Kiffartornerit naammassiviuk peqqissaarlutit?
1 Apustilit suliaani atuarparput Jiisusip ajoqersuugaasa kiffartornerminni ’peqqissaartumik nalunaajaanertik’ naammassigaat. (Ap. Sul. 2:40; 8:25; 28:23) Ersarippoq apustili Paulusi aamma taamatut anguniagaqartoq. (Ap. Sul. 20:24) Illit aamma, tusagassamik nuannersumik oqaluussisartutut tamanna anguniagaraajuk? Qanoq angusinnaaviuk?
2 Piareersarit: Nalunaajaanermi angusaqarluarumagaanni piareersarluartariaqarpoq. Ingammik tamanna pingaaruteqarpoq atuagassiat qulequtaat allanngorartuartut neqeroorutigineqaraangata. Taamaattumik ikiorumalluta piginnaanngorsarniarlutalu Naalagaaffimmik kiffartorneq-mi maannakkumiit, atuagassiat Napasuliaq Alapernaarsuiffik-up Iteritsi!-llu normui kingulliit, ulluni atuagassianik agguaassiffinni aalajangersimasumillu pisartagalinnut qanoq neqeroorutigineqarsinnaanersut siunnersuuteqartassaaq. Normuni tamani qulequttat soqutiginartut inuppassuarnut kajumissaarutaasut saqqummiunneqartassapput. Saqqummiusseriaatsit naatsut tamakku qanoq atorsinnaavigit?
3 Siunnersuutinik illit angalaarfigisartakkanni sunniuteqarluarsinnaasorisannik toqqaagit. Allaaserisaq pineqartoq atuaqqissaaruk, qulequttallu aalajangersimasut pulaakkannut soqutiginnilersitsisinnaasut maluginiakkit. Allassimaffimmik atuagassiamiittumik pulaakkannut atuarusutannik toqqaagit. Pulaakkannut atuagassiamik atuarusulersitsisumik naggasiigit. Saqqummiusseriaaseq sungiusariaannanngorpat.
4 Biibilip atornissaanut piareersarit: Piareersarluaraanni, pulaakkap allassimaffimmik takutinnissaanut periarfissaqarsinnaavoq. Sumi tamani oqaluussisartut misilittagaqarluartut angusaqarluartarput matumiit matumut oqaluussinerminni Biibili tigummillugu pulaagartik ilasseriarlugu ima oqartartut:
◼ „Nalunngiliuk Biibilimi allassimasoqartoq nunarsuaq tamakkerlugu ataasiinnarmik naalakkersuisoqalerumaartoq?“ Danieli 2:44 atuaruk versilu oqaaseqarfigilaariarlugu aperalugu: „Allassimaffimmi uani naalagaaffik suna pineqarnersoq nalunngiliuk?“ Mattæusi 6:9,10-lu atuakkit. „Allatut oqaatigalugu taannaavoq ’Guutip naalagaaffia’ ataatarpuumi qinnutigisartagarput. Naalagaaffilli taanna aqutsilerpat uagutsinnut qanoq kinguneqassava?“ Versit naatsunnguamik oqaaseqarfigikkit, immikkoortumi assimik Biibilimiilluunniit oqaluuserisannut tulluartumik takutitsillutit atuagaq atuagassiarluunniit neqeroorutigiuk.
5 Soqutiginninneq malittariuk: Soqutiginninneq malittarinngikkukku kiffartornerit naammassisinnaanngilat. Oqaloqatigilluakkat atuakkanik atuagassianilluunniit tigusinngikkaluarpalluunniit kinaanersoq sumilu oqaloqatigisimanerlugu allaguk. Soqutiginniittuannartinniarlugu aggeqqipallagit. Biibilimik atuqqissaaqateqarniarlutit tamatigut neqeroortarit.
6 Ukiuni hundredilinni siullerni ajoqersukkat nalunngilaat Jiisusip ’inunnut oqaluusseqqugaatik nalunaajaaqqugaatillu’. (Ap. Sul. 10:42) Uagutaaq taama peqquneqarpugut, taamaaliornerinnakkummi ajoqersuisunngortitsisinnaagatta. (Matt. 28:19, 20) Sapinngisarput tamaat peqqissaarluta kiffartornerput naammassitigu. — 2 Tim. 4:5.