Guuti uagutsinnut nanitippoq

KUNNGI David ernerminit Salomonimit kingoraarneqarnialerami taassuminnga ima siunnersuisimavoq: „[Jehova] ataatavit Guutia ilisariniaruk! Kajumillutit naalanniaruk uummatikkut iluunngarlutit! [Jehovammi] inuit uummataat tamaasa misissuiffigeqqissaartarpai eqqarsaativullu isertugaanerpaat ilisimallugit. [Jehova] ujarunni nanitikumaarpoq. Tunukkunnili ajattorumaarpaatit naassaanngitsumut.“ — 1 Israelikkut 28:9.

Tamatuma ilumuussusia uagut misigaarput. Guuti ujaratsigu nanivarput — aatsaalli aqquterpassuit kukkusut ingerlavigereerlutigik. Isumaqarpunga Jehovap takusinnaasimagaa nammineq kiffartuunniarlunilu qanoq iliorsinnaanerput qanoq eqqarsaatigisartigigivut, nanitillunilu. Qanoq pisoqarsimanera maanna oqaluttuarilaassavarput.

Qatanngutigiit angutaannaat sisamaalluta Floridami peroriartorpugut. Ataatarput igasutut sulivoq ilaquttanilu pilersorniarlugit sivisuumik pigaarfeqartarluni. Anaana angerlarsimaannartuuvoq, nukappiaqqallu sisamaasugut ivikkanik killuisarpugut, aviisinik agguaassisarluta — ilaqutariit isertitaannut tapertaasinnaasunik tamanik suliaqartarluta. Anaana katuuliuvoq ataatalu baptistiulluni. Tamatta Guuti Biibililu upperaavut, allamilli naamik, qaqutiguinnarlu naalagiartarpugut. 70-ikkut aallartilaarput, eqqissinissaq, qarliit paakkaat, nutsat takisuut nipilersukkallu rockit mutiuleruttorlutik. Tamakkunannga tamanit sunnertinngitsuunngilagut.

Aatsaat 1982-imi Scott uangalu Steve, 24-nik 17-inillu ukioqarluta, Biibili iluamik soqutigilerparput. Tamanna ilutigalugu silarsuarmi pissutsinik ajorsiartuinnartunik isumakuluutiginnikkaluttuinnarpugut. Scott nammineq suliffeqarfiuteqarpoq ingerlalluartumik, taamaattumillu aalajangerpugut inissiami ineqatigiilerniarluta. Inooriaaserput qatsuteqaarput — assut imerniartarfinniittaratta — qularutiginngilarpullu arlaanni pitsaanerusoqartoq. Anersaakkut pisariaqartitsisutut misigilerpugut. Aalajangersimasumik Biibilimi atuartarnitsigut Guutip oqaasianik paasisaqarnerorusulerpugut.

Sapaatikkut oqaluffinnut assigiinngitsunukartalerpugut. Oqaluffinni Lake Worthimi Floridamiittumi inigisatta eqqaaniittuni palasit oqaluutsiminni minuttit 25-t atorlugit aningaasanik tunissuteqarnissamik pisariaqartitsineq eqqartortarpaat. „Naammattorsuarnik tunissuteqartarniaritsi, kaasarfissi ilorpiaannit,“ ilaanni palasi oqaluttarfimmit ujakkaassimalluni oqarpoq. Ilaannikkut naalagiarnermi ataatsimi nakkaatitsivik pingasoriarlugu ingerlaartinneqartarpoq, tamatumalu kingunerisaanik naalagiat ilarpassui suuteqaratik anisarlutik. Oqaluffippassuit ornittarpavut, tamatigulli paasisarlugu katerisimaarneq aningaasanillu katersuisitsineq pingaartinneqarnerpaasut.

Jehovap Nalunaajaasuinut mianersoqquneqarpugut

Isumaqalersinneqarsimavugut upperisarput Biibilimi ajoqersuutinik tunngaviusunik tunngaveqartoq, tamannalu upperilluinnarparput teologinit pikkorissunit ilinniartinneqartaratta. Amerikami immikkut upperusiortut pillugit ilinniartinneqartarpugut, ingammik Jehovap Nalunaajaasui pillugit. Mianersoqquneqarluta oqaluttuunneqartarpugut Jehovap Nalunaajaasuisa Jesus upperinngikkaat, nammineq sanaaminnik biibileqartut, qilaliartussaanngitsut anniarfimmillu upperisaqanngitsut. Soorunami tamakku tamaasa pissutigalugit isummerpugut Jehovap Nalunaajaasuisa upperisaat ilumuunngitsoq.

