Apeqquteqarfik
◼ Pionerit ikiorniarlugit qanoq iliuuseqarsinnaavugut?
Ukiumi kiffartorfiusumi 2009-mi silarsuaq tamakkerlugu qatanngutit angutit arnallu 800.000-tingajaat pioneritut specialpioneritullu kiffartorsimapput. Piffissaq tamaat kiffartortut taakkua piffissamik, nukimik pigisamillu inereqqaataat Naalagaaffimmik nutaarsiassaq nuannersoq siammartikkumallugu pilliutigisimavaat. (Uss 3:9) Ila suliarpassui Jehovap nuannaarutigingaarsimassavai! Qanoq ililluta piffissaq tamaat kiffartortunut Jehovatut isiginnittaaseqarsinnaavugut, kiffartoriaatsimut tamatumunnga nuannaarnerup pigiinnarnissaanut aalajaattuarnissaannullu ikiorlugit?
Oqaatsit tulluartut oqaaserinerisigut pioneritut kiffartornermi ingerlaannarnissaannik qiimmassarsinnaavavut. (Uss 25:11) Sapaatip akunnerani pilersaarutivut allanngortissinnaannginnerpavut angalaaqatigalugillu? Angalaaqatigilerutsigit biilii atornagit uagut biilivut atorniarsinnaavavut. Taakkua biilii atorutsigit aningaasartuutannut tapiilaarsinnaassaagut. (1 Kor 13:5; Fil 2:4) Aamma asannittumik tapersersuinerput inoroorsaarnikkut takutissinnaavarput piffissat ilaanni pionerit neriartoqqusarlugit. — 1 Petr 4:8, 9.
Biibilimi neriorsoqqissaarneqarpugut naalagaaffimminik salliutitsisut pisariaqartitaannik Jehovap isumassorumaarai. (Tuss 37:25; Matt 6:33) Taamaaliortarpoq ilaatigut qatanngutit asannittut aqqutigalugit. (1 Joh 3:16-18) Soorunami, pionerit ilimasuffiginngilaat aningaasartuutitik allat matussusissagaat. Namminneq siulliullutik pisariaqartitatik allanut oqaatiginaviarunanngilaat. Uagulli pionerit aalajaatsut ‘amigaateqarnerannik ikorsersinnaavavut’ assigiinngitsutigut eqqumaniarluta. — 2 Kor 8:14, 15.
Føbe, ukiuni hundredilinni siullerni ilagiinni Kenkreæmi oqaluussisartuusoq ilungersuussisoq Romaliarmat, Paulusip qatanngutit Romamiittut ima kajumissaarpai: “Naalakkap aqqani ilassisiuk, illernartuni ileqquusartoq naapertorlugu, pisariaqagaanillu tamanik ikiorlugu.” (Rom 16:1, 2) Uaguttaaq assingusumik periarfissaqarpugut ilagiitsinniittut pioneritut specialpioneritullu nutaarsiassamik nuannersumik unissanatik oqaluussisut asannittumik tapersersornissaannut. — ApS 5:42.