Inuusuttut aperipput
Imminut illersorneq ilinniassavara?
„Atuarfimmi inupiloqatigeeqarpoq ajuissunik,“ Jesse oqarpoq. „Torsuusarsuarmi takugunitsit arpaatitillu, kavaajat allaalluunniit qarlitit piumagunikkit, tigussavaat. Oqaatigigukkillu malersoqqissavaatsit.“
NAKUUSERNIARTUNUT imminut illersorniarneq inuusuttorpassuarnut ulluinnarni atugaalersimavoq. Atuagassiami USA Today-mi allassimavoq: „Atuartuni annerni atuartut tallimassaasa tamarmik missingi aallaammik, savimmik, unngiaatip savissaanik, anaatamik allamilluunniit sakkumik nassataqarajuttarput. Amerlasuut tamakkuninnga atuarfimmut nassartarput.“ Inuusuttuaqqap Jairomik atillip tamanna nalunngilluarpaa. Oqarpoq: „Atuarfipput [illoqarfimmi New Yorkimi] siullersaalluni saviminermik malussajasumik atortorissaarutitaaqqaarpoq, tamannali atuartut savinnik illuinnarsuutinillu nassartarunnaassutiginngilaat. Naluara qanoq iliortarnersut, sakkunilli eqqussisoqartarpoq.“
Saassunneqarnissamik aarlerinartoqarmat inuusuttorpassuit imminut illersornissaq eqqarsaatigisarmassuk paasinarpoq. Niviarsiaraq Lolamik atilik oqarpoq: „Niviarsiaraq atuarfitsinneersoq iverutini pillugit savimmik toqutaammat, atuarfitsinni imminut illersorneq ilinniartitsissutigineqalerpoq. Tamangajammillu ilanngupput.“ Inuusuttut allat qillertuusanik serpartaatinik sakkuusinnaasunillu allanik nassartarput. Apeqqutaavorli imminut illersorneq ilumut illersuutiviunersoq?
Paanninnermik timersoriaatsit
Paanninnermik timersornermi pikkorissut TV-mi takuneqarajupput — qitittartutut takujuminartigalutik silaannakkut isimmitseriartarput tillueriartarlutillu. Sekundialuit ingerlanerinnaanni ’inupiluit’ aalariarsinnaanatik nunami nalasarput. Tupinnaq! Paanninnermik timersorneq illersuutissaalluarsorinaraluarpoq. Inuunerli piviusoq filmitut inngilaq. Angut ukiorpassuarni karatemik misilittagaqartoq oqarpoq: „Aqerloq ataasiinnaq naammappoq. Illuinnarsuutilik ungasilaaraanni, ilioriarfissaqarnanngilaq. Nerukitsumilu unguneqarsimagaanni, aamma ikioriarfissakeqaaq.“
Paasisariaqarportaaq paanninnermik timersoriaatsit pikkoriffigissagaanni ukiorpassuarni sungiusartuartariaqartoq aningaasarpassuarnillu atuisariaqarluni. Sungiusartuaannanngikkaannilu periaatsit taakkua piffissap sivikitsup ingerlanerinnaani sakkukillissapput. Imminut illersornerit allat, soorlu tilluunneq, aamma taamaapput. Aammattaaq paannissinnaasutut ilisimaneqaraanni kissaatiginngisamik maluginiarneqalersinnaavugut. Immaqa perulluliorumatuunit unammillerneqalersinnaavugut.
Paanninnermilli timersornermik ilinniarneq allamik annerusumik ulorianaateqarpoq. Atuagassiaq The Economist qanittukkut allappoq: „Paanninnermik timersoriaatsit amerlanersaat, tamarmiunngikkunik, Asiap kangiani upperisarsiornernut angisuunut pingasunut, Buddhismimut, Taoismimut Confucianismimullu, atalluinnarput.“ Alla paasissutissiivoq: „Karatemi suninnguit tamarmik — periaatsit tamarmik misigissutsit tamarmik — Zenimi najoqqutarisassanut tunngassuteqarput.“ Zen Buddhismimit immikkut upperusiortuuvoq upperisarsiornikkut eqqarsaqqissaarnermik pingaartitsisoq. Upperisarsiortunit tunuliaqutaqarnerata tamatuma kristumiut annertuumik ajornartorsiortippai, Biibilimimi 2 Korintumiut 6:17-imi allassimavoq: ’Taamaattumik [eqqunngitsumik pallorfiginnittut] akornannit anigitsi avissaarlugillu, oqarpoq Jehova; mingunnartorlu attoqinasiuk.’