Ilungersuussisorujussuuvugut, eqqorluartumilli ilisarsineq naapertornagu. (Rûmamiut 10:2) Matîuse 28:19, 20-mili allassimasoq nalunngilluarparput, nutaarsiassaq nuannersoq oqaluussissutigalugulu ajoqersuganngortitsiortussasugut. Taamanikkut ilagiinnut Bible Townimik taaguutilinnut 2000-inik ilaasortalinnut orniguttarpugut, inuusuttunullu 100-t missaanniittunut, 17-it 30-llu akornanni ukiulinnut, ilaasarpugut. Scottip oqaluussinertut ittumik suliaqartinniartaraluarpai — iluatsitsinanili.

Taamaattumik nammineerluta oqaluussisalerpugut. Scott isumassarsivoq atornikuerniarfimmi naqitaaqqanik biibilinillu agguaassisinnaasugut. Taamaaliortalerpugullu. Tamaani atuagaarniarfimmut ’kristumiumut’ orniguppugut, naqitaararpassuarnik biibilerpassuarnillu pisilluta, atornikuerniarfimmukarluta, pilattorfinnullu marlunnut krydsfinerinermik iliseriarluta naqitaaraativut biibiliutivullu tassunga ilillugit, taamaalillutalu ’oqaatsimik tusarnaaginnartuunata naammassinnittuuniarsaraluta’. — Jâko 1:22.

Sapaatit-akunnerini tulliuttuni atornikuerniarfimmi oqaluussinitsinnut soqutiginninneq alliartorpoq. Atuagassiat tuluttuut Spaniamiutuullu agguaattarpavut. Agguaattakkavut tassaapput biibilit, naqitaaqqat assigiinngitsut 30-t allaallu kappoqqutit „Guutip asavaatit“-mik allannillit. Kinguninnguarileraa Scott maskiinamik T-shirtinik assiliartaliissutaasinnaasumik pisivoq. Oqariartuutit Biibilimut tunngasut tuluujuaqqanut naqittarpavut, soorlu: „Ullumi biibilinni atuarpit?“, „Sooq qungujulasunga eqqarsaatigisimaviuk?“, „Jesus uummatinniippoq,“ allarpassuillu. Ataatsimi allassimavoq „sarĸúmersitat“ hestersunik sisamanik assiliartalik.

Takorloorparput tuluujuaqqanik atornitsigut nipaatsumik nalunaajaateqarsinnaalluta. Arfininngornerit sapaatillu tamaasa ullaakkut arfineq-pingasuniit ualikkut ataatsip tungaanut atornikuerniarfimmi oqaluussinitsitut taasarput qimerloorneqarsinnaasarpoq. Biilit uninngasarfiat saneqqullugu biilit igalaavinut qillersaatini naqitaaqqanik ilisisoqarsimappat, tassa uagut tamaaniissimassaagut. Atuagassiat tamarmik kajumissutsiminnik tunissuteqarusuttunut agguaanneqartarput, ikittuinnaalli tunissuteqartarput. Ukiumi ataatsimi naatsorsorpavut aningaasat qanoq amerlatigisut tamakkununnga atorsimanerlugit, 60.000 koruunillu angumavaat.

Jehovap nalunaajaasuanik naapitsivugut

Ilaanni Bonita Springsimi sissami nalukkiarsimatilluta angutip utoqqasaap ornippaatigut oqarlunilu biilitta isoqutaani nipputtartut tuluujuaqqattalu allagartaat malugisimallugit. Biibili pillugu oqaluutilerpaatigut Allakkallu aallaavigalugit eqqarsalersinniarsarilerluta. apustilit suliáinik agdlagkat 2:31 tikippaa aperalunilu: „Anniarfeqarsimappat ikualasumik inuillu ajortut kisimik tassunga pisussaappata, taava sooq Biibilimi allassimava Jesus tassaniissimasoq?“ Aamma allassimaffippassuit pillugit oqaloqatigaatigut. Naggataatigut Scott oqarpoq: „Jehovap nalunaajaasuisa ilagisimassavaatsit.“ Akivoq: „Aap, taamaappoq.“ Taava Scott oqarpoq: „Jesus upperilaanngilarsi.“ Minuttini tulliuttuni 20-ni oqaluussisartoq Jesus pillugu oqaluppoq, soorli pinerpoq tamanna soqutiginnilissutiginngilarput.

