jôrsua 3:5-imît 4:24 ilángutdlugo) erĸáissutigssiaĸ ujarĸanik sanâĸ táuna nauk takusínáungíkaluardlugo, Jehovap Josuákut iliorsimanerata tatigingningnerulersísavâtigut Gûtip ínugtane pivdlugit iliorsínauneranik. erĸáissutigssiap táussuma pingârtortâ Israelíkut kivdlíssutigísavât kana’animiut igdloĸarfiata patdligtailissaussup Jerikop sânîtitdlutik.
Josuap, sákutûnut nâlagaugame ersisuitsoĸ, Israelíkut tamákerdlugit igdloĸarfingmik patdligtailissaussumik imailĩnardlutik sãssússinigssãnut sujulerssuínásanerpai? nâggalũnît, Josuavdle Gûtip nâlagkiutai maligpai. ĸanoĸ iliorĸuvâ? angutit sákulersugaussut uvdlut tamaisa nipeĸarnatik igdloĸarfik kaujatdlagdlugo ingerdlaorĸuvai, palasitdlo, ilaisa savat angutivíssat nagssue ĸardlortautigalugit ilaitdlo igdlerfingmik erssugtut, maligtigalugit. uvdlut arfineĸ áipãne arfineĸ mardloriardlugo kaujatdlagpât, „inuit tauva nivdlerput, suvdluartáussuitdlo ĸardlortautigait; . . . tauva ungalorssuaĸ [Jerikop ĸarmarssue] samunga nákarpoĸ“. tamána pisimangmat Josuap angutitai isâsínaulerput igdloĸarfigdlo piunêrutdlugo. âp, ajugaorujugssuarput! — Jôrsua 6:20.
aulajaitsûnigssamut sapĩssusilik, ingassáussiniarnanile
tugdliutdlugo pisimassut mardluk ilíniarfigalugit Josuap tatitusârneranut túngassoĸ avdla ilisarisínauvarput. sujugdleĸ igdloĸarfingmut ĸanigtumut Ajimut túngatitdlugo pisimavoĸ. Israelíkut sãssúkiartoramíko tunuartíneĸarput. suna píssutigalugo? Gûtip inássutâ nâlangnago Akan Jerikomît tiguagaĸarmat. Akanip iliornera inuit ilaisa ímaĸa utorĸatsíssutiginiásavât, tiguagai iluaĸutaungmata tigusineralo kimigdlũnît ajoĸusĩsangatínángingmat. taimáitumik erĸarsartauseĸ ímaĸa tusarsimavat sulisitsinermit tigúsukarnerit imalũnît ’angnikitsumik’ uniorĸutitsinerit pineĸarneratigut. Josuale ĸanoĸ iliûseĸarpa?
Gûtimit ikiorneĸardlune Josuap ínardlugtuliortoĸ ingmíkôrtípâ, pinerdlugtuliorsimaneralo aulajangiúpâ tigdlitat sumĩnerat nalunaerdlugo. angnikísimássusê! pisimassuvdlo pingârtortâ Josuap uparuarpâ Akan oĸarfigalugo: „sôĸ perdlugssiorpisigut? [Jehovap] perdlugssiúsavâtit uvdloĸ mána.“ (Jôrsua 7:25) nâpertuivdluarneĸ aulajangiutdlugo Josuap ajortuliortoĸ toĸúneĸartípâ, tássûnalo Aj ajugauvfigineĸarsínãngortitdlugo. Akanimut túngassoĸ Josuap ĸanoĸ iliûseĸarfigissâ erĸarsautigalugo ingmivtínut aperisínauvugut: ’uvanga taima aulajaitsiginerpunga suleĸatima atuaĸatimalũnît perĸussáungitsuliornerit kángunartuliorneritdlũnît soĸutaorpiángitsutut oĸautigigângatigik?’
pisimassut áipât, gibeonimiunut Kana’aníkûssunut túngassoĸ, sangmeriartigo. Jerikomik Ajimigdlo sãssússivdlune Josuap iluagtitsinera tusaramíko, perĸusersûssumik angutinik nunamit ungasigsorssuarmit aggertûssârtunik autdlartitsíput, oĸartunik Israelíkut erĸigsivigssioĸatigĩssúmik angerfigiumavdlugit; angerfigaitdlo. tauvale pâsineĸalerpoĸ angutit ĸanigtûssumit Gibeonimêrsûssut, Israelíkutdlo ilarpagssuisa pisimassup ĸanoĸ suliarineĸarnera nãmagigtaitdliûtigilerpât. Josuap sagdloĸítarneĸ kamagsautigísanerpâ Gibeonilo piunêrúneĸarĸuvdlugo?
