Jehovap asanninneranik pingaartitsineq pilluaqqussutaasarpoq — Immikkoortoq siulleq
1 Apustili Johannesi allappoq: „Uagut asannippugut taassuma asaqqaarmatigut.“ (1 Joh. 4:19) Jehovap uagut pilluta iliuuserisimasarpassui eqqarsaatigigaangatsigit qujamasunnerput takutikkusulersarparput. Jiisusi tamatumani maligassaalluarpoq Guutip aqqanik naalagaaffianillu kajumilluni oqaluussinermigut. (Joh. 14:31) Jehovap asanninneranik pingaartitsinerput qanoq takutissinnaanerlutigu, qanorlu pilluaqqusaasarnerluta eqqarsaatigeqqissaarutsigu iluaqutigigaassavarput.
2 Illumiit illumut angalaarnermi: Jiisusip ajoqersukkani ajoqersorpai Naalagaaffimmik oqaluussineq qanoq ingerlanneqartassanersoq. Ilitsersuutaani takuneqarsinnaalluarpoq illumiit illumut angalaarlutik tusarliussaq nuannersoq oqaluussissutigigaat. (Luk. 9:1-6; 10:1-7) Guutimut tullermullu asanninnerput illumiit illumut angalaartuarnissatsinnut tunngaviusariaqarpoq, naak soqutiginninngitsunik akerartuisunillu naapitsisaraluarluta. Uagulli aamma nammineq iluaqutigaarput uppernikkut, aalajangiussisimanikkut neriunnikkullu nakussatsinneqaratta.
3 Inngilit siulersuineratigut suligatta, sallusuissutsimut kaattut imerusuttullu amerlasuut nanisimavavut. Inuit pulaarneqarsimasut oqaluttuartarput, ikioqqullutik qinusimatsiarlutik Jehovap Nalunaajaasuanit kasuttorneqarsimallutik. Caribienimi qeqertat ilaanni Jehovap Nalunaajaasui marluk meerarlu illumiit illumut angalaarput. Inersimasut ulloq taanna kiffartornertik unitsinniarlugu aalajangermata, meeraq nammineq matup tullianut ingerlaqqippoq kasuttorlunilu. Arnap inuusuttup ammaappaa. Inersimasut takugamikku oqaloqatigiartorpaat. Iseqquai oqarlunilu aatsaannguummat Jehovap Nalunaajaasui aggeqqullugit Guutimut qinusimalluni, Biibilimik ilinniartinniassammanni!
4 Aqqusinermi angalaarnermi: Sumiiffiit ilaani inunnik angerlarsimasunik naapitsinissaq ajornakusooqimmat, aqqusernermi angalaarluni oqaluussineq pitsaalluinnartuuvoq. Aammami inuppassuit sumiiffiit ilaanni inissianiluunniit isumannaallisakkani najugaqarmata, matumiit matumut angalaarnissarput ajornarkusoortarpoq. Jehovalli asanninneranik pingaartitsinitta, periarfissat atorneqarsinnaasut tamaasa, ilaatigut aqqusinermi angalaarnikkut Naalagaaffik pillugu tusarliussamik inuit oqaloqatiginissaannut kajumilersippaatigut. — Uss. 1:20, 21.
5 Pulaaqqiinermi: „Anersaakkut pisariaqartitsinerminnik nassuerutiginnittut“ (NV) ujaratsigit, sapinngisarput tamaat atorusupparput pisariaqartitaat matussutissinniarlugit. (Matt. 5:3) Sallusuissutsip naatsiiassartaa ikkussimasarput imerterniarlugu uteqqittariaqarpugut. (1 Kor. 3:6-8) Qatanngutip arnap Australiameersup naqitaaraq arnamut soqutiginnippallaarunanngitsumut tunniuppaa. Taamaakkaluartoq qatanngutip arnap naapeqqinniarsaralugu misileqattaarpaa. Kiisami iluatsitsigami qatanngutitta paasivaa, pulaarneqaqqaarnerup kingorna akisoorsuarmik Biibilisisimasoq, Biibilimillu atuaqqissaaqatigiinneq aallartippoq.
6 Biibilimik atuaqqissaaqateqarnikkut: Tamanna kiffartornitsinni nuannaarnarnerpaajusinnaavoq. Nuannernerpaavoq inuit Jehovamik ilisarsinissaanik ikiorlugit, Jehovalu nuannaartinniarlugu inuunerminnik allannguisut naggataatigullu Guutimut tunniulluinnarnerminnut assersuutaasumik kuisittut takullugit. — 1 Th. 2:20; 3 Joh. 4.
7 Tulliani Naalagaaffimmi kiffartornermi saqqummersumi, Jehovap asanninneranik pingaartigaagatta assigiinngitsutigut pilluaqqusaasarnerput sammissavarput.