Weekendini atornikuerniarfimmi oqaluussisarnerput ingerlatiinnarparput. Ukiuni pingasuni taamaaliortarsimavugut — qularinngilluinnarparpullu sallusuissut pigalugu eqqortumillu iliorluta. Suli naalagiartarpugut, sapaatit tamaasa unnukkut oqaluffimmut allamut, arlaannaalluunniilli naammaginngilarput. Naggataatigut oqaluffiit tamakkerpavut, taamaattumillu aalajangerpugut unnuit ilaanni ’Jehovap Nalunaajaasuisa oqaluffiisa’ ilaannut ornigunniarluta, Jesus pillugu oqaluussiffiginiarlugit. Oqarasuaatit allattorsimaffianni adressia nassaareriarlugu sapaammi unnukkut taavunnarpugut. Paasigatsigu oqaluffinni allani pisarnertut sapaatikkut unnukkut ataatsimiinneq ajortut, isummerpugut Jesus upperisimanavianngilluinnaraat! Allagarsiussami ataatsimiinnerit pinissaasa nalunaarutigineqarfianni allassimavoq ataasinngornikkut unnukkut atuakkamik atuaqqissaaqatigiittoqartartoq. Aqaguani T-shirtilerluta biibilivullu nassarlugit ataatsimiigiarpugut. Eqqaamavarput ataatsimiigiannginnitsinni isumaliutigeqqaarlutigu T-shirti sorleq pitsaanerpaamik nalunaajaateqarsinnaassanersoq. Ataasinngornermi unnukkut siusinaarluta orniguppugut, qatanngutillu angutit marluk saaffigaatigut. Inussiarneqaat. Ingerlaannaq sarĸúmersitat pillugit itisuumik oqaloqatigiilerpugut. Uninngaannarnissatsinnik ataatsimiinnermullu najuunnissatsinnik neqeroorfigaatigut. Atuakkamik Ataasiussuseqarlutik Guutimik ilumoortutuamik pallorfiginnittut-mika tunivaatigut, ingiffissarsivugullu. Qatanngutip angutip ataatsimiinneq qinnummik aallarnerpaa.

Tusarnaaqqissaartorujussuuvugut. Qinnut ima naggaserneqarpoq: „Jesusip aqqani. Amen.“ Tupaqaluta immitsinnut nakkuppugut. „Tutsarlunngilagut? Jesusip aqqani qinuvoq!“ Soorlumi tassa tattak isitsinnit nakkartoq takusaqarluarsinnaalerluta. Uummativut eqqortumut sammippata tusarnaaqqissaarnissamut piffissanngorsimassaaq. Qatanngutip angutip atuakkami tunniussaminni kapitali 21 tamanut quppeqquaa. Jesusimut silarsuarmullu ilaannginnermut tunngavoq. Asulu uagutsinnut soqutiginartoq eqqoqqissaarlugu. Tassani Jesusip inuunera kiffartorneralu, naggatissap nalaa kalluunnaveersaartuunissarlu eqqartorneqarput. Meeqqat ilaat uagut nalusarluinnatsinnik akissuteqartarput. Qatanngullu angut ataatsimiinneq naggaserlugu Jesusip aqqani qinoqqippoq.

Anersaakkut nerisaqalerpugut

Sallusuissummik kaalluta naalagaaffilersaartarfimmukarsimavugut, sallusuissullu tassaniippoq, ungasinngisatsinni. Anersaakkut qiimmassarneqarsimalluta ataatsimiinnermit qimaguppugut, kingornalu oqaluffiliaqqinngisaannarpugut. Aqaguani unnukkut errorsisarfimmut errorsiartorsimatilluta sodavandisisarfiup automatip saniani atuagassiat Napasuliaq Alapernaarsuiffik-t aamma Iteritsi!-t qaleriiaat takulerpavut — minnerpaamik 150-it. Qangaasuuppat atuarniarnavianngivikkaluarpavut, maannali soqutiginartitarpassuatsinnik nassaartulerpugut. Taamaattumik atuagassiat katersoriarlugit angerlaappavut.