angerfigisimavait, Josuavdlo angeruseĸ atarĸivâ. Josua perĸussivoĸ gibeonimiut sujumut Gûtip igdluanut imertartartúngortíneĸásassut ĸissugtartartúngortíneĸásassutdlo. isumaĸatigĩssut tamána maligkumavdlugo gibeonimiut akuerssíput, kingunitsiánguagutdlo pisimassunit pâsineĸarpoĸ Josuavtaoĸ aulajangiúkumagâ. ĸanoĸ? kúngit Kana’aníkûssut tatdlimat nunap táussuma erĸânêrsut iligĩngorput Gibeonilo sãssúkiartordlugo. Josua pilertortumik iliûseĸalerpoĸ únuardlo nâvdlugo ingerdlaorêrdlutik iligît táuko sãssutilerdlugit. Jehova ikiũpoĸ sákutôĸatigît Kana’aníkûssut natarĸornartitsivfigalugit toĸússutaussunik tauvalo tupingnartuliorníkut seĸineĸ uvdloĸ nâvdlugo uníngatitdlugo Israelíkut akerĸamingnik ajorssartitsivdluínarsínaorĸuvdlugit. pisimassoĸ gibeonimiunut túngassoĸ erĸaivdlugo uvagut Josuatut aulajaitsigísanerpugut tatitutigísavdlutalo Gûtip ilerĸorerĸussainut akerdliúngitsumik isumaĸatigĩssúmut akuerssiguvta angeruvtalũnît? oĸautsivut erĸûtitítarnerpavut nauk piumináikaluartoĸ pissaríssersûtaugaluartordlũnît? — Tussiaat 15:4.
akiũnerup taineĸarĸámersup kingornagut, kúngitdlo akeraussaut tatdlimaussut toĸúneĸángitsiartut, píssutsiminut nalerĸútumik Josuap ínugtane kajumigsârpai oĸardlune: „sujôranase ánilârnasilo, tugpatdleritse [tatitusâritse] píssagtitdlusilo, [Jehova] taimailiúsangmat ĸíngarssortivsínut sorssugagssavsínut tamanut.“ (Jôrsua 10:25) Israelíkut píssagtíneĸ tatitusârnerdlo atorfigssaĸartitdluásavait Gûtip sãssússerĸussinera maligdlugo kujámut kingusingnerussúkutdlo avangnamut, Hazorip kúngia Israelíkut akerariniardlugit iluagtíngitsôrtumik iligîgsitsivfianut, nunamik tiguaiumavdlutik sorssugkiartornermingne. nauk Kana’aníkûssutut, patdligtailissaussunik igdloĸarfiligtut sákulersugaussunigdlo ĸamutiligtut, sorssungnermut upalungaersimatigíngíkaluardlutik, Israelíkut Jehovap perĸussâ sapîtsumik nãmagsivât.
Jôrsuap agdlagainit ilíniagagssat avdlat
Jôrsuap agdlagaine ilíniagagssat Josuap tatitusârneranut túngassut malugineruvavut. agdlagaile nâvdlugit atuartitdlugit ilíniagagssat iluaĸutaussut avdlat malugisínauvatit. arnarpagssuit Rahabip isumâ kivdlíssutigât. Israelíkut mardluk Jerikomik alapernaerssuiartortut Rahabip sernigssorpai. Israelíkut pivdlugit Gûtip suliai angnertût tusaramíkik, Kana’aníkûssut amerdlanerssait igdlersorniardlutik isumaĸalerput ersinermitdlo Israelíkut agssortulerdlugit. Rahabile avdlauvoĸ. Jehovamit isumagssugaujumanermit nunarĸatiminut píssutse navianartorsiortíkumavdlugo inûninilo ánaeratarsínaugaluardlugo iliorpoĸ. sapíngisaminigdlo erĸardline ikiorniarpai pâsitíniardlugit ĸanoĸ iliortariaĸarnigssãnik ánásagunik. oĸalugtuaĸ tamána iluaĸutauvoĸ uvdlumíkúme arnat pâsíssutigisínaungmássuk erĸortumik gûtisiornerup sagdliutíneĸartariaĸarnigssâ sanilinut nunarĸatinutdlũnît píssutsimit angnerussumik. — Jôrsua 2:8-14.
