Siulersuisoqatigiinnit allakkat

Asasavut qatanngutit!

“Tamassi Guutimut qujassutigisaannarpassi qinulluta taagaangassi kipisuitsumillu Guutitta Ataatattalu saavani eqqaaniartarlugit uppernermi suliasi, asanninnermi assoroornersi nikallujuinnersilu Naalakkatsinnut Jiisusi-Kristusimut neriuffiginninnissinni.” (1 Th 1:2, 3) Ilissinnut misigissutsivut tulluartumik taama allaatigineqarsinnaapput! Ilissi pillusi suliasilu pillugit Jehova qutsavigaarput. Sooq?

Ukiumi kingullermi Guutimut kiffartornissinni “uppernermi suliasi” ulapputigisimavasi ‘asanninnermilu assoroorsimallusi’. Ilarpassuasi kiffartornerminnik annertusisitsisimapput. Ilaat nunavigisap ilaanut naalagaaffimmik oqaluussisartunik pisariaqartitsiffiusumut, allaat nunanut allanut, nuussimapput. Allat atuagaasiviit angallattakkat atorlugit tamanut oqaluussinikkut oqaluussisarnertik annertusisimavaat. Amerlasuut eqqaaniaalluni nalliuttorsiornerup nalaani, nakkutilliisup angalasartup tikeraarnerani aamma 2014-imi aggustip qaammataani immikkut ittumik suliniarnermi ikiorti-pioneriusimapput. Assigiinngitsunik atugaqarpusi, takusinnaavarpulli “tarnikkut iluunngarlusi” Jehova kiffartorfigigissi, taamaattumillu nersualaarneqartariaqarpusi. (Kol 3:23, 24, NW) “Uppernermi suliasi” pissutigalugit Jehova qutsavigissallugu pissutissaqarluarpugut!

Aamma nunarsuaq tamakkerlugu sanaartornerni “asanninnermi assoroornersi” qujamasuutigingaarparput. Jehovamut kiffartortut amerliartuinnarmata sanaartornerit tamakku atorfissaqartingaarpavut. (Es 60:22) Ukiumi kiffartorfiusumi kingullermi oqaluussisartut 8.201.545-t angusimavaat, qaammatillu tamaasa 9.499.933-t Biibilimik atuaqqissaaqatigineqartarlutik. Amerliartupiloorneq tamanna pissutigalugu immikkoortortaqarfippassuit ilanissaat nutarsarneqarnissaallu pisariaqartinneqalersimapput. Aammattaaq naalagaaffilersaarfiit suli amerlanerusut pisariaqartinneqalerput. Taamatuttaaq nunarsuaq tamakkerlugu allaffeqarfiit nutserisoqarfiusut pisariaqartinneqarput nutserisut nunat ilaasa immikkoortortaanni oqaatsinut nutsigassanut oqaluttoqarfiusuni najugaqarlutillu sulisinnaaniassammata.

Taamaattumik imminut ima aperisinnaavugut: ‘Sanaartornerit tamakku tapersersorniarlugit qanoq iliorsinnaavunga?’ Ilavut kajumissutsiminnik immaqa sanaartoqataasinnaapput. Sanaartornermilluunniit piginnaasaqanngikkaluarluta tamatta suliassanut pingaarutilinnut tamakkununnga pisuussutitsinnik tapersersuisinnaavugut. (Uss 3:9, 10) Tupeq naapeqatigiittarfik sananeqarnialermat inuit ima tukkortigipput allaat Israelikkut peqquneqartariaqarlutik tunissuteqarunnaarallaqqullugit. (2 Mos 36:5-7) Qularutissaanngilaq Biibilimi oqaluttuat tamakku uummatitsigut killinneqaatigalugit kajumissuseqalersikkaatigut. Illernartumik kiffartornermut tamatumunnga “asanninnermi assoroornersi” pillugu Jehovamut qujassutissaqarnerungaalerpugut!

Qatanngutitta nikallujuisaarnerisa nuannaarutiginissaannut pissutissaqangaarpugut. Qatanngutivut Sydkoreamiittut eqqaariartigit. 1950-imiilli angutit inuusuttut qatanngutit nunami tassani sorsoqataarusunnginnertik pissutigalugu sivisussutsini assigiinngitsuni parnaarussaasarput. Qatanngutit kinguaariit arlalinngortut taama pineqartaraluarlutik nikallujuisaarluinnartarsimapput. Nikallujuisaartarnerat uppernitsinnut nakussassaataaqaaq.

Eritreami qatanngutivut angutit pingasut parnaarussaaqqallutik ukiut 20-t sinnerpaat. Allat, ilaatigut qatanngutivut arnat meeraallu sivikinnerusumik parnaarussaaqqapput. Aniguisinniarlugit ilungersortoqartaraluarpoq, sulili iluatsinngitsumik. Uppeqativut aalajaattuarput. Pissutsini ilungersunangaartuni assuarnaattuarsimapput. Ikinngutivut aalajaattuartut qinnutitsinni eqqaamajuassavavut. — Rom 1:8, 9.

Soorunami amerlanerpaajususi uppernersi pissutigalugu parnaarussaasimanngilasi. Taamaattorli ilarpassuavut utoqqalinerup nassataanik, nappaatinik katsorsarneqarsinnaanngitsunik, aapparmit ilaquttanilluunniit uppeqatiginngisanit akerlilersorneqarnermik inuttulluunniit namminiinnaq ilisimasamik unamminiagaqarnermik ajornartorsiuteqarput. Taamaattorli aalajaallusi Jehovamut kiffartortuarpusi! (Jaak 1:12) Nersortariaqaqaasi. Aalajaallusi nikallujuisaarnersi pillugu Jehovap qutsaviginissaanut pissutissaqarluarpugut.

Aap, aalajaallusi uppernermi suliasi asanninnermilu assoroornersi nikallujuinnersilu pissutigalugit ‘Jehova qutsavigaarput ajunngitsuummat’. (Tuss 106:1) Tamassi asangaarpatsigit, naassaanngitsumillu pallorfiginissaanut nakussatseqqullusi, sernigeqqullusi pilluaqqoqqullusilu Jehova qinnuigaarput.

Qatanngutisi

Jehovap Nalunaajaasuisa Siulersuisoqatigiivi