Ilanngutassiat ilaanni ima apeqquteqarpoq: „Ataasiullunilu pingasuussuseq upperineqarsinnaava?“ Aamma: „Ikualasumik anniarfeqarpa?“ Iteritsi!-mi ilanngutassiat ilaanni ’uperisarsiornikkut assilissat’ sammineqarput. Unnuk taanna Stevep ataasiullunilu pingasuussuseq pillugu ilanngutassiaq atuarpaa, sorpassuarnik misissuilluni, allassimaffiit ilangunneqarsimasut tamaasa quppertarlugit unnuaannakkullu Scott itersarlugu ilikkakkaminik oqaluttuunniarlugu. Aqaguani pingasunngornermi Stevep sulereerluni anniarfik pillugu ilanngutassiaq atuarpaa. Tassani Juánase 11:11, Jesus oqartoq Lazarus sinittoq, sammineqarpoq. Stevep Scott naapikkamiuk oqarfigaa: „Biibilinni anniarfik ikualasoq pillugu allassimasoqanngilaq.“ Upperisarsiornikkut assilissat sanningasullillu assigiinngitsut pillugit Iteritsi!-mi ilanngutassiat atuareerlugit tamakkuutivut tamaasa katersoriarlugit eqqaavilerisut biiliannut issorarpavut aallarunneqarmatalu isigalugit. Immitsinnut qiviarpugut, iluarusuppalullutalu qungujulluta. Nalunngilarput immikkorluinnaq ittumik nassaarsimalluta — sallusuissummik.

Aqaguani karsit marluk naqitaaqqanik 500-nik imallit tiguavut. Taakkunani ima allassimavoq: „Peqqissiminngikkuit anniarfimmut pissaatit.“ Maannali paasisimavarput naqitaaqqat tamakkua ilarpassui Biibilimut naapertuutinngitsut. Paatsuungalaarluta ataasinngornermi unnukkut atuakkamik atuaqqissaaqatigiinnermut orniguppugut naqitaaraatitta ilaannik nassarluta. Naqitaaraativut takutissorpavut aperisarluta: „Una atorsinnaava?“ Unnuit ilaanni naqitaaraativut tamaasa misissorpavut, erniinnaq naqitaaqqat qaleriiaat natermiilerput; arlaannaalluunniit Biibilip ajoqersuutaanik imaqanngilaq. Tamaasa igippavut. Nalunngilarput upperisartaarput uagutsinnut oqaluussiffigisatsinnullu inuunermik isumaqartoq. Akornusersorneqarata Biibilimik atuaqqissaarsinnaaniassagatta aallarnissarput kissaatigilerparput.

Alaskamut nuuppugut. Ataatsimiigiaqqaarnitsinni utoqqaanertat ilaat aperaarput ullut tamaasa Biibilimik atuaqqissaaqatigisarsinnaaneraatigut. Najuuttut tamarmik apeqquterput tusarunarpaat. Erniinnaq siumukalerpugut; atuagarlu pâratîsime nuname nâgssáungitsumik inûsínauvutit naallugu atuaqqissaareeratsigu ataatsimeersuaararnerit ilaanni kuisikkusulerpugut. Sulili utaqqilaartariaqarpugut. Pioneerinngornissarput anguniagaraarput. Ilimaginngilluinnakkatsinnik ataatarput perululluni napparsimalerpoq, ikiuukkiartorlutalu Floridamut utertariaqalerpugut.

Anersaakkut inersimassummut ingerlavugut

Floridami siumukarluarpugut, atuagaq ’Ataasiussuseqarlutik pallorfiginnittut’ naallugu, 1987-imilu kuisilluta. Taamaalinerani Jehovap nalunaajaasuinik naapitseqqaarnitsinnit qaammatit aqqanillit qaangiussimapput. Kuisereeratta ingerlaannaq ukiup affaani ikiorti-pioneeriuniarluta nalunaarpugut, kingornalu pioneerinngorluta. Ukioq ataaseq affarlu qaangiummata marluulluta ilagiinni kiffartortutut toqqagaavugut. Kuisinnitsinnit ukiut marluk qaangiuttut Brooklyn Betelimi sulilerpugut. Scott suli Betelimi kiffartorpoq, maannamullu ukiuni marlunni Kinamiutut ilinniarsimalluni. Steve Moskvami pioneeriuvoq. Marluulluta misigisimavarput sallusuissut tamatuminngalu ujarlerneq Ussatit 2:1-5-imi allassimasunut naapertuuttoq: „Ernera, oqaatsikka ilassiniakit inassutikkalu pigiuliullugit, ilisimassummut naalaarlutit paasiniaallutillu uummatikkut iluunngarlutit. Silassorissuseq qaaqquinnariannguaruk siuneqarnerlu aggeqqullugu nipituumik torlulaffigalugu. Ujarniaruk sølvisiortoq assigalugu, erlinnartunik nassaarniartutut ilungersorlutit. Taava paasilissavat Guutimik mianerinninneq sunaasoq ilisarilerlugulu Guuti.“