Jôrsuap agdlagaine pitsaussumik ilíniagagssaĸarportaoĸ inuit avdlat píssutait kúkussumik píssusersiorĸunagit. tamána pisimavoĸ Kana’anip nunâta ilarssua tiguarneĸarêrmat Josuavdlo nuna nagguveĸatigît ássigĩngitsut nunap ilânik kingornússagssãtut avguarêrmagit. angutit nagguveĸatigîngnit mardlungnit agfarmitdlo nunamingnut Jordanip kangia-tungânĩtumut angerdlamut autdlarput, avĸutânilo tunissiviliordlutik. tunissiviup pingârtortâ pivdlugo nagguveĸatigît kitânĩtut erĸarsautigerĸigsârĸârnago — kúkussumigdlo — isuma inerpât. nagguveĸatigît ingmingnut sorssũnigssât ilimanarsilerpoĸ. Jôrsuap agdlagaisa kapitalîsa 22-áne oĸalugtuaĸ atuartitdlugo ilíniagagssaĸ una ilíniarniartigo: mianerssortariaĸarpugut inuit avdlat iliornermingnut píssutipiloĸartíniarnagit. malugiugtaoĸ inuk ĸanoĸ ajúngitsumik iliortariaĸartoĸ miníneĸardlune misigigune imalũnît isumaĸarune erĸúngitsumik pineĸardlune.
Jôrsuap agdlagai imaĸarnersiortitdlugit táingitsôrsínáungilarput Gûtip oĸausia túngavigalugo erĸortumik gûtisiornermik ilíniarnermik aulajangiússinermigdlo pingârtitsinerat. Gûtip Josua sujúnersorpâ oĸausia atuartarĸuvdlugo nigorsimarĸunagulo. (Jôrsua 1:8) Ajime ajugaunerata kingornagut, Josuap inuiaĸatigît tamaisa sujulerssorpai avangnamut Sikemip erĸânut, Ebalip Garizimivdlo ĸáĸaisa akornánut. tássane pigdlînigssamut tunissiviliorpoĸ, „tássungalo ujarĸanut titarpai Môrsasip inatsisaisa ássinge“. (Jôrsua 8:32) ãmátaoĸ inuit inatsisinik atuvfápai. „oĸauseĸángilaĸ Môrsasip inássutigissaisa tamarmik ilãnik Jôrsuap tordlulautigíngisânik Israîlíkut ilagît ilũngarmik sãne, arnatdlo mêrĸatdlo takornartatdlo akúnermingne saĸissut táputdlugit.“ — Jôrsua 8:35.
kingusingnerussúkut, igdloĸarfingme angneruniarnane avgûtisiagssamisut ĸínutigissamine sivisungâtsiartumik inôrêrdlune, Josuap inuiaĸatigît katerssûterĸigpai, oĸardlune: „utorĸauvunga ukiorpagssuit angusimavdlugit; tamaisalo takussarpase, ĸanoĸ [Jehova] Gûterse akimángitsunut [inuiaĸatigîngnut] ukunúnga tamanut iliortartoĸ sujunivsigut, [Jehova] Gûterse tássaungmat igdlersordluse sorssugtoĸ.“ taimáitumik kajumigsârpai: „píssagtingâritse tauva, Môrsasip inatsisaisa agdlagsimavfiáne agdlagsimassut tamaisa aulajangiutdlugit nãmagsivdlugitdlo, tássánga saĸingnavêrdluse talerpiuvdlũnît tungânut sâmiuvdlũnît tungânut . . . kisiáne [Jehova] Gûterse átavigísavarse.“ taimailiornigssãnut kivdligtíniardlugit erĸaisípai: „atalo, . . . oĸautsimik atautsimigdlũnît atúngitsoĸángi[laĸ] oĸautsit ajúngitsut tamarmik ilãnik, [Jehovap] Gûtivse ilivsínut oĸauserissaisa; tamarmik ilivsínut erĸũput.“ — Jôrsua 23:2-8, 14.
naggatâtigut inuiaĸatigît katerssûterĸigpai inûvdluarĸússúmik oĸaorĸigsârumavdlugit, kimigîserfigalugitdlo oĸardlune: „uvdlume tauva ilivsínut ĸinersigik kivfartũkumassase: . . . uvangale inoĸutimalo [Jehova] kivfartũkumavarput.“ oĸarmata ãma nangmingneĸ taimailiorumârdlutik, angerutsimik angerfigai. Gûtip agdlagángortitâne agdlagsimavoĸ: „tamákualo taimailissut kingornatigut Jôrsua Núnip ernera [Jehovap] kivfâ toĸuvoĸ untritilingnik ĸulinigdlo [110-nik] ukioĸardlune.“ ilumut, Jehovamik patdlorfigingnigtoĸ ilumôrtoĸ táuna kivdlíssutigingârparput uvagútaoĸ sapîtdluta nakûvdlutalo ’Jehova mianeralugo kivfartûtdlugulo agssuarnaitdluta ilumôrdlutalo’. — Jôrsua 24:14, 15, 29. (wD 15/1 85)