Unillatsiartarata suliuaannarpugut
1. Qanoq ililluta nalunngilarput ukiuni siullerni oqaluussisartut unillatsiartaratik suliuaannartuusut?
1 Ukiuni hundredilinni siullerni oqaluussisartut ilungersortut inoqarfiusumi sumiluunniit nutaarsiassamik nuannersumik ‘ajoqersuinertik ingerlatiinnartarpaat’. (ApS 5:42) Taamaattumik takorloorsinnaanngilarput illumiit illumut angalaaraangamik inuit aqqusinermi naapitatik oqaluussiffiginngitsoortarsimassagaat. Aamma angalaareernerup kingorna niueriartortarfimmut pisiniaraangamik torrutiinnarlugu oqaluussinissamut periarfissartik qammuinnartittanngilaat. Jiisusitulli unillatsiartaratik suliuaannartuupput. — Mark 6:31-34.
2. Ateqaaterput naapertorlugu inuussagutta qanoq iliortariaqarpugut?
2 Piareersimajuarpugut: Jehovap Nalunaajaasuatut ateqaatitta sulerinerput kisiat ersersinngilaa; aamma kikkuunerput ersersippaa. (Es 43:10-12) Taamaattumik, neriuuterput illersorniarlugu piareersimajuarpugut illumiit illumut angalaanngikkaluaraangattaluunniit. (1 Petr 3:15) Torrutiinnarlugu oqaluussinissamut periarfissaq siumut takorlooreertarpiuk oqaasissatillu eqqarsaatigereerlugit? Biibililersaarutinik soqutiginnittunut tunniussassannik nassataqartarpit? (Uss 21:5) Illumiit illumut taamaallaat oqaluussisarpit, imaluunniit pissutsinut naleqquppat, periarfissani allani nutaarsiassaq nuannersoq aamma siaruartertarpiuk?
3. Sooq aqqusinerni, biilit unittarfiini, niuertarfinni allanilu oqaluussineq aamma pingaaruteqarpa?
3 “Kikkut tamarmik takkuanni” nalunaajaaneq: Aqqusinerni, biilit unittarfiini, niuertarfinni allanilu oqaluussisarpugut. Taamatut oqaluusseriaaseqarneq nalinginnaasumit allaalluinnarpa? Apustili Paulusi oqarpoq, “kikkut tamarmik takkuanni” aamma illumiit illumut oqaluussisarluni. (ApS 20:20, NV) Guutip naalagaaffia pillugu oqariartuutitsinnik inuit anguniarneranni illumiit illumut oqaluusseriaaseq oqaluussinermi pingaarnerpaajullunilu sunniuteqarluarsinnaanerpaajuvoq. Ukiunili hundredilinni siullerni oqaluussisartut illut angunissaat pingaarnerutinnagu inuit naapinnissaat pingaarnerutittarpaat. Tamanut sallusuissut oqaluttuariniarlugu periarfissat tamaasa atortarpaat — torrutiinnarlugu oqaluussineq illumiillu illumut oqaluussineq. Qanortoq kiffartornerput naammassiniarlugu assigiimmik isiginnittaaseqarta. — 2 Tim 4:5.