Steve qanoq ililluni Moskvamiilersoq

Steve oqaluttuarpoq: „New Yorkimi najugaqarallarama Russisut ilinnialersimavunga, isumaqarama oqaluussisarnera soqutiginarnerulissasoq immaqalu qanittukkut Jehovap Ruslandimi sulineq ammarumaaraa. Russisut oqaasillit atuakkamik atuaqqissaaqatigiinnerannut najuuttalernerma nalaani suli Brooklyn Betelimiippunga. Gruppit Russisut oqaasillit tallimanngornermi unnukkut atuakkamik atuaqqissaaqatigiittartut ataasiinnaapput. Piffissap ingerlanerani russit gruppiannut akuliusimanerujartorpunga. Oqaluussiartoqatigisarpakka, tamannalu nuannareqaara russit inussiarneqimmata. Kiffartornermut immikkoortortaqarfimmut allagaqarpunga russit gruppiannut ilaalernissara qinnutigalugu. Nuannaarutigeqisannik akuerisaavunga.

Ullaat ilaanni ullormut allassimaffik sammitillugu Napasuliaq Alapernaarsuiffiup Peqatigiiffiata præsidentia, Milton G. Henschel, oqarpoq immikkut ittumik nalunaarutissaqarluni. Taava nalunaarutigaa Jehovap Nalunaajaasuisa sulinerat Ruslandimi inatsisitigut akuerisaasimasoq qatanngutivullu upperisarsiornikkut kiffaanngissuseqartitaalersimasut. Isumaqarpunga ullaaq tamanna Betelimiittut nutaarsiassamik taama nuannertigisumik tusarlutik nuannaarnertik puiornavianngikkaat. Taamanikut eqqarsarpunga nunarujussuarmi taama atsigisumi kiffartorneq immikkut pisinnaatitaaffiussasoq annertooq.

Qatanngut angut russeq Volodeyamik atilik, Krasnodarimi Ruslandimiittumi najugalik, allaffigeqatigisalerpara. Taava tikeraarsarpaanga. Taamaattumik 1992-imi juuniugaa poortueriarlunga Moskvamut aallarpunga. Nuannaarutigeqisannik qatanngutip Volodeyap timmisartoqarfimmut aavaanga. Qatanngummi Stephan Levinskimi, ukiuni 45-ni sallusuissummiissimasumi, najugaqarpunga. Moskvami oqaluussisartuni taanna naapeqqaarpara, upperisaminillu aalajangiusimanninnini pillugu ukiorpassuarni parnaarussivimmiissimavoq. Tamaani oqaluussisartut inoroorsaarluinnartuupput.

Tassa Moskvamiilerpunga, russisullu pikkorissorsuunanga. Taamanikkut ilagiit sisamaannaapput, qatanngutillu tamarmik imminnut ilisarisimarpasipput. Pillunga, pillunga tamaaniissinnaatitaanera sivitsortissimavara. Sulilaartarpunga aningaasartuutikka matussutissaqartikkumallugit. Unamminiarnartoq annerpaaq tassaasimavoq oqaloqatiginninnissamut ataatsimiinnernilu anersaakkut ineriartortinneqarnissamut naammattumik russisoorsinnaalernissaq. Oqaatsit tungaatigut kigaalaarsimaqaanga, soorunamilu suli pikkorissartuarniartarpunga.

Nuannaarutigeqisannik ataatsimeersuarnerpassuarnut najuussimavunga aammalu amerliartupiloornermut kuisittorpassuarnullu takunnittuusarsimallunga. Qatanngutit ilungersuussissusiat piviusoq isigalugu uppernikkut nakussatsinnartarsimaqaaq. Misigisaq tamanna allamik taarserusunngilara. Tamaanga tikikkama qatanngutit angutit arnallu atuaqqissaartaleqqammersut imaluunniit kuiseqqammersut, maanna pioneeriupput, ilagiinni kiffartortuullutik imaluunniit Betelimi Solnetsnojemi, Sankt Petersborgip eqqaaniittumi, kiffartorlutik.

