Saqqummeeriaaseq sunniuteqarluartoq atoruk
1. Kristumiut siulliit assigiinngitsunik saqqummeeriaaseqartarnerat qanoq ilinniarfigisinnaavarput?
1 Kristumiut siulliit nutaarsiassaq nuannersoq inunnut assigiinngitsunik kulturilinnut assigiinngitsunillu upperisalinnut oqaluussissutigisarpaat. (Kol 1:23) Tusarliussaat, Guutip Naalagaaffia, assigiikkaluartoq tusarnaartiminnut assigiinngitsunik saqqummeeriaaseqartarput. Assersuutigalugu juutinut Allakkanik Illernartunik ataqqinnittupilussuarnut oqaluussilerami Petrusip pruffiiti Joeli issuarpaa. (ApS 2:14-17) Paarlattuanilli Paulusip grækerit oqaloqatigigamigit Apustilit Suliaanni 17:22-31-mi qanoq tunngavilersuinera maluginiaruk. Ullumikkut inuit oqaluussiffigisartakkatta ilaanni Allakkat Illernartut ataqqisarivaat taamaattumillu illumiit illumut angalaaraangatta Biibili ammasumik oqaloqatigiissutigisinnaasarparput. Illuatungaanilli Biibilimik imaluunniit upperisarsiornermik soqutiginninngitsunik kristumiuunngitsuniluunniit oqaloqatiginninnitsinni qajassuartuusariaqarpugut.
2. Inuit Biibilimik ataqqinnittut ataqqinninngitsullu ikiorniarlugit neqeroorutit qanoq atorsinnaavavut?
2 Neqeroorutit atortakkit: Ukiumi kiffartorfiusumi matumani neqeroorutit qaammat allortarlugu allanngortinneqartassapput atuagassiat, naqitaaqqat atuagassiaaqqallu pingaarnerutinneqartassallutik. Oqaluussiffigisartakkatsinni inuit nalinginnaasumik Biibilimik soqutiginninngippata, taakkua soqutiginerusaannik neqeroorfigisinnaavavut. Biibilimiit atuanngikkaluarluta toqqaannartumilluunniit eqqaanngikkaluarlugu pulaagaq soqutiginnippat, Pinngortitsisumik taassumalu oqaasiinik upperinnilernissaanut ikiorniarlugu pulaaqqissinnaavarput. Aamma inunni Biibilimik ataqqinnittuni oqaluussigutta Biibililersaarutit takutissinnaavavut saqqummeeriaaserlu taassumunnga tulluartoq atorlugu. Qaammammi neqeroorutissat suugaluarpataluunniit atuagaq Biibilimi ajoqersuutigineqartut imaluunniit atuagassiaaraq Guuti tusarnaaruk naassaanngitsumik inuusinnaaqqullutit neqeroorutigisarsinnaavavut. Saqqummeeriaatsip sunniuteqarluartup atorneqarnissaa pingaaruteqarnerpaavoq.
3. Inuit oqaluussiffigisartakkatsinniittut uummataat qanoq issumut assinguppat?
3 Issoq suliariuk: Inuup uummataa issutut ippoq. (Luk 8:15) Sallusuissut Biibilimeersoq naajartortinniarlugu sorlanissappat issut ilaat sivisunerusumik iluarsartuunnissaat pisariaqartarput. Ukiuni hundredelinni siullerni oqaluussisartut iluatsilluartumik issut assigiinngitsut siaruarteriffigisimavaat tamannalu nuannaarnermik nalerisimaarnermillu sunniuteqarpoq. (ApS 13:48, 52) Saqqummeeriaatsit eqqumaffiginerisigut iluatsitsilluarneq taama ittoq uagut aamma misigisinnaavarput.