Paulusip ilagiit allaffigai

ILAGIIT kristumiut pilersinneqaqqammersut Jehovap siunertaata naammassineqarnerani pingaarutilimmik inissisimaffeqartussaapput. Ukiunili hundredelinni siullerni kristumiut pilertortumik saassunneqarput. Ilagiit avataanniittunit akerlilersorneqaraluarlutik ilagiinniittunillu malunnarpianngitsumik navianartorsiortinneqaraluarlutik Guutimut assuarnaattuassappat? Kristumiut Allagaataanni Grækerisuuniipput allakkat 21-t siunnersuutinik kajumissaarutinillu pisariaqartinneqartunik imallit.

Allakkat taakkua ilaat 14-it — Romamiunut allakkaniit Hebræerinut allakkanut — apustilimit Paulusimit allagaapput. Allakkat taakkua allaffigineqartut — inuk ataaseq ilagiilluunniit aalajangersimasut — taaguuteqaatigaat. Paulusip allagaani sammineqartut ilaat misissoriartigit.

Ileqqussat pissusilersornerlu pillugit oqaaqqissaarutit. Kinguaassiuutitigut inuunerluttut, allasiortut allatullu ingasattumik ajortuliortut “Guutip naalagaaffia kingornussarsiarissanngilaat”. (Galatiamiut 5:19-21; 1 Korinthimiut 6:9-11) Guutimik pallorfiginnittut inuiaassusertik apeqqutaatinnagu ataasiussuseqartariaqarput. (Romamiut 2:11; Efesosimiut 4:1-6) Uppeqatiminnik annikilliortunik kajumillutik namminissarsioratillu ikiuiumassapput. (2 Korinthimiut 9:7) Paulusi ima oqarpoq: “Qinuttuinnaritsi.” Aap, pallorfiginnittut uummammiuminnik qinunikkut Jehovamut aniatitseqqullugit kajumissaarneqarput. (1 Thessalonikamiut 5:17; 2 Thessalonikamiut 3:1; Filippimiut 4:6, 7) Qinnutit Guutimit tusarneqarsinnaassappata upperluni qinusariaqarpoq. — Hebræerit 11:6.

Ilaqutariit ingerlalluarnissaminnut suna iluaqutigissavaat? Uiusut nuliatik namminneq timimittut asasariaqarpaat. Nuliaasut uitik ataqqingaartariaqarpaat. Meeqqat angajoqqaaminnut naalattariaqarput, tamanna Guutip iluarimmagu. Angajoqqaat meeqqatik asannittumik siulersorlugillu ilinniartittariaqarpaat, najoqqutassiat Guutip oqaasianiittut atorlugit. — Efesosimiut 5:22–6:4; Kolossemiut 3:18-21.

Guutip siunertaanik paasinninnerulerneq. Mosesip inatsisaanut tunngasut ilarpassui Kristusip tikiunnissaata tungaanut Israelikkunnut illersuutaallutillu taakkuninnga siulersuipput. (Galatiamiut 3:24) Kristumiulli Guutimik pallorfiginnikkumallutik Inatsisit taakku maleruartariaqanngilaat. Paulusip hebræerinut — kristumiunut Mosesip inatsisaanik maleruaasimasunut — allakkamini Inatsisinut taakkununnga suna siunertaanersoq Guutillu siunertaata Kristusimut qanoq eqquutitinneqarnera paasinarsisippaa. Paulusip nassuiarpaa Inatsisit ilaasa siulittuutaanerat. Assersuutigalugu nersutinik pilliuteqarneq Jiisusip pilliutitut toquneranut, inuit isumakkeerfigineqarluinnarnissaannut aqqutissiuussisumut, siumut assersuutaavoq. (Hebræerit 10:1-4) Jiisusip toquneratigut Inatsisit tunngavigalugit angeruseq Guutip atorunnaarsippaa, pisariaarummat. — Kolossemiut 2:13-17; Hebræerit 8:13.

Ilagiinnik aaqqissuussilluarnissamik ilitsersuutit. Angutit ilagiinni akisussaaffinnik isumaginnikkumasut ileqqorissuusariaqarlutillu piumasaqaatinik Biibilimiittunik eqqortitsisariaqarput. (1 Timotheusi 3:1-10, 12, 13; Titusi 1:5-9) Jehovamik pallorfiginnittut uppeqatitik katersuuteqatigiuartariaqarpaat qiimmassaqatigiikkumallutik. (Hebræerit 10:24, 25) Ataatsimiinnerit Guutimik pallorfiginniffiusartut ineriartornartuullutillu ilinniarfiussapput. — 1 Korinthimiut 14:26, 31.

Apustilip Paulusip Timotheusimut allakkami aappaannik allannermini Romamiippoq; parnaarussaaqqavoq eqqartuunneqarnissanilu utaqqillugu. Sapiitsut ikittuinnaat taassumunnga pulaarlutik imminut navianartorsiortipput. Paulusip nalunngilaa toqungajalerluni. Ima allappoq: “Ajunngitsoq sorsuutigisimavara, arpaffissaq naavara upperneralu attatiinnarlugu.” (2 Timotheusi 4:7) Ilimanarpoq Paulusi uppernini pillugu toqutaasimasoq. Apustililli allagai Guutimik pallorfiginnittunut ilumoortunut ullumikkut suli iluaqutaapput.

— Tunngavigineqartut: Romamiut; 1 Korinthimiut; 2 Korinthimiut; Galatiamiut; Efesosimiut; Filippimiut; Kolossemiut; 1 Thessalonikamiut; 2 Thessalonikamiut; 1 Timotheusi; 2 Timotheusi; Titusi; Fiilimuut; Hebræerit.