Sapaatit tamaasa naalagaaffilersaartarfipput inunnik 530-nik ulikkaavittarpoq, qaammatillu tamaasa kuisimanngitsut nutaat agguaqatigiissillugu aqqaneq-marluk oqaluussisartunngortarput. Ilagiinnut atatillugu kisitsisit kingulliit imaapput: oqaluussisartut 380-it, utoqqaanertat pingasut ilagiinnilu kiffartortut arfineq-marluk. Angerlarsimaffimmi Biibilimik atuaqqissaaqatigiinnerit ilagiinnit nalunaarutigineqartut 486-init amerlanerupput. 1995-imi februaarimi immikkut pisinnaatitaasutut misigaanga ilagiinnut atuakkamik atuaqqissaaqatigiittartunut gruppinut 29-nut tikeraaqattaartussanngortitaagama kiffartornermut tunngasumik oqalugiaqattaassallunga. Sapaatip-akunneranut gruppit sisamat pulaartarpakka. Ataatsimeersuarnerit pinnginneranni kuisikkusuttut peqatigalugit kuisittussanut apeqqutit sammillugit ulapaartaqaagut. 1995-imi maajimi immikkut ittumik ullormi ataatsimi ataatsimeersuarpugut, tassanilu 30-it ilagiissitsinneersut kuisipput. 10.000-it missingi najuupput 607-illu kuisillutik. Aasakkut ataatsimeersuarnermi kuisittut 877-iusut ilaat 24-t uagut ilagiissitsinneersuupput. Ilagiissitsinni 13-it pioneeriupput pingasullu specialpioneeriullutik. Taakkua katillugit 110-t missaanniittunik Biibilimik atuaqqissaaqatiginnittarput. Massakkut oqaluussisartut kuisimanngitsut 132-upput.

1995-imi eqqaaniaalluni nalliuttorsiornermut 1012-t najuupput. Peqatigiiffiup qatanngut Polenimiu, Mateysh, ilagiissitsinnut aallarteqqammerpaa. Taanna Kiffartortut Toqqakkat Atuarfianniissimavoq uagutsinnullu ikiuutaalluassaqaaq. Massakkut utoqqaanertat pingasuulerpugut. Tassa imaappoq ilagiit avinneqassapput oqaluussiffissarpullu, 1 millionit missaanniittunik pulaagassalik, marlunngorlugu avinneqassaaq. Ilagiit marlunngorlugit avinneqartut tamarmik immikkut 200-t missaanniittunik oqaluussisartoqassapput. Ilagiit arlaat marlunnik utoqqaanertaqassapput arlaallu ataatsimik. Maanna ataatsimeersuangajaleriaratta kuisittussat 44-t peqatigalugit kuisittussanut apeqqutit sammisalereerpavut. Ilaa tupinnaq? Ilumut anersaakkut paratiisi. Aap, tupinnaq! Ilumummi suliarput Jehovap siulersorpaa. Soorlumi tassa sorsuttartutut qamutaasa qilammiittut sukkaqalutik Rusland ingerlaarfigigaat. 1995-imi oktobarimi Moskvami ilagiit 40-t missaanniipput. Utoqqaanertat amerlanerusuuppata marloriaammik amerlanerusinnaagaluarput.“

Maanna atornikuerniarfimmi oqaluussisarnitsinnit ukiorpaaluit qaangiussimalerput. Scott Brooklyn Betelimiippoq, uangalu, Steve, ilagiinni Moskvamiittuni utoqqaanertatut kiffartorpunga — Guutip uagutsinnut nanitissimanera marluulluta qujamasuutigeqaarput. Qinuvugut millionilippassuit Guuti ujarumaaraat taannalu taakkununnga nanitikkumaartoq. — Oqaluttuartut: Scott aamma Steve Davis. (gE 22/3 96)

[Quppernerup ataani ilanngussaq]

[Qupp. 14-mi assiliartaq]

Scott

[Qupp. 15-mi assiliartaq]

Steve

[Qupp. 16-mi assiliartaq]

Moskvami ilagiit ilaanni sapaatikkut inuit 530-t sinnerlugit najuuttarput