Sakkulersorneq
Illuinnarsuummimmi savimmilluunniit nassataqarneq? Qularnanngitsumik tamatuma isumannaatsuunermik misigitissinnaavaatit. Isumannaatsutulli misiginerup tamatuma pisariaqanngitsumik sapiisertippatit ulorianartorsiulersinnaavutit perulluliortoorsinnaallutilluunniit. Biibili mianersoqqusivoq: „Ajortumik ujarlersoq nammineq tamatumannga eqqorneqassaaq.“ (Ussatit 11:27) Ajornartorsioriataalerlutillu sakkulersuleruvit qularnanngitsumik pissutsit ajornerulissapput. Toqutaasinnaavutit toqutsisinnaallutilluunniit. Pinerlunnerlu pinngitsoorsimasinnaagaluarukku Guutip, inuunerup Pilerfiata, qanoq isigissavaatit? — Tussiaat 11:5; 36:10.
Ilai sakkulisartarput atornissaat pilersaarutiginagu. Oqartarput ajoqusiiniartunut qunusaarutiginiaannarlugit. Atuagassiarli Health tamanna pillugu allappoq: „Aallaasilersornermut ilitsersuisartut isumaqatigiipput: Illuinnarsuut atornianngikkukku pisiareqinagu. Uukapaatitsiniarluni illuinnarsuusersorneq saassussisut ilaannik qimaatitsisinnaavoq, allanilli kamannerulersitsiinnassaaq.“
Sakkummi „isumannaannerusut“ soorlu qillertuusat serpartaatit? Nunat ilaanni tamakkua inerteqqutaanerata saniatigut sakkut taamaattut siunertaanngitsumik sunniuteqarsinnaapput. Saassussisoq ikiaroornartutorsimasoq susinnaajunnaartinnagu kamatserujussuaannarsinnaavaa. Imaassinnaavorlu anorip kemikalia illit kiinnannut supigaa saassussisinnut pinnagu — soorunami qillertuusap serpartaatip tigunissaa angumerisinnaagukku. Kaasarfissiortutit puussiamiluunniit tigusiniartutit takugunisit, saassussiniaq isumaqarsinnaavoq illuinnarsuummik tigusiniartutit, sakkortuumillu iliuuseqarfiginiarlutit aalajangerluni. Taamaattumik politeeq ima oqarpoq: „Sakkut taakku [kemikaliamik imerpalasumik imallit] sakkulluunniit allat iluaqutaanissaat qulakkeerneqarsinnaanngilaq. Tigunissaalluunniit immaqa angumerisinnaanngilat. Ajornartorsiornermi sakkut pissutsinik pitsaanerulersitsinngisaannarput. Tamakku inuit upperivallaarpaat.“
Sakkut pillugit Guutip isiginnittaasia
Jesusip nalaani pinerluttoqarsinnaaneranut aamma aarlerinartoqartarpoq. Assersuusiaasa tusaamaneqarnersaasa ilaata, Samariamiumik nallittuisumik assersuusiap, oqaluttuaraa pinerlunnikkut ujajaaneq. (Lúkarse 10:30-35) Jesusip ajoqersukkani panamik nassaqqugamigit illersuutaanissaa pinngilaa. Najoqqutassiamilli imaattumik saqqummiinissaminut periarfissatut atorpaa: ’Pannamik tigusisut nungullutik pannamik toqunneqassapput.’ — Matîuse 26:51, 52; Lúkarse 22:36-38.
Taamaattumik kristumiut ilumoortut tullertik ajoquserniarlugu sakkulersorneq ajorput. (Naleqqiuguk Jesaja 2:4.) Biibilip Rûmamiut 12:18-imi siunnersuutaa maleruarpaat: ’Ajornanngippat sapinngisassinnik inuit tamaasa eqqissiveqatiginiarsigik.’ Tamanna isumaqarpa illersuutissaqanngivissoq? Naaggarluinnaq!
Ilisimassut — sakkunik pitsaaneq
Piffissami sunik tamanik pisinnaaffigisatsinni immaqa tupaallaatigisinnaavat inuit sanaavinit illersuutaanerungaartumik pisinnaallutit paasigukku. Nalunaajaasup oqaasii 9:18-imi allassimavoq: „Silatussuseq sorsunnermi sakkunit atorluarsinnaaneruvoq.“ Ilisimassut tamanna tassaaginnanngilaq periaaseq torrallataq. Tassaavoq Biibilip najoqqutassiaanik maleruaaneq, nakuusernermillu pinngitsoortitsiniarnermi ikiuisinnaagajuttoq.
