Nalunngiliuk?

Palasit Jerusalemmimi guutisiorfimmi kiffartortut uumasut pilliutigineqartut aavat susarpaat?

ITSAQ Israalimi guutisiorfimmi pilliivimmi palasit uumasunik tuusintilinnik pilliuteqartarput. Oqaluttuarisaanermik ilisimatooq juutiusoq Josefus naapertorlugu palasit ullormi qaangiiffimmi savaaqqat 250.000-nit amerlanerusut aaverlugit toqoriarlugit pilliutigisarpaat. (Mos 3. 1:10, 11; Mos 4. 28:16, 19) Uumasorpassuit taakkua aavat suneqartarpa?

Itsarnisarsiuut guutisiorfiup Herodasip sanaavata eqqaani assaanerminni kuuffik nanisimavaat. Kuuffik taanna ukiumi 70-imi guutisiorfiup suujunnaarsin­neqarnerata tungaanut atorneqar­tarsimagunarpoq aak guutisiorfimmiit avammut kuutsin­niarlugu.

Aak pilliivimmit ima marlutsigut peerneqartarpoq:

• Pilliiviup toqqaviata eqqaani itersakkut: Mishnahmi, juutit oqaatsitigut inatsisaannik ileqqutoqaannillu ukiup 200-p kingorna katersukkani, pilliiviup kuuffeqarnera allaatigineqarpoq. Allassimavoq pilliiviup teqeqquisa ilaasa eqqaani marlunnik itersaqartoq. Uumasut pilliutigineqartut aavat imerlu pilliivimmik saliinermi atorneqartoq tassunga kuutsin­neqartarput tassanngaanniillu qooqqumut Kidronimut kuugunneqar­tarlutik.

  Aamma itsarnisarsiortut isumaqarput itersaqartoq. Juutit oqaluttuarisaanerat pillugu atuakkami allassimavoq itsarnisarsiortut guutisiorfiup qanittuani kuuffiit nassaarisimagaat. Ilimanarpoq kuuffitsigut taakkunatigut aak imerlu guutisiorfimmiit kuutsin­neqartartut. – William Horbury, W. D. Davies aamma John Sturdy: Cambridge History of Judaism.

• Imeqarluarnikkut: Pilliivimmik saliinermi aallu kuutsin­niarnerani palasit imerujussuaq atortariaqar­tarsimavaat. Imeq illoqarfimmiit pissarsiarisarpaat. Pilliivik puilasuliatigut, tasinnguatigut imermullu aqqutiliakkut imeqartin­neqartarpoq. Itsarnisarsiooq Joseph Patrich allappoq guutisiorfiup imeqartinnerani erngullu minguttuup kuutsinnerani taamani guutisiorfiit allat taama atortoris­saartigin­ngitsut. – Unearthing Jerusalem.