Aallarniutit sunniuteqarluartut qanoq piareersarneqarsinnaasut
1. Aallarniut tulluartoq qanoq pingaaruteqartigaa?
1 Soorlu siuleqqiut nerisassanut pingaarnernut qilanaartuutaasartoq taamatuttaaq aallarniut tulluartoq Biibilimik tunngasumik oqaloqatigiinnissamut aallarniutaasinnaavoq. Aallarniutit sunniuteqarluartut oqaasertai takissusaalu assigiinngiiaarsinnaapput, nerisassalli marmarluartut assigalugit eqqarsaatigeqqissaarsimanissaat piareersarluarsimanissaallu pisariaqarput. (Uss 15:28) Qanoq sunniuteqarluartumik aallarniisoqarsinnaava?
2. Aallarniut qanoq soqutiginarsarsinnaavarput?
2 Sammisassamik soqutiginartumik toqqaagit. Aallarniuterput soqutiginnilersitsinngippat pulaakkap oqaloqatigiinneq kiperiaannaavaa. Taamaattumik piareersarnitsinni najukkatsinni soqutigineqartut eqqarsaatigisassavavut. Innuttaasut naalakkersuisut aqutsilluartut, ilaquttariit pilluarnissaat imaluunniit sorsuttoqarunnaarnissaa soqutigisarivaat? Inuit isummertinniarlugit apeqqummik eqqarsalersitsisumik piareersaagit. Guutip naalagaaffianut kiffartorneq-mi aallarniutit siunnersuutigineqartut ilaat atorsinnaavigit angalaarfigisartakkannullu tulluarsarlugit? Soormi ilaqutariittut atuaqqissaaqatigiinnermi aallarniutit ilaat misilikkussigit?
3. Aallarniuterput angalaarfigisartakkatsinniittut kulturiannut tunuliaqutaannullu qanoq tulluarsarsinnaavarput?
3 Kulturiat tunuliaqutaallu eqqarsaatigikkit. Sumiiffiit ilaanni pulaarnitsinnut pissutaasoq paaserusupallattarpaat. Sumiiffinnili allani pulaartup pulaagaq qanoq innersoq apeqqutigeqqaanngippagu pulaartorluunniit imminut ilisariteqqaanngikkuni pissuserissaanngitsutut isigineqassaaq. Sumiiffiit ilaanni inuit upperisami tunuliaqutaat pissutigalugu aallarniutitsinni Biibili toqqaannartumik eqqaasinnaavarput. (ApS 2:14-17) Sumiiffiilli ilaanni inuit kristumiussusermik upperisaqanngippata arlaannaanilluunniit upperisaqanngilluinnarpata naapitsinermi siullermi Biibili eqqaanngikkaluarlugu aatsaat pulaaqqiinermi eqqaaneqaruni pitsaanerussaaq. — ApS 17:22-31.
4. Aallarniutitut oqaasissatsinni suut eqqumaffiginiassavavut?
4 Oqaatsit aallarniutaasut. Aallarniutitut oqaasissatit piareersarluakkit. Naatsumik paasiuminartumillu oqaaseqarneq ajunnginnerusarpoq. Oqaatsit siulliit qanoq oqaatigineqarnersut aamma aalajangiisuusarpoq. Angorniorit. Pulaakkamut inussiarnersumik qungujullutit soqutiginninnerit ersersiguk. Siunnersuutigineqartut malinneratigut inuit angalaarfigisartakkatsinniittut ‘Jehovap nerliutaanik’ nererusulersinniarlugit aallarniutit qilanaartuutissat piareersarsinnaavavut. — 1 Kor 10:21.