Jairop, aallaqqaataani atuarfimminik pinerluttuliorfiusumik oqaluttuartup, Biibilimi 1 Tásalûníkamiut 4:11-mi allassimasut maleruarnerisigut ajornartorsiutit nigorsimaniartarpai: ’Piuaanniaqqissaaritsi namminerlu suliassasi suliarisigik.’ Soorlu Jairo oqartoq: „Akiuuttoqarnissaa ilimanarpat, qimagutiinnartariaqarpoq angerlarlunilu. Ilaat najuutiinnartarput tamaattumillu ajornartorsiutinut akuliuttarlutik.“
Lola oqarpoq: „Jehovap nalunaajaasuuninnik tamaasa ilisimatinnerat uannut illersuutaanerpaavoq. Inuit suneq ajorpaannga aarlerinartorsiortitsineq ajortunga nalunnginnamikku.“ „Jehovap nalunaajaasuunerarluni oqarneq naammanngilaq,“ Eliu ilaliivoq. „Takusinnaasariaqarpaat allaanerusutit.“ Kristumiut ’silamiut ilagisussaanngilaat’. (Juánase 15:19) Pingaakujunniarpallaaqinalli. (Ussatit 11:2) Angut inuusuttoq oqarpoq: „Suna tamaat pigisutut torsuusarsuakkoorniaqinak.“ Tamanna iluaaginninnermik pilersitsisinnaavoq. Arnaq inuusuttoq kristumiu Luchymik atilik oqarpoq: „Atuaqatikka oqaloqatigisarpakka inussiarnerfigalugillu. Kisianni taakkunatut pissusilersorneq ajorpunga.“
Qanoq ittunik atisaqarnerit aamma apeqqutaasorujussuuvoq. „Malugeqqusaartunik atorneq ajorpunga,“ angut inuusuttoq oqarpoq. „Atisarissaarniarlunga akisuunik atortariaqanngilanga.“ Nuimanianngitsunik atisaqarnissamik Biibilip siunnersuutaa malikkukku, immaqa malugineqannginnerussaatit, taamaalillutillu ajornartorsiutit pinngitsoorlugit. — 1 Timûtiuse 2:9.
Nakuuserfigineqalissaguit
Pinngitsoorniarlugumi noqqaassuteqartuaraluarlutit nakuuserfiginiarneqaruit? Ussatit 15:1-imi najoqqutassiaq malinniaqqaaruk: „Akissut sallaatsoq kamakkunnaarsitsisarpoq, oqaatsilli ajuallannartut kamalersitsisarput.“ Eliu atuarfimmi taamaaliorsimavoq. Oqarpoq: „Ilaatigut oqaatsit sakkortuut ajortumik tigunnginnissaat apeqqutaaginnartarpoq. Amerlasuutigut qanoq qisuariarneq ajornartorsiortitsisarpoq.“ ’Ajortoq ajortumik’ akinnginneratigut immaqa pissutsit ajornerulernissaat pinngitsoorneqarsinnaavoq. — Rûmamiut 12:17.
Mianersorluni silatusaarneq iluaqutaassanngippat imminut sernissortariaqarputit. Inuusuttuararpaaluit arpaatitit allaluunniit nuannarisat nakuuserlutik piumappassuk, tunniutikkit. Inuunerit pigisannit pingaarnerungaarpoq. (Lúkarse 12:15) Paasoqarnissaanut aarlerinartoqarpat taava qimagugit, arpagit! ússatit 17:14-imi allassimavoq (nutsigaq nutaanngitsoq): ’Saqitsaattut qimakkit ilungersuarulunnginneranni.’ (Naleqqiukkit Lúkarse 4:29, 30; Juánase 8:59.) Qimaasinnaanngikkuit sapinngisamik imminut illersornissaq periarfissaavoq kingulleq. Tamatuma kingornagut qanoq pisimasoqarsimaneranik angajoqqaatit oqaluttuutikkit. Immaqa arlaannik iliuuseqarsinnaapput.
Soorlu Biibilip siulittuutigereersimagaa perulluliorfiusup nalaani inuuvugut. (2 Timûtiuse 3:1-5) Sakkunilli nassataqarnerup karatemilluunniit ilinniarnerup isumannaannerulersinnavianngilaatit. Mianersorit. Ajornartorsiuleraangavit ilisimassut Guutimeersoq atortaruk. Pingaarnerpaamillu, Jehova upperiuk tatigalugulu. Isumalluarlutit tussiaasiortutut qinusinnaavutit: ’Persuaaniartumit aniguisinnga.’ — Tussiaat 18:49. (gD 22/9 95)
[Qupp. 28-mi assiliartaq]
Paanninnermik timersoriaatsit kristumiut atorsinnaanngilaat