Apeqquteqarfik

◼ Ilagiinni atuakkamik atuaqqissaaqatigiinnik nutaanik pilersitsissagaanni qaqugukkut pitsaanerussava?

Atuaqqissaaqatigiinni tamani ataatsimiittartut 15-it missaaniittinniarlugit ikinnerutinniarlugilluunniit pisariaqarpat atuaqqissaaqatigiinnik nutaanik pilersitsinissaq isumaliutigineqartariaqarpoq, angerlarsimaffimmiissagaluarpat naalagaaffilersaarfimmissagaluarpalluunniit. Sooq tamanna innersuussutigineqarpa?

Atuakkamik atuaqqissaaqatigiit angivallaanngippata aqutsisup najuuttut tamaasa eqqumaffiginerusinnaassavai. Aammattaaq tamarmik akinissaminnut periarfissaqarluassapput pissutsini upperisaminnik tamanut nassuerutiginninnerminnut tapersiisuni. (Heb. 10:23; 13:15) Ilagiinni atuakkamik atuaqqissaaqatigiittartut minnerusut amerlaneruppata amerlanerusunut ataatsimiigiarneq katersuuttunukarnerlu ajornannginnerussaaq. Ilagiit amerlanerusunik atuakkamik atuaqqissaaqatigiinnik pilersitsisimasut paasisimavaat amerlanerusut atuaqqissaaqatigiinnissamut takkuttartut.

Immikkut ittumik pisoqqarsinnaavoq atuakkamik atuaqqissaaqatigiiffissamik allamik pilersitsisariaqalersitsisumik, najuuttussat ikikkaluarpataluunniit. Tamanna pisariaqarsinnaavoq avinngarusimasumi imaluunniit inissakilliortoqarpat issiavissaaleqisoqarpalluunniit. Pisariaqassappat utoqqaat, unnuarsiortartut imaluunniit qatanngutit uppeqatiginngisamik uillit nuannaarutigisinnaasaannik ullukkut atuaqqissaaqatigiinnik pilersitsisoqarsinnaavoq.

Atuaqqissaaqatigiit tamarmik oqaluussisartunik anersaakkut nukittuunik ingerlalluartunillu aamma aqutsisumik pikkorissumik atuffarissumillu ilaqartariaqarput. Ilagiinni pisariaqartitat taamaattut matussuserniarlugit qatanngutit angutit piukkunnarsarnissartik anguniartariaqarpaat.

Utoqqaanertat ilagiit siuariarnissaannut taperseeqataasinnaapput atuakkamik atuaqqissaatigiit naleqquttumik angissuseqarnerat, anersaakkut isumagineqarluarnissaat naleqquttunilu katersuuttarfeqarnissaat isumagigunikku. Naleqqukkaangat atuaqqissaaqatigiinnik nutaanik pilersitsisoqartariaqarpoq aaqqissuussineq anersaakkut ineriartornartoq tamanut tamakkiissumik pissarsiaqarnartillugu iluaqutaatillugulu. Illit angerlarsimaffiit atuakkamik atuaqqissaaqatigiinnut atukkiussinnaaviuk? Taamaaliorsimasut amerlasuut anersaakkut pilluaqqusaasimapput.