Tunuarsimaaqinak!
1 Oqaluussiartorniartilluta unamminiarnarnerpaat ilagisarpaat alloriusatta allornissaa. Imminut naammaginnginneq pissutigalugu ’inuit tamarmik’ oqaluussiffigineqarnissaat immaqa tunuarsimaarfigaarput. (1 Tim. 2:4) Nutaarsiassamik nuannersumik oqaluussinitsinni annilaangassuteqartariaqanngilagut. Sooq?
2 Tassa Jehovap oqariartuutaa: Jehovap oqaatsiminik Biibili aqqutigalugu nalujunnaarsippaatigut. Inunnut allanut tusarliussarput, tassa taassuma oqariartuutaa, uaguunngitsoq. (Rom. 10:13-15) Oqaatsivut ilassiumanngikkaangamikkit, ilumoortumik Jehova itigartittarpaat. Taamaattumik nikallornissatsinnut pissutissaqanngilagut. Tatigisinnaavarput, silarsuarmi pissutsinik allannguinissamik erinigisaqartut anersaakkullu pisariaqartitsinerminnik nassuerutiginnitut oqariartuut uummataannit iluarineqalerumaartoq. — Ez. 9:4; Matt. 5;3, 6.
3 Jehovap inuit kajungilersittarpai: Atukkat allanngortarmata, siornatigut itigartitsisimasup uummataa aqilisinnaavoq ajunngitsumillu qisuariarluni. Jehovap taamaattoq saamaannermik takutitsivigisinnaavaa ’kajungersilerlugulu’. (Joh. 6:44, 65) Taamaattoqartillugu, soorunalimi kissaatigaarput Jehovamit atorneqarnissarput inngilinillu aqqutissiuunneqarluta inummut tassunga ornigunnissarput. — Saq. 14:6.
4 Guutip anersaaminik illernartumik tunivaatigut. Anersaap illernartup, ’nakimanata [Jehova] tatigalugu’ oqalutsittarpaatigut. (Aps. 14:1-3) Eqqaamajuarutsigu nukingata oqaluussinitsinni najoraatigut, nalunngisatisinnut, suleqatitsinnut, atuaqatitsinnut, ilaqutatsinnut, atorfikkaanut pigissaartunulluunniit oqaluussinissarput tunuarsimaarutiginavianngilarput.
5 Qanoq iliornissatsinnik Jiisusip ilitsersuuppaatigut: Jiisusi eqqarsalersitsisunik apeqquteqartarpoq, takorlooruminartunillu assersuuteqartarluni Biibilimiillu tunngavilersuisarluni. Uummammit pisumit oqaluppoq sallusuissullu kajuminnartumik paasiuminartumillu nassuiartarlugu. Suli taamaaliortarneq pitsaanerpaajuvoq. (1 Kor. 4:17) Pissutsit oqaluussilluta atukkavut assigiinngissinnaagaluartut, Naalagaaffik pillugu oqariartuut pissaaneqangaartoq taannaajuarpoq.
6 Inuit ikiorniarlugit taamak torrallataatigisumik pingaaruteqartigisumillu iliorluni, Jehovap atormatigut immikkut pisinnaatitaaffiuvoq. Tunuarsimaartariaqanngilagut. Sapiissuseqarluartariaqarpugut Jehovamut „oqaatsip matuanik ammaateqqulluta“ inunnut allanut tusarliussassaq nuannersoq oqaluussissutigisinnaaqqullugu. — Kol. 4:2-4.